പിഎന്‍ബി തട്ടിപ്പിന്റെ രാഷ്ട്രീയവും, നേട്ടത്തിനായി ചാടിയിറങ്ങി കുഴിയില്‍ വീണ് കോണ്‍ഗ്രസും

വിശ്വരാജ്

 

രാജ്യം കത്തുമ്പോള്‍ കഴുക്കോല്‍ ഊരുന്ന പാരമ്പര്യം ആണല്ലോ കോണ്‍ഗ്രസ് പാര്‍ട്ടിക്കും കമ്മ്യൂണിസ്റ്റ് പാര്‍ട്ടിക്കും എല്ലാം ഉള്ളത്. നീരവ് മോഡി യിലെ മോഡി എന്ന ഗുജറാത്തിലെ സര്‍നെയിം വച്ച് ചോട്ടാ മോഡി എന്ന് വിളിച്ചു വിഷയത്തെ ബിജെപി യുമായി ബന്ധപ്പെടുത്താന്‍ ശ്രമിച്ച കോണ്‍ഗ്രസിന് ബൂമറാങ് പോലെ ആയി ഇപ്പോള്‍ PNB ഫ്രോഡ് കേസ്

പഞ്ചാബ് നാഷണല്‍ ബാങ്കും നീരവ് മോഡിയും ഇന്ത്യന്‍ ബാങ്കിങ് സംവിധാനവും 

മുത്തശ്ശി എല്ലാം ഡെമോയിലൂടെ കാണിച്ചു മനസ്സിലാക്കി തരുന്ന ആളായിരുന്നു. കാര്യങ്ങള്‍ ശരിക്ക് മനസ്സിലാക്കാതെ കിടന്നു ഒച്ച വെക്കരുത് അത് നമ്മുടെ അറിവില്ലായ്മ പുറത്തു കൊണ്ട് വരും എന്ന് പഠിപ്പിക്കാന്‍ മുത്തശ്ശി എന്ത് ചെയ്തു. ഒരു പയ്യനെ വിളിച്ചിട്ട് പറഞ്ഞു ‘ഒരു 5 രൂപക്ക് ചന്ത ഇരമ്പലും 4 രൂപക്ക് ഉന്തും തള്ളും വാങ്ങി വരൂ. ബാക്കി 1 രൂപക്ക് മിട്ടായി വാങ്ങിക്കോ. സഞ്ചി എടുത്തോളൂ അല്ലേല്‍ താഴെ പോകും ‘ എന്ന് പറഞ്ഞു തീരും മുന്നേ ആള് കാശും വാങ്ങി ഓടിക്കഴിഞ്ഞു. മുത്തശ്ശി ചിരിച്ചു. . കുറച് കഴിഞ്ഞു ഓടിപ്പോയ പയ്യന്‍ ദേഷ്യപ്പെട്ടു തിരികെ വന്നു എന്തൊക്കെയോ പറഞ്ഞു പൈസയും വലിച്ചെറിഞ്ഞു തിരികെ പോയി. മുത്തശ്ശി ചോദിച്ചു , കാര്യം പിടികിട്ടിയോ ??? കാര്യങ്ങള്‍ വ്യക്തമായി മനസ്സിലാക്കാതെ ‘ഗൊറില്ല ആക്റ്റ് ‘ നടത്തിയാല്‍ അവനവന്റെ തൊണ്ടയും നെഞ്ചും പടമാവും എന്ന് മാത്രമല്ല, അല്‍പ ജ്ഞാനം മറ്റുള്ളവര്‍ മനസ്സിലാക്കുകയും ചെയ്യും…

നീരവ് മോഡി PNB ബാങ്ക് തട്ടിപ്പ്

ഇന്ത്യന്‍ ബാങ്കിങ് സംവിധാനം ലോകത്തെ ഏറ്റവും വിശ്വാസ്യത ഉള്ള ബാങ്കിങ് സംവിധാനം ആണെന്നാണ് നമ്മുടെ ധാരണ.പക്ഷെ അനുദിനം വളര്‍ന്നു വരുന്ന ടെക്‌നോളജിക്കനുസരിച്ചു നമ്മള്‍ ബാങ്കിങ് സംവിധാനം കോര്‍ ബാങ്കിങ് ഡിജിറ്റല്‍ റിക്കണ്‌സിലിയേഷന്‍ ഓഡിറ്റിങ്ങിനു കൂടി വിധേയമാക്കണം എന്ന ശക്തമായ സന്ദേശം ആണ് മുംബൈ ബ്രഡി ഹൗസ് പഞ്ചാബ് നാഷണല്‍ ബാങ്കിന്റെ (PNB) ശാഖയില്‍ നടന്ന തട്ടിപ്പ് വെളിവാക്കുന്നത്. പഞ്ചാബ് നാഷണല്‍ ബാങ്കില്‍ നിന്ന് 4 GM അടക്കം 16 പേരെ കൃത്യനിര്‍വ്വഹണത്തിന്റെ പേരില്‍ ഇതിനോടകം സസ്‌പെന്‍ഡ് ചെയ്തിട്ടുണ്ട് എങ്കിലും പ്രധാനമായും 2 ജീവനക്കാരെ വച്ച് കൊണ്ടാണ് നീരവ് മോഡി ഗ്രൂപ്പ് ഈ സഹസ്ര കോടികളുടെ കള്ളക്കളി മുഴുവന്‍ നടത്തിയത്. . ഇത് പഞ്ചാബ് നാഷണല്‍ ബാങ്കിലെ മാത്രം പ്രശ്‌നമല്ല.ബാങ്കിങ് സംവിധാനവും ഓഡിറ്റിങും കുറ്റമറ്റത് ആക്കാത്ത എല്ലാ ബാങ്കുകള്‍ക്കും ഇത് സംഭവിക്കാന്‍ സാധ്യത ഉണ്ട്. പക്ഷെ രാജ്യത്തെ ഭൂരിഭാഗം ബാങ്കുകളും ഇന്‍ഫോര്‍മേഷന്‍ സിസ്റ്റം ഓഡിറ്റും കോര്‍ ബാങ്കിങ് ഓഡിറ്റും കമ്പൈന്‍ ചെയ്തു തികച്ചും സുരക്ഷിതമായ രീതിയില്‍ ഉള്ള സംവിധാനം ഉപയോഗിക്കുന്നുണ്ട് എന്നത് വളരെ ആശ്വാസകരമാണ്.

ലെറ്റര്‍ ഓഫ് അണ്ടര്‍സ്റ്റാന്ഡിങ് LOU എന്താണ് ?

രണ്ടു തരം ക്രെഡിറ്റ് ഫെസിലിറ്റി (Credit Faciltiy ) ഇടപാടുകള്‍ ആണ് ബാങ്കിങ്ങില്‍ ഉള്ളത് ഒന്ന് ഫണ്ടഡ് ഫെസിലിറ്റി (Funded faciltiy ) മറ്റൊന്ന് നോണ്‍ ഫണ്ടഡ് ഫെസിലിറ്റി (Non Funded Faciltiy). ഫണ്ടഡ് ഫെസിലിറ്റിയില്‍ ഏതെങ്കിലും ഒരു രൂപത്തില്‍ പണം ഒരു ഘടകമാവും. ഉദാഹരണം നിങ്ങള്‍ ഭാവന വായ്പ എടുക്കുമ്പോള്‍, വാഹന വായ്പ എടുക്കുമ്പോള്‍ , വിദ്യാഭ്യാസ വായ്പകള്‍ എടുക്കുമ്പോള്‍ ബാങ്ക് നിങ്ങള്‍ക്ക് പണം തരുന്നു. അത് പല രൂപത്തില്‍ ആവാം. ചെക്ക്, ക്യാഷ്, ഡിഡി , ഓണ്‍ലൈന്‍ ട്രാന്‍സ്ഫര്‍ etc . ഈ വായ്പകളില്‍ പണം നേരിട്ട് പലരൂപത്തില്‍ ക്രയവിക്രയത്തില്‍ ഉണ്ടാവും. പിന്നെ ഉള്ളത് Non Funded faciltiy ആണ്. അതില്‍ പണം ഒരു ഘടകമാവുന്നില്ല. നിങ്ങള്‍ക്ക് വേണ്ടി ബാങ്ക് ഒരു ബാങ്ക് ഗ്യാരണ്ടി തന്നാല്‍ അതില്‍ പണത്തിന്റെ ഇടപാട് നടക്കുന്നില്ല. ബാങ്ക് നിങ്ങള്‍ക്ക് വേണ്ടി ഒരു ജാമ്യം അല്ലെങ്കില്‍ ഉറപ്പു മറ്റൊരാള്‍ക്ക് നല്‍കുന്നു. നിങ്ങള്‍ പണം തരാത്ത ഒരു സാഹചര്യം ഉണ്ടായാല്‍ മാത്രം ബാങ്ക് പണം കൊടുക്കാനുള്ള ബെനിഫിഷ്യറിക്ക് നല്‍കാം എന്നതാണ് ധാരണ. പണം ഇല്ലാത്തത് കൊണ്ട് അതിനു പലിശ ഇല്ല പക്ഷെ നിശ്ചിത തുകക്ക് ബാങ്ക് ബാങ്കിന്റെ കണക്ക് അനുസരിച്ചു പണം ചാര്‍ജായി ഈടാക്കും.. നോണ്‍ ഫണ്ടഡ് ലിമിറ്റ് പല തരത്തില്‍ ഉണ്ട് .. ബാങ്ക് ഗ്യാരണ്ടി , ലെറ്റര്‍ ഓഫ് ക്രെഡിറ്റ് (LC), Letter of Understanding (LOU) , Letter of Comfort (LOC )etc .

