തിരുവനന്തപുരം : നിയുക്ത ഗവർണർ രാജേന്ദ്ര വിശ്വനാഥ് അർലേകർ കേരളത്തിലെത്തി. തിരുവനന്തപുരം വിമാനത്താവളത്തിൽ എത്തിയ അദ്ദേഹത്തെ മുഖ്യമന്ത്രി പിണറായി വിജയനും നിയമസഭ സ്പീക്കർ എഎൻ ഷംസീറും മന്ത്രിമാരും ചേർന്ന് സ്വീകരിച്ചു . മുൻ ഗവർണറായ ആരിഫ് മുഹമ്മദ് ഖാന് പകരമായാണ് രാജേന്ദ്ര വിശ്വനാഥ് ആർലേക്കർ കേരള ഗവർണറായി ചുമതലയേൽക്കുന്നത് .
നാളെ രാവിലെ 10 30 ന് രാജ്ഭവനിൽ അദ്ദേഹം സത്യപ്രതിജ്ഞ ചെയ്യും. ചടങ്ങിൽ ഹൈക്കോടതി ചീഫ് ജസ്റ്റിസ് നിതിൻ മധുകർ ജാംദാർ ഗവർണർക്ക് സത്യവാചകം ചൊല്ലിക്കൊടുക്കും . ഇന്ന് രാവിലെ ഗോവ ഗവർണർ പി എസ് ശ്രീധരൻ പിള്ളയുമായി ഗോവ രാജ്ഭവനിൽ വച്ച് രാജേന്ദ്ര അർലേകർ കൂടിക്കാഴ്ച നടത്തിയിരുന്നു. ഗോവ രാജ്ഭവൻ സന്ദർശിച്ച ആർലേക്കറിനെ പട്ടും പൂമാലയും അണിയിച്ച് മധുരം നൽകിയാണ് ഗോവ ഗവർണർ സ്വാഗതം ചെയ്തത്. കേരള രാജ്ഭവനിലേക്ക് പോകുന്നതിനു മുൻപായി കേരളത്തിൽ നിന്നുമുള്ള പി എസ് ശ്രീധരൻപിള്ളയുമായി കൂടിക്കാഴ്ച നടത്താൻ സാധിച്ചതിൽ സന്തോഷം ഉണ്ടെന്ന് ആർലേക്കർ അറിയിച്ചു. ഗുരുവായൂരപ്പന്റെ ചിത്രവും നിലവിളക്കും സമ്മാനിച്ചു കൊണ്ടാണ് പി എസ് ശ്രീധരൻ പിള്ള ആർലേക്കറിനെ യാത്രയാക്കിയത്.
കേരളത്തിന്റെ 23-ാമത് ഗവണറായാണ് ആർലേക്കർ അധികാരമേൽക്കുന്നത്.
Discussion about this post