മുംബൈ: മുംബൈ സ്‌ഫോടന പരമ്പര കേസില്‍ തൂക്കിലേറ്റപ്പെട്ട യാകൂബ് മേമനെ രക്‌സാക്ഷിയായി വാഴ്ത്തിയ ഓള്‍ ഇന്ത്യ മജലിസെ ഇത്തിഹാദുല്‍ മുസ്ലിമീന്‍ (മജ്‌ലിസ് ) പാര്‍ട്ടി നേതാവിനെതിരെ കേസ്. കല്യാണിലെ മജ്‌ലിസ് നേതാവ് ജാവേദ് ഡോണിനെതിരെയാണ് കേസെടുത്തത്.
കല്യാണ്‍ഡോബ്വലി നഗരസഭാ തെരഞ്ഞെടുപ്പ് പ്രചരണത്തിനിടെയാണ് യാകൂബ് മേമനെ രക്തസാക്ഷിയായി ജാവേദ് ഡോണ്‍ വാഴ്ത്തിയത്. മുസ്ലിംകള്‍ക്കു വേണ്ടിയാണ് യാകൂബ് മേമന്‍ രക്തസാക്ഷിയായതെന്നും അതിനാല്‍ മുസ്ലിം പാര്‍ട്ടിയായ മജ്‌ലിസിന് വോട്ട് ചെയ്യണമെന്നും ജാവേദ് ഡോണ്‍ ആവശ്യപെടുകയായിരുന്നു. തെരഞ്ഞെടുപ്പ് ഛട്ടം ലംഘിച്ചതിനും പ്രകോപനപരമായി സംസാരിച്ചതിനുമാണ് കേസെടുത്തതെന്ന് സീനിയര്‍ ഇന്‍സ്‌പെക്ടര്‍ ദിലീപ് സൂര്യവംശി പറഞ്ഞു.
നഗരസഭാ തെരഞ്ഞെടുപ്പില്‍ മജ്‌ലിസിന്റെ ഒമ്പത് സ്ഥാനാര്‍ഥികള്‍ മത്സരിക്കുന്നുണ്ട്. ബുധനാഴ്ച രാത്രി പാര്‍ട്ടി സ്ഥാനാര്‍ഥി ശക്കീലാ ബാനു വിനുവേണ്ടി വോട്ട് ചോദിക്കുന്നതിനിടെയാണ് വിവാദ പരാമര്‍ശം. ഇതിന്റെ വീഡിയോ ദൃശ്യങ്ങള്‍ വയറലായതോടെ രാജ് താക്കറെയുടെ എം.എന്‍.എസ് പരാതിയുമായി രംഗത്തത്തെി.
Discussion about this post