ഇറക്കുമതി ഇടപാടുകളില്‍ ചില അനിശ്ചിതത്വം ഉണ്ടാവുക പതിവാണ്. അതായത് ഇറക്കുമതി ചെയ്യുന്ന ആള്‍ (IMPORTER ) പണം കൊടുത്തിട്ടു വിദേശത്തു ഉള്ള കച്ചവടക്കാരന്‍ (EXPORTER ) സാധനം നല്‍കിയില്ല എങ്കില്‍ എന്ത് ചെയ്യും. അത് പോലെ തന്നെ വിദേശത്തു ഉള്ള EXPORTER ഉം ചിന്തിക്കും. ഞാന്‍ സാധനം കൊടുത്തു, മറ്റേ ആള്‍ പണം നല്‍കിയില്ല എങ്കില്‍ ഞാന്‍ എന്ത് ചെയ്യും. അവിടെ ആണ് ബാങ്കുകള്‍ ഇടപെടുന്നത്. ഇറക്കുമതി ചെയ്യുന്ന ആളുടെ (നീരവ് മോഡി IMPORTER ) ഭാഗത്തു നിന്ന് പണത്തിനു ഇന്ത്യയിലെ ബാങ്ക് (PNB ) ഉറപ്പു കൊടുക്കുന്നു. ആ പണം സാധനങ്ങള്‍ കയറ്റുമതി ചെയ്തു എന്ന് ഡോക്കുമെന്റ്‌സ് നോക്കി ഉറപ്പു വരുത്തി മാത്രമേ കയറ്റുമതിക്കാരന് നല്‍കൂ എന്ന് അയാളുടെ ബാങ്കും അങ്ങോട്ടും ഇങ്ങോട്ടും ഉറപ്പു കൊടുക്കുന്നു. ഇപ്പോള്‍ പണത്തിനും കയറ്റുമതിക്കും അവിടെയും ഇവിടെയും ഉള്ള ബാങ്കുകള്‍ ഉറപ്പു തന്നു കഴിഞ്ഞു. ഇനി സാധനം കയറ്റി അയച്ച ശേഷം ആ വിവരം വിദേശത്തുള്ള ബാങ്ക് ഇറക്കുമതി ചെയ്യുന്ന ആളുടെ ബാങ്കിനെ അറിയിച്ചു കഴിഞ്ഞാല്‍, നേരത്തെ കൊടുത്ത ഉറപ്പിന്മേല്‍ ഇറക്കുമതി ചെയ്യുന്ന ആളുടെ കയ്യില്‍ നിന്ന് പണം എടുത്തു പറഞ്ഞ സമയത്തിനുള്ളില്‍ ഇന്ത്യയിലെ ബാങ്ക് വിദേശ ബാങ്കിന് കൈമാറും..

ഇനി ഇറക്കുമതി ചെയ്യുന്ന ആളുടെ കയ്യില്‍ ഉടനെ പണം ഇല്ല കൊടുക്കാന്‍ എന്ന് കരുതുക. അപ്പോള്‍ അയാളുടെ ബാങ്ക്( PNB )എന്ത് ചെയ്യും, ഒന്നുകില്‍ പണമായി കസ്റ്റമറിന് പേയ്‌മെന്റ് നടത്താന്‍ ലോണ്‍ കൊടുക്കും. അല്ലെങ്കില്‍ ബാങ്ക് (PNB ) കസ്റ്റമറിന് (നീരവ് മോദി ) വേണ്ടി ഒരു LOU ഇഷ്യൂ ചെയ്യും. ആ LOU ഉപയോഗിച്ച് ഇന്ത്യന്‍ ബാങ്കുകളുടെ വിദേശ ശാഖകളില്‍ നിന്ന് നിങ്ങള്‍ക്ക് ഇന്ത്യയേക്കാള്‍ വളരെ വളരെ കുറഞ്ഞ നിരക്കില്‍ പണം ലഭിക്കും (BUYERS CREDIT ).. LOU കൊടുക്കുന്നതിന് മുന്‍പ് ഇന്ത്യയിലെ ബാങ്ക് കസ്റ്റമറുടെ പേരില്‍ ഉള്ള വസ്തുവകകളോ , തത്തുല്യം ആയ നിക്ഷേപമോ മറ്റോ ഉറപ്പു വരുത്തും. LOU കൈപ്പറ്റിയ ബാങ്ക് കരാര്‍ പ്രകാരം ഇറക്കുമതിക്കാരന്റെ ബാങ്കിന്റെ നോസ്‌ട്രോ അക്കൗണ്ടിലേക്ക് LOU വില്‍ പറയുന്ന പണം അയച്ചു കൊടുക്കും. പിന്നീട് അയാള്‍ അത് നേരത്തെ ഉള്ള കരാര്‍ അനുസരിച്ചു കയറ്റുമതി ചെയ്ത ആളുടെ ബാങ്കിന് കൊടുത്തു അവരും ആയുള്ള പരിപാടി അവസാനിപ്പിക്കും. ഇനി ഉള്ള കടം ബാങ്കിന്റെ LOU പ്രകാരം ലോണ്‍ എടുത്ത ഇന്ത്യന്‍ ബാങ്കിന്റെ വിദേശ ശാഖയുമായുള്ള കടം ആണ്.. അത് 30 ദിവസം മുതല്‍ 3 വര്‍ഷം വരെ ലഭിക്കും തിരിച്ചടവിന് . അപ്പോള്‍ ഇറക്കുമതിക്കാരന്‍ ആ പണം സമയത്തിനുള്ളില്‍ വിദേശത്തുള്ള ബാങ്ക് ശാഖക്ക് പറഞ്ഞ സമയത്തു തിരിച്ചു കൊടുക്കാന്‍ ബാധ്യസ്ഥന്‍ ആണ്. ആ വിദേശ ബാങ്കിന്റെ ശാഖക്ക് ഗ്യാരണ്ടി കൊടുത്തിരിക്കുന്നത് ഇറക്കുമതിക്കാരന്റെ ഇന്ത്യയിലുള്ള ബാങ്കാണ് (PNB ). അയാള്‍ തിരിച്ചു അടച്ചില്ല എങ്കില്‍ LOU പ്രകാരം ബാങ്ക് സ്വന്തം കയ്യില്‍ നിന്ന് എടുത്തു കൊടുക്കും എന്നാണ് LOU വ്യവസ്ഥ.. അങ്ങനെ ഒരു സാഹചര്യം ഉണ്ടായാല്‍ ഇന്ത്യയിലെ ബാങ്ക് പറഞ്ഞ സമയത്തു തന്നെ കരാര്‍ അനുസരിച്ചു പേയ്‌മെന്റ് കൊടുക്കും. പിന്നീട് ഇറക്കുമതിക്കാരന്റെ ബാങ്ക് LOU കൊടുക്കുന്നതിനു മുന്നേ സെക്യൂരിറ്റി ആയി വാങ്ങിയ വസ്തുവോ , നിക്ഷേപമോ പണമാക്കി നഷ്ടം ഇല്ലാത്ത സാഹചര്യം ഉണ്ടാക്കും. ഈ പറഞ്ഞ സെക്യൂരിറ്റിയും മാര്‍ജിന്‍ തുകയും (10% മുതല്‍ 100%) വരവ് വച്ച ശേഷമേ ബാങ്കുകള്‍ സാധാരണ നിലക്ക് LOU ഇഷ്യൂ ചെയ്യൂ. പക്ഷെ നീരവ് മോദിയുടെ പക്കല്‍ നിന്നും PNB മാനേജര്‍മാരായ ഗോകുല്‍ ഷെട്ടിയും കാരാട്ടും ഇത് രണ്ടും ഉറപ്പു വരുത്തിയില്ല. 2010 മുതല്‍ തുടര്‍ന്ന് പോന്ന ഈ കള്ളത്തരം ഗോകുല്‍നാഥ് ഷെട്ടി റിട്ടയര്‍ ചെയ്ത ശേഷം ഈ കഴിഞ്ഞ 2018 ജനുവരി 16 നു പുതുതായി വന്ന മാനേജര്‍ ആണ് കണ്ടെത്തിയത്. യാതൊരു വിധ സെക്യൂരിറ്റിയും ഇല്ലാത്ത LOU തുറക്കാന്‍ വന്ന നീരവ് മോദിയുടെ കമ്പനിയോട് 100% ഡെപോസിറ്റില്‍ മാത്രമേ LOU തരാന്‍ സാധിക്കൂ എന്ന് മാനേജര്‍ വ്യക്തമാക്കി. കഴിഞ്ഞ 7 വര്‍ഷമായി തുടര്‍ന്ന് പോകുന്ന ഇടപാട് അവിടെ പൊളിഞ്ഞു വീണു.

