അഭിമന്യുവധക്കേസിലെ ഒരു കൊലയാളി പോലിസ് പിടിയില്‍. ക്യാമ്പസ് ഫ്രണ്ട്-എസ്ഡിപിഐ പ്രവര്‍ത്തകനായ ആലുവ സ്വദേശി ആദില്‍ ആണ്‌ പോലിസ് പിടിയിലായത്. കുറ്റകൃത്യത്തില്‍ നേരിട്ട് പങ്കെടുത്ത ആളാണ് ആലുവ സ്വദേശിയെന്ന് പോലിസ് പറയുന്നു.ചുവരെഴുത്തിനെ ചൊല്ലിയുള്ള തര്‍ക്കമാണ് കൊലപാതകത്തില്‍ കലാശിച്ചതെന്നാണ് ആദില്‍ പോലിസിന് നല്‍കിയ മൊഴി. എന്ത് വില കൊടുത്തും ചുവരെഴുതനായിരുന്നു തീരുമാനം. അടിച്ചാല്‍ തിരിച്ചടിക്കാനും നിര്‍ദ്ദേശം ഉണ്ടായിരുന്നു. എന്ത് വന്നാലും എസ്എഫ്‌ഐക്ക് വഴങ്ങേണ്ടെന്ന് തീരുമാനിച്ചിരുന്നുവെന്നും ആദില്‍ മൊഴി നല്‍കുന്നു.
അടിച്ചാല്‍ തിരിച്ചടിക്കാന്‍ തന്നെയാണ് തീരുമാനിച്ചിരുന്നത്. അതിനാല്‍ തന്നെ എല്ലാവരും കൈയില്‍ ആയുധങ്ങള്‍ കരുതിയിരുന്നു. സംഭവം നടന്ന ഈ മാസം രണ്ടാം തീയതി പുലര്‍ച്ചെ 12.15ന് മഹാരാജാസ് കോളേജിന്റെ പിന്നിലുള്ള ഗേറ്റിന് സമീപത്തെ ചുവരില്‍ എഴുതാനായാണ് തങ്ങള്‍ എത്തിയത്. ചുമരില്‍ നവാഗതരെ വരവേല്‍ക്കാനായി എസ്.എഫ്.ഐ പ്രവര്‍ത്തകര്‍ ബുക്ക്ഡ് എന്ന് രേഖപ്പെടുത്തിയിരുന്നു. ഇവിടെ കോളേജിലെ കാമ്പസ് ഫ്രണ്ട് പ്രവര്‍ത്തകനും മൂന്നാം വര്‍ഷ അറബിക് ബിരുദ വിദ്യാര്‍ത്ഥിയുമായ വടുതല സ്വദേശി മുഹമ്മദിന്റെ നേതൃത്വത്തില്‍ പോസ്റ്ററൊട്ടിച്ചു. ഇതിനെ എസ്.എഫ്.ഐ പ്രവര്‍ത്തകര്‍ ചോദ്യം ചെയ്തതാണ് സംഘര്‍ഷത്തിനിടയാക്കിയത്. വാക്കുതര്‍ക്കം അവസാനിപ്പിച്ച് മുഹമ്മദിന്റെ നേതൃത്വത്തിലുള്ളവര്‍ മടങ്ങി. പിന്നീട് രാത്രിയില്‍ പത്തിലേറെ ഇരുചക്രവാഹനങ്ങളിലെത്തിയ അക്രമികള്‍ അഭിമന്യുവിനെ അടിച്ചു വീഴ്ത്തിയ ശേഷം കുത്തുകയായിരുന്നു. ഈ അക്രമികള്‍ തന്നെയാണ് അഭിമന്യുവിന്റെ സുഹൃത്ത് അര്‍ജുനെയും കുത്തിയത്. ഇവര്‍ക്ക് കുത്തേറ്റതിന് പിന്നാലെ തങ്ങള്‍ വാഹനത്തില്‍ രക്ഷപെടുകയായിരുന്നെന്നും ആദില്‍ മൊഴി നല്‍കി.
ഇതാദ്യമായാണ് പോലിസ് നേരിട്ട് കൊലയാളികളില്‍ ഒരാളെ പിടികൂടുന്നത്. നേരത്തെ സംഘത്തിലുണ്ടായിരുന്ന മൂനന് പേരെ എസ്എഫ്‌ഐ പ്രവര്‍ത്തകര്‍ പിടികൂടി പോലിസിന് കൈമാറുകയായിരുന്നു.
പ്രതികളില്‍ ചിലര്‍ സംസ്ഥാനം വിട്ടതായും, ചിലര്‍ രാജ്യം വിട്ടതായും പോലിസിന് സംശയം ഉണ്ട്. എന്നാല്‍ നാലംഗം കൊലയാളി സംഘം കേരളത്തില്‍ തന്നെ തുടരുന്നുവെന്ന സൂചനയും പോലിസിന് ലഭിച്ചു. ക്യാമ്പസ് ഫ്രണ്ട് ജില്ല കമ്മറ്റിയംഗമാണ് ഇപ്പോള്‍ പിടിയിലായ ആദില്‍. ഇന്നലെ അനസ് എന്ന ആലുവ സ്വദേശി തിരുവനന്തപുരത്ത് മറ്റൊരു കേസില്‍ പോലിസ് പിടിയിലായിരുന്നു. കേസുമായി ബന്ധപ്പെട്ട് പിടികൂടിയ പോപ്പുലര്‍ ഫ്രണ്ട് സംസ്ഥാന വൈസ് പ്രസിഡണ്ട് നാസറിനെ പോലിസ് ചോദ്യം ചെയ്ത് വരികയാണ്.
Discussion about this post