കണ്ണൂർ: ജോസ് കെ മാണി രാജി വെച്ച രാജ്യസഭാ സീറ്റിലേക്ക് ജോസ് കെ മാണിയെ തന്നെ മത്സരിപ്പിക്കാനുള്ള എൽ ഡി എഫ് തീരുമാനം വന്നതിന് പിന്നാലെ ജോസ് കെ മാണിക്കെതിരായി ദേശാഭിമാനിയിൽ വന്ന പഴയ വാർത്ത കുത്തിപ്പൊക്കി സോഷ്യൽ മീഡിയ. ജോസ് കെ മാണിക്ക് അധികാരത്തോട് ആർത്തിയെന്ന തലക്കെട്ടിൽ പ്രസിദ്ധീകരിച്ച ഇപ്പോഴത്തെ മന്ത്രി വി എൻ വാസവന്റെ പഴയ പ്രസ്താവനയാണ് സാമൂഹിക മാധ്യമങ്ങൾ ഇപ്പോൾ ആഘോഷിക്കുന്നത്. വി എൻ വാസവൻ സിപിഎം ജില്ലാ സെക്രട്ടറിയായിരുന്ന കഴിഞ്ഞ ലോക്സഭാ തെരഞ്ഞെടുപ്പ് കാലത്തെ പത്രമാണിത്.
അന്ന് ലോക്സഭാംഗത്വം രാജിവെച്ച് രാജ്യസഭയിലേക്കുപോയ ജോസ്.കെ.മാണി എം.പിയുടെ നടപടി അധികാരത്തോടുള്ള ആർത്തിയും കച്ചവട രാഷ്്ട്രീയത്തിന്‍റെ ഉദാഹരണവുമാണെന്നായിരുന്നു നിലവിൽ സഹകരണമന്ത്രിയായ വി.എൻ വാസവന്റെ അന്നത്തെ വാക്കുകൾ. സ്വന്തം സ്ഥാനമാനങ്ങൾ സംരക്ഷിക്കാൻ എന്തു നെറികേടും കാട്ടുന്ന ഇത്തരക്കാർ പൊതുപ്രവർത്തകർക്കാകെ അപമാനമാണ്. ഇവർക്കെതിരെ പ്രതികാരത്തോടെ ആഞ്ഞടിക്കുന്ന കൊടുങ്കാറ്റായി മാറാനും വാസവൻ ആഹ്വാനം ചെയ്യുന്നു.
കോട്ടയം ലോക്ഭാ മണ്ഡലത്തെ അനാഥമാക്കിയ ജോസ്.കെ മാണിക്കെതിരെ ഡി.വൈ.എഫ്.ഐ സംഘടിപ്പിച്ച വിചാരണ ഉദ്ഘാടനം ചെയ്യുകയായിരുന്നു വി എൻ വാസവൻ.
Discussion about this post