ബോംബെ PNB യില്‍ നടന്ന സംഭവം 

നീരവ് മോഡി PNB ബാങ്കില്‍ യാതൊരു വിധത്തില്‍ ഉള്ള സെക്യൂരിറ്റിയും ഇല്ലാതെ അനവധി LOU കള്‍ സംഘടിപ്പിച്ചു. അതെങ്ങനെ സാധിക്കും.? ഇത്ര വലിയ തുകക്കുള്ള LOU കൊടുക്കുമ്പോള്‍ ബാങ്ക് സെക്യൂരിറ്റി ഉറപ്പു വരുത്തില്ലേ.? 4 ലക്ഷം രൂപക്ക് മുകളില്‍ വിദ്യാഭ്യാസ വായ്പക്ക് സെക്യൂരിറ്റി ചോദിക്കുന്ന ബാങ്ക് നീരവിന്റെ കയ്യില്‍ നിന്ന് സെക്യൂരിറ്റി വാങ്ങാതെ ഇരിക്കുമോ ? അത് എങ്ങനെ സാധിച്ചു . അതറിയണം എങ്കില്‍ എങ്ങനെ ആണ് ബാങ്കുകള്‍ സന്ദേശങ്ങള്‍ കൈമാറുന്നത്, അന്താരഷ്ട്ര തലത്തില്‍ പണം കൈമാറ്റം എങ്ങനെ ആണ് എന്നറിയണം..

മാധ്യമങ്ങള്‍ പറയുന്നത് പോലെ PNB ബാങ്കില്‍ നിന്ന് അഞ്ചാറ് A4 ഷീറ്റില്‍ പ്രിന്റ് ചെയ്തു കൊടുക്കുന്ന സര്‍ട്ടിഫിക്കറ്റൊ, അതിന്റെ ഫോട്ടോസ്റ്റാറ്റ് എടുത്തു എല്ലാ ബാങ്കിലും കൊടുത്തു പണം തട്ടാന്‍ പറ്റിയ സാധനം അല്ല വിദേശത്തേക്കു ഇഷ്യൂ ചെയ്യുന്ന ബാങ്കുകളുടെ LOU. വിദേശ ബാങ്കുകള്‍ക്ക് ഇന്ത്യന്‍ ബാങ്കുകള്‍ കൊടുക്കുന്ന LOU ഫിസിക്കല്‍ ഫോമിലേ അല്ല, അത് ഒരു ഡിജിറ്റല്‍ സെക്യൂര്‍ഡ് കണ്ടന്റ് ആണ്. ഇമെയില്‍ ഒക്കെ പോലെ പക്ഷെ ഒരു ഒഫീഷ്യല്‍ ബാങ്കിങ് കമ്മ്യൂണിക്കേഷന്‍ സംവിധാനം ആണെന്ന് മാത്രം. അന്താരാഷ്ട്ര തലത്തില്‍ ബാങ്കുകള്‍ സന്ദേശം കൈമാറുന്ന ഏറ്റവും സുരക്ഷിതമായ ഉപാധി ആണ് SWIFT മെസേജിങ് സിസ്റ്റം (SWIFT (Socitey for Worldwide Interbank Financial Telecommunication) ). നമ്മള്‍ സാധാരണ ഉപയോഗിക്കുന്ന ഇന്ത്യന്‍ ബാങ്കുകളുടെ IFSC കോഡ് പോലെ അന്താരാഷ്ട്ര തലത്തില്‍ ബാങ്കുകള്‍ക്ക് യൂണീക്ക് ആയ SWIFT കോഡുകള്‍ ഉണ്ട്. ഓരോ SWIFT കോഡും ഓരോ ബാങ്കുകളെ ആണ് കാണിക്കുന്നത്. ഈ SWIFT സംവിധാനത്തില്‍ കൂടി ബാങ്കുകള്‍ അങ്ങോട്ടും ഇങ്ങോട്ടും അയക്കുന്ന സന്ദേശങ്ങള്‍ മറ്റു വിദേശ ബാങ്കുകള്‍ സ്വീകരിച്ചു അതനുസരിച്ചു പ്രവര്‍ത്തിക്കും. PNB ബാങ്കിലെ സ്റ്റാഫ് ആയ ഗോകുല്‍നാഥ് ഷെട്ടിക്കും കൂടെ ഉള്ള കാരാട്ട് എന്ന ആള്‍ക്കും SWIFT സംവിധാനത്തിലേക്ക് ആക്‌സസ് ഉണ്ട്. അവര്‍ SWIFT മെസേജിങ് ഉപയോഗിച്ച് നീരവ് മോഡിക്ക് വേണ്ടി ബയേഴ്‌സ് ക്രെഡിറ്റ് കൊടുക്കാന്‍ ആയി വിദേശത്തുള്ള ഇന്ത്യന്‍ ബാങ്കുകളുടെ ശാഖകളിലേക്ക് സന്ദേശങ്ങള്‍ അയച്ചു. SECURED സന്ദേശങ്ങള്‍ ആയതു കൊണ്ട് വിദേശത്തുള്ള ബാങ്ക് പണം അയച്ചു കൊടുത്തു കൊണ്ടിരുന്നു. നീരവ് മോഡി ആ പണം കൊണ്ട് സ്വര്‍ണ്ണവും രത്‌നവും മുത്തും പവിഴവും ഒക്കെ ഇറക്കുമതി ചെയ്തു കച്ചവടം ചെയ്തു കൊണ്ടിരുന്നു. ഈ തട്ടിപ്പ് തുടങ്ങുന്നത് 2010 2011 കാലഘട്ടത്തില്‍ ആണ്. 2013 ല്‍ നീരവ് മോഡി ഫോബ്‌സിന്റെ ഇന്ത്യയിലെ പണക്കാരുടെ പട്ടികയില്‍ സ്ഥാനം പിടിക്കുകയും ചെയ്തു. വെറും രണ്ടു പേര് ചേര്‍ന്ന് ഇത് ചെയ്യാന്‍ പറ്റുമോ എന്ന് അദ്ഭുതപ്പെടാന്‍ വരട്ടെ . PNB ബാങ്കിലെ DUE DELIGENCE സംവിധാനത്തിന്‍ന്റെ പരാജയം കാരണം ആണ് ഇത് സംഭവിച്ചത്. ഓരോ പഴയ LOU ഡ്യൂ ഡേറ്റ് കഴിഞ്ഞു EXPIRE ആവുമ്പോള്‍ പുതിയ ഒരു LOU തുറന്നു പഴയവ ക്‌ളോസ് ചെയ്തു കളയുന്നു. അതിനാല്‍ തന്നെ ലോങ്ങ് പെന്‍ഡിങ് ആയോ ലോങ്ങ് ഔട്!സ്റ്റാന്‍ഡിങ് ആയോ ബില്ലുകള്‍ കാണില്ല. കൂടാതെ LOU ഒരു നോണ്‍ ഫണ്ടഡ് ലിമിറ്റ് ആയതു കൊണ്ട് നേരിട്ട് ബാങ്കിന്റെ ബിസിനസ്സ് ബാലന്‍സ് ഷീറ്റില്‍ കാണിക്കുകയും ഇല്ല… അങ്ങനെ വരുമ്പോള്‍ കോടിക്കണക്കിനു രൂപ ഇങ്ങനെ പെരുകുന്നത് ബാങ്കിന്റെ ശ്രദ്ധയില്‍ പെട്ടില്ല.. .PNB യുടെ ബാങ്കിങ് സംവിധാനത്തിലെ പാളിച്ചകള്‍ തന്നെയാണ് യഥാര്‍ത്ഥ കാരണം.. …

RBI നിഷ്‌കര്‍ഷിക്കുന്ന ഓഡിറ്റിങ് പാറ്റേണ്‍ എല്ലാ ബാങ്കുകളും പിന്തുടരാന്‍ ബാധ്യസ്തര്‍ ആണ് എല്ലാവര്‍ഷവും എല്ലാ ബാങ്ക് ശാഖയും റെഗുലര്‍ ഓഡിറ്റിങ്ങിനു വിധേയമാക്കും. പുറത്തു നിന്ന് റാന്‍ഡം ആയി തെരഞ്ഞെടുക്കുന്ന ഒരു ചാര്‍ട്ടേര്‍ഡ് അക്കൗണ്ടന്റ് സ്ഥാപനം ആവും അത് ചെയ്യുക. കൂടാതെ ഫോറിന്‍ എക്‌സ്‌ചേഞ്ച് ഇടപാടുകള്‍ ഉള്ള ബ്രാഞ്ച് ശാഖയില്‍ തീര്‍ച്ചയായും എല്ലാ മാസവും മുടങ്ങാതെ നടക്കുന്ന കണ്‍കറന്റ് ഓഡിറ്ററും ഉണ്ടാവും. ഇത് കൂടാതെ എല്ലാവര്‍ഷവും ബാങ്കിന്റെ ഭാഗത്തു നിന്ന് കടു കട്ടിയായ ജനറല്‍ ഇന്‍സ്‌പെക്ഷന്‍ ഉണ്ടാവും. അത് കൂടാതെ ഫോറിന്‍ എക്‌സ്‌ചേഞ്ചിന് വേണ്ടി സ്‌പെഷ്യല്‍ FOREX ഓഡിറ്റ്, വലിയ ലോണുകള്‍ ഉള്ള ബ്രാഞ്ചുകളില്‍ സ്‌പെഷ്യല്‍ ക്രെഡിറ്റ് ഓഡിറ്റ്, ലീഗല്‍ ഓഡിറ്റ്എന്നിവ ഉണ്ടാവും. ഇതൊന്നും കൂടാതെ എപ്പോള്‍ വേണമെങ്കിലും കയറി വരാവുന്ന അപ്രതീക്ഷിതമായ സാക്ഷാല്‍ റിസര്‍വ്വ് ബാങ്കിന്റെ ഓഡിറ്റും ഉണ്ടാകാം.RBI ഓഡിറ്റ് ഒഴിച്ച് ബാക്കി നടക്കുന്ന എല്ലാ ഓഡിറ്റില്‍ ഒന്നില്‍ പോലും 2010 മുതല്‍ തുടര്‍ച്ചയായി നടന്നു വരുന്ന ഈ തട്ടിപ്പ് പിടിക്കപ്പെടാത്തത് PNB യുടെ മാത്രം പിടിപ്പ് കേടാണ്. മറ്റൊരു കാരണവും അതിനു ബദലായി പറയാനാവില്ല.., PNB യുടെ സിസ്റ്റം കുറ്റമറ്റതല്ല എന്നതാണ് കാരണം.
LOU ഇഷ്യൂ ചെയ്യുന്ന വിവരം വിദേശ ബാങ്കുകളിലേക്ക് അറിയിക്കുന്നത് SWIFT സംവിധാനം വഴി ആണെന്ന് പറഞ്ഞല്ലോ. ഈ SWIFT മെസേജ് സംവിധാനം കസ്റ്റമറുമായി നേരിട്ട് ബന്ധം ഉള്ള ഒരേ ബ്രാഞ്ചിലെ കേവലം 2 ആളുകളുടെ മാത്രം കയ്യില്‍ ആയി പോയതാണ് ആദ്യ തെറ്റ്. കസ്റ്റമറുടെ കയ്യില്‍ നിന്നും ബാങ്ക് നിയമപ്രകാരം വാങ്ങേണ്ട എല്ലാ കാര്യങ്ങളും അതിന്റെ ഡ്യൂ ഡെലിജെന്‍സ് എല്ലാം ഈ രണ്ടു പേരുടെ മാത്രം ഉത്തരവാദിത്വം ആയതാണ് കാര്യങ്ങള്‍ എളുപ്പം ആക്കിയത്. ഇവരെ ആകട്ടെ നിയമം മറികടന്നു 7 വര്‍ഷമായി ട്രാന്‍സ്ഫര്‍ ചെയ്തിട്ടേ ഇല്ല. സാധാരണ ഇത്തരം പോര്‍ട്ട് ഫോളിയോ കൈകാര്യം ചെയ്യുന്ന ആളുകളെ ഒരേ ബ്രാഞ്ചില്‍ 3 വര്‍ഷത്തില്‍ കൂടുതല്‍ ഒരു ബാങ്കും ഇരുത്തുക പതിവില്ല. പക്ഷെ ഇവിടെ അതും നടന്നു എന്നതാണ് രസകരം.

മറ്റൊരു ബാങ്കില്‍ ഈ ഇടപാട് എങ്ങനെ നടക്കും എന്ന് നോക്കാം… കസ്റ്റമര്‍ LOU തുറക്കാന്‍ ആയി എത്തുന്നു. ബ്രാഞ്ചിലെ ബാങ്ക് അധികൃതര്‍ അതിന്റെ നിയമവശങ്ങള്‍ പൂര്‍ത്തിയാക്കി വേണ്ട സെക്യൂരിറ്റിയും മാര്‍ജിന്‍ മണിയും ഉറപ്പു വരുത്തി LOU ഓപ്പണ്‍ ചെയ്യാനും SWIFT മെസേജ് അയക്കാനും അവരുടെ CENTRALISED ബാക്ക് ഓഫീസിലേക്ക് ഫോര്‍വേഡ് ചെയ്യുന്നു. ഫോറിന്‍ എക്‌ചേഞ്ച് ബാക്ക് ഒഫീസില്‍ ഉള്ളവര്‍ ബ്രാഞ്ചില്‍ നിന്ന് അയച്ച വിവരങ്ങള്‍ ശരിയാണോ എന്ന് കോര്‍ ബാങ്കിങ് സിസ്റ്റത്തില്‍ പരിശോധിക്കുന്നു. സെക്യൂരിറ്റി ഐഡി പരിശോധിക്കും, മാര്‍ജിന്‍ ഡെപ്പോസിറ്റ് ഉറപ്പു വരുത്തും. എന്നിട്ട് എല്ലാ കാര്യങ്ങളും ഉറപ്പു വരുത്തിയതിനു ശേഷം മാത്രമേ LOU ഇഷ്യൂ ചെയ്തു കൊണ്ട് SWIFT മെസേജ് വിദേശത്തേക്ക് അയക്കുകയുള്ളൂ. ബാക്ക് ഓഫീസില്‍ ലഭിക്കുന്ന ഫയലുകള്‍ അവിടെ ഉള്ള അനേകം പേര്‍ക്ക് റാന്‍ഡം ആയി ആണ് കിട്ടുന്നത്. അതായത് ഇന്ന് ഒരു ബ്രാഞ്ചിന്റെ ഇടപാട് ചെയ്ത ആള്‍ ആയിരിക്കില്ല നാളെ ചെയ്യുക. അത് മാത്രമല്ല ബാക്ക് ഓഫീസിലെ ജീവനക്കാര്‍ക്ക് കസ്റ്റമേഴ്‌സുമായി ഒരു സ്ഥലത്തും നേരിട്ട് ബന്ധം വരുന്നേ ഇല്ല. അപ്പോള്‍ അവരുടെ അറിവോ ചെക്കിങ്ങോ ഇല്ലാതെ ഒരു തെറ്റായ ഫോറിന്‍ എക്‌ചേഞ്ച് ഇടപാടും സംഭവിക്കില്ല. ഇനി തെറ്റ് പറ്റിയാല്‍ പോലും മള്‍ട്ടിപ്പിള്‍ ചെക്കുകള്‍ ഉള്ളത് കൊണ്ട് ഏതെങ്കിലും ഒരു പോയിന്റില്‍ അത് പിടിക്കും. മാത്രമല്ല ഇതെല്ലം വേറെ വേറെ സംസ്ഥാനങ്ങളില്‍ തന്നെ വേറെ വേറെ പ്രവര്‍ത്തിക്കുന്ന ഡിപ്പാര്‍ട്ട്‌മെന്റുകള്‍ ആയതു കൊണ്ട് രണ്ടിടത്തും രണ്ടു സമയത്തു ഇന്‌സ്‌പെക്ഷനും ഓഡിറ്റും എല്ലാം നടക്കും. ബ്രാഞ്ചില്‍ ഉള്ളവര്‍ക്ക് ബാക്ക് ഓഫീസിലും ബാക്ക് ഓഫീസില്‍ ഉള്ളവര്‍ക്ക് ബ്രാഞ്ചിലെ കാര്യങ്ങളിലും ഒരു വിധത്തിലും സ്വാധീനം ചെലുത്താന്‍ സാധിക്കില്ല.. എന്നിരുന്നാലും കഴിഞ്ഞ 7 വര്‍ഷമായി ഇത്തരം ഒരുവലിയ തുകയുടെ ഫ്രോഡ് നടന്നിട്ടും മാനേജ്!മെന്റ് തലത്തിലോ റീജിയണല്‍ സോണല്‍ തലത്തിലോ ഒരു കുഞ്ഞു പോലും ഇതൊന്നും കണ്ടു പിടിച്ചില്ല എന്നതും സംശയം ഉളവാക്കുന്നു,. കൂടുതല്‍ PNB അധികൃതര്‍ കുടുങ്ങിയാലും അദ്ഭുതപ്പെടേണ്ട ആവശ്യമില്ല.. ഇന്ത്യയിലെ ഏതാണ്ട് 90% ബാങ്കുകളിലും ഇത്തരം കൃത്യതയാര്‍ന്ന ബാങ്കിങ് സംവിധാനങ്ങള്‍ ഉറപ്പു വരുത്തുമ്പോഴും ഇന്ത്യയിലെ ഏറ്റവും വലിയ അഞ്ചു ബാങ്കുകളില്‍ ഒന്നായ PNB യില്‍ കാര്യങ്ങള്‍ ഇത് പോലെ കുത്തഴിഞ്ഞ രീതിയില്‍ ആണെന്ന് ഉള്ള അറിവ് ഞെട്ടിക്കുന്നു. 90% ബാങ്കുകളും ഡ്യൂ ഡെലിഗെന്‍സും കംപ്ലയന്‍സസും പക്കാ ആക്കി മുന്നോട്ട് പോവുമ്പോള്‍ ഇത്തരം കെടുകാര്യസ്ഥത ബാങ്കിങ് രംഗത്തിന്റെ വിശ്വാസ്യത തകര്‍ക്കും എന്നതില്‍ സംശയം വേണ്ട. PNB യുടെ ക്രെഡിറ്റ് റേറ്റിങ് കുത്തനെ കുറക്കാന്‍ ഇതില്‍ പരം ഒരു കാരണം വേണ്ട. PNB യുടെ ഷെയര്‍ വില ഇപ്പോഴേ താഴെ പോയി ഏതാണ്ട് 8000 കോടിയുടെ മാര്‍ക്കറ്റ് ക്യാപിറ്റലൈസേഷന്‍ നഷ്ടപ്പെട്ടു കഴിഞ്ഞു 2 ദിവസം കൊണ്ട്.

നിലവില്‍ ഒരു സേവിങ്‌സ് അക്കൗണ്ട് ഓപ്പണ്‍ ചെയ്യാന്‍ പോലും ഇത്തരം കേന്ദ്രീകൃത ബാക്ക് ഓഫീസുകള്‍ ആണ് ഒരു വിധം എല്ലാ ബാങ്കുകളിലും പ്രവര്‍ത്തിക്കുന്നത്. മിക്കവാറും ബാങ്കുകളില്‍ ഇതെല്ലാം RBI , FEMA ഇടപെടലുകള്‍ മൂലം കഴിഞ്ഞ 4 വര്‍ഷങ്ങള്‍ക്കുള്ളില്‍ ആണ് ഉണ്ടായിട്ടുള്ളത് എന്നതും സത്യമാണ്. ബാങ്കിങ് രംഗത്തു കനത്ത ക്ലെന്‍സിംഗ് നടക്കുന്നത് 2014 ലെ മോഡി സര്‍ക്കാരിന്റെ വരവോടെ ആണ്. AQR അസറ്റ് ക്വാളിറ്റി റിവ്യൂ ഇനി കേന്ദ്ര സര്‍ക്കാര്‍ മുന്നോട്ട് വയ്ക്കുന്ന FRDI ബില്ല് , NPA & STRESSED ASSET MANAGEMENT എല്ലാം ഈ സാമ്പത്തിക രംഗം വൃത്തയാക്കുന്നതിന്റെ ഭാഗം തന്നെയാണ്. UPA സര്‍ക്കാരിന്റെ ഏറ്റവും വലിയ അഴിമതി 2G യും കല്‍ക്കരി കുംഭകോണവും കോമണ്‍വെല്‍ത് അഴിമതിയും ഒന്നുമല്ല ബാങ്കുകളിലെ NPA ക്രമക്കേട് ആണ് എന്ന് മോഡി CA ക്കാരുടെ ഓള്‍ ഇന്ത്യ സമ്മേളനത്തില്‍ പറഞ്ഞത് സത്യമാണെന്നു തെളിവ് സഹിതം പുറത്തു വന്നു കൊണ്ടിരിക്കുന്നു. മുന്‍ കാലങ്ങളില്‍ നടന്ന വലിയ വലിയ ബാങ്കിങ് ഫ്രോഡുകള്‍ ഓരോന്നായി പുറത്തു ചാടുന്നതും അത് കൊണ്ട് തന്നെയാണ്. റെജിസ്ട്രര്‍ ഓഫ് കമ്പനീസില്‍ നിന്ന് ഏതാണ്ട് 4 ലക്ഷം പേപ്പര്‍ കമ്പനികള്‍ ആണ് നോട്ടു നിരോധനത്തിന് ശേഷം കണ്ടെത്തിയത്. അതിലൂടെ നടന്നത് ലക്ഷം കോടിയുടെ ഇടപാടുകളും. കുളം വൃത്തിയാക്കാന്‍ കുളത്തില്‍ ഇറങ്ങുകയേ നിവൃത്തിയുള്ളൂ..

ചരിത്രം കണ്ടതില്‍ വച്ച് ഏറ്റവും വേഗത്തില്‍ ഉള്ള റിക്കവറി നടപടികള്‍ 

ജനുവരി 16 2018 നു ബാങ്കിന്റെ ബ്രഡി ഹൌസ് ശാഖയിലെ ഉദ്യോഗസ്ഥര്‍ക്ക് റിട്ടയര്‍ ആയ ബാങ്ക് ഓഫീസര്‍ ഗോകുല്‍ ഷെട്ടിയും സഹായി കാരാട്ടും ചേര്‍ന്ന് നടത്തിയ ഫ്രോഡിന്റെ തുമ്പു ലഭിക്കുന്നു. പ്രാഥമിക നിഗമന പ്രകാരം ബാങ്ക് 250 കോടിയുടെ ഫ്രോഡ് കേസ് രജിസ്റ്റര്‍ ചെയ്യുന്നു. സംഭവം RBI ക്കും കേന്ദ്ര ധനകാര്യ മണ്ടരാലയത്തിനും ഉടനടി വിവരം ലഭിക്കുന്നു. ജനുവരി അവസാനം സിബിഐ പൂര്‍ണ്ണമായും കേസ് ഏറ്റെടുക്കുന്നു. കൂടെതന്നെ കേന്ദ്ര ധനകാര്യ മന്ത്രാലയത്തിന്റെ കീഴിലെ (ED) എന്‍ഫോഴ്‌സ്‌മെന്റ് സ്‌പെഷ്യല്‍ ടീം രംഗത്തെത്തി. അവരുടെ കൂട്ടായ ഓഡിറ്റിങ്ങില്‍ മൊത്തം ഫ്രോഡ് ഏകദേശം 11,400 കോടി രൂപയാണ് ഉള്ളതെന്നും 30 ബാങ്കുകളെ ഈ ഫ്രോഡ് ബാധിക്കാന്‍ സാധ്യത ഉണ്ടെന്നും വിലയിരുത്തുന്നു. PNB അടക്കമുള്ള 31 ബാങ്കുകളുടെ ബുക്കുകളില്‍ ഫ്രോഡ് റിപ്പോര്‍ട്ടിങ് മൂലം ഉണ്ടാകാന്‍ സാധ്യതയുള്ള ഡബിള്‍ പ്രൊവിഷനിങ് ഒഴിവാക്കാന്‍ കേന്ദ്ര സര്‍ക്കാരും RBI യും PNB യോട് എല്ലാ ക്ലെയിമുകളും സമയാസമയങ്ങളില്‍ വീഴ്ച കൂടാതെ തീര്‍ക്കാന്‍ ആവശ്യപ്പെടുന്നു. അപ്പോള്‍ PNB യുടെ മാത്രം ബുക്കുകളില്‍ ഇത് ഒതുങ്ങി നില്‍ക്കും. ബാങ്ക് ടു ബാങ്ക് കമ്മിറ്റ്‌മെന്റ് എന്ന ബാങ്കുകളുടെ അടിസ്ഥാന തത്വവും പാലിക്കപ്പെടും. ബാങ്കിങ് രംഗത്ത് ബാങ്കുകള്‍ പരസ്പരം സഹകരിക്കാത്ത സ്ഥിതി വന്നാല്‍, പരസ്പരം സഹകരിക്കാതെ സ്ഥിതി വന്നാല്‍ , ഇന്ത്യന്‍ ബാങ്കിങ് രംഗം തകരും എന്ന് മാത്രമല്ല ഇന്ത്യന്‍ സാമ്പത്തിക രംഗവും, സ്റ്റോക്ക് മാര്‍ക്കറ്റുകളും എല്ലാം തകര്‍ന്നു കൂപ്പു കുത്തും. എല്ലാ ക്ലെയിമും വീഴ്ച കൂടാതെ തീര്‍ക്കണം എന്ന് കേന്ദ്ര സര്‍ക്കാര്‍ നിര്‍ദേശം കൊടുത്തത് ഈ തകര്‍ച്ച ഒഴിവാക്കാന്‍ വേണ്ടി ആണ്.

കഴിഞ്ഞ 15 ദിവസത്തിനുള്ളില്‍ സിബിഐ , ED , ആദ്യനികുതി വകുപ്പ് എല്ലാവരും ചേര്‍ന്ന് 11400 കോടിയുടെ ഫ്രോഡില്‍ 10003.39 കോടി രൂപയുടെ സ്റ്റോക്ക്, സ്വത്തു വകകള്‍ കണ്ടു കെട്ടി. അതില്‍ പെട്ടെന്ന് റിയലൈസ് ചെയ്യാന്‍ കഴിയുന്ന സ്വര്‍ണ്ണം , രത്‌നം എന്നിവയുടെ കണക്കു 5100 കോടി രൂപയാണ്. ഇന്ത്യ ഒട്ടാകെയുള്ള നീരവ് മോദിയുടെ സ്ഥാപനങ്ങളില്‍ നിന്ന്, വീടുകള്‍ ബന്ധു ഗൃഹങ്ങള്‍ എന്നിവിടങ്ങളില്‍ നിന്ന് കണക്കില്‍ പെടാത്ത പണം കണ്ടെത്തിയത് 4900 കോടി രൂപയാണ്. ബാക്കി തുക ബാങ്കുകളില്‍ പണമായി സൂക്ഷിച്ചിരിക്കുന്ന എപ്പോള്‍ വേണണെമെങ്കിലും കണ്ടു കെട്ടാവുന്ന നിക്ഷേപം ആണ്. ഇനി കേവലം 1000 ത്തില്‍ ശിഷ്ടം കോടിയുടെ ബാധ്യത ആണ് ഉള്ളത്. സാധാരണ ഗതിയില്‍ ഇത്തരം കേസുകളില്‍ ആദ്യം ഒരു അന്വേഷണം പിന്നെ തെളിവ് ശേഖരിക്കല്‍ പിന്നെ പ്രതികളെ വിസ്തരിക്കല്‍, സാക്ഷികളെ വിസ്തരിക്കല്‍ എല്ലാം കഴിഞ്ഞ ശേഷം റിക്കവറിക്ക് ചെല്ലുമ്പോള്‍ ആട് കിടന്ന ഇടതു പൂട പോലും കാണില്ല എന്ന അവസ്ഥ ആവും ഫലം. നമ്മള്‍ മറക്കരുതാത്ത ഒരു കാര്യം ഉണ്ട്. നിയമത്തിന്റെ എല്ലാ കുരുക്കുകളും തുറക്കുന്ന എല്ലാ ലൂപ്പ് ഹോളുകളും ഉപദേശിക്കുന്ന ഹൈലി പെയ്ഡ് വക്കീല്‍ വവ്വാലുകളെ തീറ്റി പോറ്റുന്ന ആളാണ് നീരവ് മോദി .അത് കൊണ്ട് തന്നെയാണ് 2014 നു മുന്നേ നടന്ന പല നികുതി , റെവന്യൂ വെട്ടിപ്പ് കേസിലും നീരവ് മോഡി പുല്ലു പോലെ ഊരി പോന്നത്. പക്ഷെ അവര്‍ക്കാര്‍ക്കും ഇവിടെ അനങ്ങാന്‍ ഉള്ള ഒരു അവസരം പോലും കിട്ടിയിട്ടില്ല.. 2014 മുന്നേ നീരവ് മോദിയും മല്യയും പോലെ ഉള്ളവരുടെ സ്വര്‍ഗ്ഗം ആയിരുന്നു ഇന്ത്യന്‍ സാമ്പത്തിക ബാങ്കിങ് രംഗം എങ്കില്‍ ഇന്ന് ഇത്തരക്കാര്‍ ഓരോരുത്തരായി പിടിക്കപ്പെടുന്ന കാഴ്ച ആണ് കാണുന്നത്..

മാത്രമല്ല നീരവ് മോഡി , അമ്മാവനും ബിസിനസ്സ് പങ്കാളിയും ആയ മുകുള്‍ ചോക്‌സി , ഭാര്യ ആമി മോഡി , മകന്‍ എന്നിവരുടെ പാസ്സ്‌പോര്‍ട്ടുകള്‍ കേന്ദ്ര വിദേശ കാര്യാ മന്ത്രാലയം റദ്ദ് ചെയ്തു കഴിഞ്ഞു. ഇനി ഈ നാല് പേര് ലോകത്തു ഏതു വിമാനത്താവളത്തില്‍ ഇമിഗ്രെഷന്‍ ചെക്കില്‍ വന്നാലും അപ്പോള്‍ ഇന്ത്യക്ക് വിവരം ലഭിക്കും..

PNB ഫ്രോഡിന്റെ രാഷ്ട്രീയം :

രാജ്യം കത്തുമ്പോള്‍ കഴുക്കോല്‍ ഊരുന്ന പാരമ്പര്യം ആണല്ലോ കോണ്‍ഗ്രസ് പാര്‍ട്ടിക്കും കമ്മ്യൂണിസ്റ്റ് പാര്‍ട്ടിക്കും എല്ലാം ഉള്ളത്. നീരവ് മോഡി യിലെ മോഡി എന്ന ഗുജറാത്തിലെ സര്‍നെയിം വച്ച് ചോട്ടാ മോഡി എന്ന് വിളിച്ചു വിഷയത്തെ ബിജെപി യുമായി ബന്ധപ്പെടുത്താന്‍ ശ്രമിച്ച കോണ്‍ഗ്രസിന് ബൂമറാങ് പോലെ ആയി ഇപ്പോള്‍ PNB ഫ്രോഡ് കേസ്. 2010 മുതല്‍ നടക്കുന്ന നീരവ് മോദിയുടെയും അമ്മാവന്‍ മേഹുല്‍ ചോക്‌സിയുടെയും അനധികൃത സാമ്പത്തിക ഇടപാടുകളെ കുറിച്ചുള്ള വിവരങ്ങള്‍ 2013 സെപ്റ്റംബറില്‍ തന്നെ RBI ക്കു കത്ത് മുഖേനയും ഇമെയില്‍ വഴിയും അറിയിച്ചിരുന്നതിന്റെ തെളിവുകളും ആയി അലഹബാദ് ബാങ്കിന്റെ മുന്‍ ഡയറക്ടര്‍ ദിനേശ് ദുബേ രംഗത്തെത്തിയത് മോദിക്ക് മേല്‍ പഴി ചാരന്‍ നിന്നവര്‍ക്ക് അടിയായി.. ഇന്നത്തെ സോഷ്യല്‍ മീഡിയ യുഗത്തിലും , ഇന്റര്‍നെറ്റില്‍ സത്യം അറിയാന്‍ ഒരു വിരല്‍ സ്പര്ശം മതി എന്നതും വിനയായി…പല ബാങ്കുകളും ബാങ്ക് അധികൃതരും സര്‍ക്കാര്‍ ലോബിയും ചേര്‍ന്ന് വിജയ് മല്യ നടത്തിയ മുഴുവന്‍ അനധികൃത സാമ്പത്തിക ഇടപാടുകളും നടന്നത് UPA സര്‍ക്കാരിന്റെ ഭരണ കാലത്താണല്ലോ. പിന്നീട് ബിജെപി സര്‍ക്കാര്‍ വന്നതോടെ മല്ല്യയ്ക്ക് പിടിച്ചു നില്‍പ്പ് അസാധ്യമായി. അത് പോലെ തന്നെ അലഹബാദ് ബാങ്ക് മുന്‍ ഡയറക്ടര്‍ ദിനേശ് ദുബൈക്കും ഉണ്ടായതായി അദ്ദേഹം പറഞ്ഞു. നീരവ് മോദിക്ക് ഒപ്പം കൂട്ട് പ്രതിയായ അമ്മാവന്‍ മുകുള്‍ ചോക്‌സിക്ക് ലോണ്‍ കൊടുക്കാന്‍ സര്‍ക്കാര്‍ ബാങ്കായ അലഹബാദ് ബാങ്കില്‍ സമ്മര്‍ദ്ദം ചെലുത്തിയതിനെ തുടര്‍ന്നാണ് ദിനേശ് ദുബെ സ്ഥാനം ഒഴിഞ്ഞത് എന്ന് അദ്ദേഹം പറഞ്ഞു. ഇത്തരത്തില്‍ ബാങ്ക് ഉന്നത അധികാരികളും ആയി ചേര്‍ന്നാണല്ലോ UPA കാലഘട്ടത്തില്‍ മല്യയും ലോണ്‍ നേടിയത്. പിന്നീട് SBI യുടെയും IDBI യുടെയും ഉന്നത അധികാരികളെ തന്നെ അന്വേഷണം നടത്തി പുറത്താക്കുകയുണ്ടായല്ലോ.. ദുബെ പറഞ്ഞ കാര്യങ്ങള്‍ സാധൂകരിക്കുന്ന തെളിവുകള്‍ ആണ് ഇതെല്ലാം ..

ദാവോസില്‍ പ്രധാനമന്ത്രി മോദിക്കൊപ്പം നീരവ് മോഡി :

ദാവോസിലെ വേള്‍ഡ് ഇക്കണോമിക് ഫോറത്തില്‍ പ്രധാനമന്ത്രി മോദിയുടെ ഒപ്പം 50 പേരില്‍ ഒരാളായി നിന്നെടുത്ത ഫോട്ടോ കാണിച്ചു കൊണ്ട് നീരവ് മോദിയെനരേന്ദ്ര മോദിയുടെ കയ്യാളാക്കാന്‍ ശ്രമിച്ച കോണ്‍ഗ്രസ് മണിക്കൂറുകള്‍ക്കുള്ളില്‍ നാറി നാണം കെട്ടു. ദാവോസില്‍ നടന്ന സാമ്പത്തിക ഫോറം മീറ്റിങ്ങില്‍ ലോകം മുഴുവന്‍ ജ്വല്ലറികള്‍ ഉള്ള നീരവ് മോഡിക്ക് ഏതാനും ഡോളറുകള്‍ നല്‍കി ഒരു രജിസ്‌ട്രേഷന്‍ എടുത്തു ഉള്ളില്‍ കയറാന്‍ എന്ത് ബുദ്ധിമുട്ടാണ് ആണ് ഉണ്ടാവുക. അത് മാത്രമല്ല ദാവോസിലെ സാമ്പത്തിക ഫോറം മീറ്റിങ് നടത്തിയ വേള്‍ഡ് ഇക്കണോമിക് ഫോറത്തിന്റെ അസ്സോസിയേറ്റ് സ്ഥാപനം ആയ ഷ്വാബ് ഫൗണ്ടേഷന്റെ പാര്‍ട്ണര്‍ ആണ് നീരവ് മോഡിയുടെ സ്വന്തം സ്ഥാപനം ആയ ഫയര്‍ സ്റ്റാര്‍ ഡയമണ്ട് (FIRESTAR DIAMOND ). നീരവ് മോദിയുടെ രത്‌നത്തിന്റെ ആവശ്യക്കാര്‍ യൂറോപ്പിലും ഗള്‍ഫിലും അമേരിക്കയിലും ചൈനയിലും എല്ലാം ഉണ്ട്. എന്തിനേറെ അമേരിക്കന്‍ സായുധ സൈന്യം വരെ നീരവ് മോദിയുടെ കസ്റ്റമര്‍ ആണ്.. അങ്ങനെ ഉള്ള ആള്‍ക്ക് ആണോ ദാവോസില്‍ WEF ന്റെ ഒരു പരിപാടിക്ക് ബിസിനസ്സ് പ്രമുഖന്‍ എന്ന നിലക്ക് ഔദ്യോഗിക ക്ഷണം ലഭിക്കാന്‍ ബുദ്ധിമുട്ട് .കഷ്ടം തന്നെ മാധ്യമ രാഷ്ട്രീയ മുതലെടുപ്പ്കാരെ… നരേന്ദ്ര മോഡി എവിടെ ഔദ്യോഗിക യാത്ര പോയാലും അദ്ദേഹത്തെ അനുഗമിക്കുന്ന PMO യിലെ 10 അംഗങ്ങളും, സെക്യൂരിറ്റി സ്റ്റാഫും , സര്‍ക്കാരിന്റെ പ്രത്ത്യേക പ്രതിനിധികളായ സര്‍ക്കാര്‍ ഉദ്യോഗസ്ഥരും ഏതാനും ചില മാധ്യമ പ്രവര്‍ത്തകരും ആണ് മോദിയെ അനുഗമിക്കുക.. അല്ലാതെ മോദിയുടെ ടീമില്‍ ഒരിക്കലും ഒരു ബിസിനസ്സുകാരും ഒരു വിദേശ യാത്രക്കും ഉണ്ടാകാറില്ല. അങ്ങനെ ദാവോസിലെ പരിപാടിയ്ക്കിടെ ഇന്ത്യയില്‍ നിന്ന് വന്ന സര്‍ക്കാര്‍ പ്രതിനിധികളും അവിടെ വന്ന എല്ലാ പ്രമുഖ ഇന്ത്യന്‍ ബിസിനസ്സ്‌കാരുടെയും കൂടെ ഒരുമിച്ചുള്ള ഒരു പടം എടുക്കട്ടേ എന്ന് മാധ്യമങ്ങള്‍ ചോദിച്ചപ്പോള്‍ മോഡി ഫോട്ടോക്ക് പോസ്സ് ചെയ്തു എന്ന് മാത്രം. അല്ലാതെ മോദിക്കൊപ്പം നീരവ് മോഡി ഉണ്ടായിരുന്നു എന്നൊക്കെ വെറുതെ പറഞ്ഞു സന്തോഷിക്കാം എന്നല്ലാതെ വേറെ ഒരു ഗുണവും ഉണ്ടാവില്ല.. ഇനി ബാങ്കിങ് രംഗത്ത് നിന്നും ആ ചിത്രത്തില്‍ ICICI ബാങ്ക് CEO ചന്ദ കൊച്ചാര്‍ ഉണ്ടായിരുന്നു, കോട്ടക് ബാങ്കിന്റെ ഉദയ് കോട്ടക് ഉണ്ടായിരുന്നു, യെസ് ബാങ്കിന്റെ റാണ കപൂര്‍ ഉണ്ടായിരുന്നു, SBI യുടെ ചെയര്‍മാന്‍ രജനീഷ് കുമാര്‍ ഉണ്ടായിരുന്നു.. ഇവരൊക്കെയും അപ്പോള്‍ നീരവ് മോദിയുടെ ആളുകള്‍ ആയിരിക്കുമല്ലോ.. അവിടെ നീരവ് മോദിക്കൊപ്പം നില്‍ക്കുന്ന ലക്ഷ്മി മിത്തല്‍ എന്ന ലോകോത്തര ബിസിനസ്സ്മാന്‍ നീരവ് മോദിയുടെ അളിയന്‍ ആവുമല്ലോ അപ്പോള്‍.

ഈ രാഷ്ട്രീയ നാടകം ദാരുണമായി പൊളിഞ്ഞതോടെ കോണ്‍ഗ്രസിന്റെ സുര്‍ജേവാല അടുത്ത ഉണ്ടയില്ല വെടിയുമായി ഇറങ്ങി. 2016 ല്‍ PNB ബാങ്ക് ഫ്രോഡിനെ കുറിച്ച് പ്രധാനമന്ത്രിക്ക് കത്തയച്ചിരുന്നു അത്രേ.പക്ഷെ കത്ത് മോദിയുടെ ഓഫീസ് കാര്യമായി എടുത്തില്ല അത്രേ. ബാംഗ്ലൂരില്‍ ഉള്ള ഹരിപ്രസാദ് എന്നയാളാണ് മോദിക്ക് കത്തയച്ചു PNB ഫ്രോഡിനെ കുറിച്ചു പറഞ്ഞത് എന്നാണ് സുര്‍ജേവാല പറയുന്നത്.. പക്ഷെ ഹരിപ്രസാദിന്റെ കത്ത് പുറത്തു വന്നതോടെ അതും പൊളിഞ്ഞു. ഹരിപ്രസാദ് നീരവ് മോദിയുടെ അമ്മാവന്‍ മുകുള്‍ ചോക്‌സിയുടെ ജ്വല്ലറിയുടെ ഫ്രാഞ്ചൈസി എടുക്കുന്നു. അതിന് പ്രകാരം 10 കോടിയുടെ സ്വര്‍ണ്ണം ഹരിപ്രസാദിന് ചോക്‌സി അമ്മാവന്‍ കൊടുക്കണം. പക്ഷെ കേവലം 5 കോടി രൂപയുടെ സ്വര്‍ണ്ണം മാത്രം കൊടുത്തു ചോക്‌സി അമ്മാവന്‍ ഹരിപ്രസാദിനെ പറ്റിച്ചു. ഈ വിവരം കാണിച്ചു കൊണ്ട് ഹരിപ്രസാദ് പ്രധാനമന്ത്രിക്കും രജിസ്ട്രാര്‍ ഓഫ് കമ്പനീസും , കോര്‍പ്പറേറ്റ് അഫയേഴ്‌സ് മന്ത്രലയത്തിലേക്കും കത്തയച്ചു. ഇത്തരം കാര്യങ്ങളില്‍ നടപടി എടുക്കാന്‍ വേണ്ടിയുള്ള വകുപ്പാണ് രജിസ്ട്രാര്‍ ഓഫ് കമ്പനീസ് അവരുമായി ഉടനെ ബന്ധപ്പെട്ടു പരാതിയുമായി മുന്നോട്ട് പോകാന്‍ PMO യുടെ ഓഫീസില്‍ നിന്ന് മറുപടി ലഭിച്ചു. അല്ലാതെ അതില്‍ ഇപ്പോള്‍ പറയുന്ന PNB ഫ്രോഡ് കേസോ, LOU വച്ചുള്ള തട്ടിപ്പിനെ കുറിച്ചോ ഒരക്ഷരം പറഞ്ഞിട്ടില്ല.. PNB ഫ്രോഡ് ആദ്യമായി പുറത്തു വരുന്നത് ജനുവരി 16 നു ആണ്. എന്നാല്‍ മാസം ഒന്ന് കഴിഞ്ഞപ്പോഴേക്കും നഷ്ടപ്പെട്ട തുകക്കും കുറ്റവാളികള്‍ക്കും എല്ലാം ഉത്തരം കണ്ടെത്തി കഴിഞ്ഞിരിക്കുന്നു.

നാളെ ചുഴലികാറ്റ് വീശിയതിനും , വെള്ളപ്പൊക്കം ഉണ്ടായതിനും , ട്രെയിന്‍ മറിഞ്ഞതിനും മഴ ലഭിക്കാത്തതിനും മീന്‍ കിട്ടാത്തതിനും എല്ലാം നരേന്ദ്ര മോഡി കുറ്റക്കാരന്‍ ആവാന്‍ സാധ്യത ഉണ്ട്. കാരണം മറ്റൊന്നും അല്ല, വേറെ ഒരു കഴമ്പുള്ള ആരോപണമോ, അഴിമതിയോ, പിടിപ്പുകേടോ ആരോപിക്കാന്‍ ഇല്ലാത്തതിന്റെ കെറുവ് ഇങ്ങനെ ഒക്കെ തീര്‍ക്കാന്‍ സാധിക്കൂ. പക്ഷെ ഇറക്കുന്ന ഓരോ ആയുധവും തിരികെ നിറം തലക്ക് തന്നെ കൊള്ളുന്ന ദുര്യോഗം ആണ് കോണ്‍ഗ്രസിന്റെയും കമ്മ്യൂണിസ്റ്റ് പാര്‍ട്ടിയുടെയും. കാരണം അവര്‍ക്ക് എതിരെ നില്‍ക്കുന്നത് നരേന്ദ്ര മോഡിയാണ് എന്നത് കൊണ്ട് തന്നെ… എന്തൊക്കെ വന്നാലും ഇവര്‍ മനസ്സിലാക്കാത്ത ഒരു കാര്യം കൂടി പറഞ്ഞു നിര്‍ത്താം. രാജ്യത്തിന് ഒരു ബുദ്ധിമുട്ട് വരുമ്പോള്‍ അത് പരിഹരിക്കാന്‍ ശ്രമിക്കാതെ പല്ലു സെറ്റ് വച്ച് ചിരിച്ചു കാണിക്കുന്ന ഏര്‍പ്പാട് ജനങ്ങള്‍ക്ക് മനസ്സിലാകുന്നുണ്ട് എന്ന് കോണ്‍ഗ്രെസ്സുകാരനും സഖാക്കളും മനസിലാക്കണം… മനസിലാക്കിയാല്‍ നന്ന്…

.

അഭിപ്രായങ്ങള്‍

Comments are closed, but trackbacks and pingbacks are open.