‘താനോ തന്റെ ഭര്‍ത്താവോ കൊല്ലപ്പെട്ടാല്‍ എസ്ഡിപിഐ പ്രവര്‍ത്തകരായ ഇവര്‍ക്കായിരിക്കും ഉത്തരവാദിത്തം’ ഹിന്ദു യുവാവിനെ വിവാഹം ചെയ്ത മുസ്ലിം പെണ്‍കുട്ടിയുടെ ഫേസ്ബുക്ക് പോസ്റ്റ്

തിരുവനന്തപുരം: ഹിന്ദു യുവാവിനെ പ്രണയിച്ചു വിവാഹം കഴിച്ചതിന് എസ്ഡിപിഐ പ്രവര്‍ത്തകര്‍ ഭീഷണിപ്പെടുത്തുന്നതായി മുസ്ലിം യുവതിയുടെ ഫേസ്ബുക്ക് പോസ്റ്റ്. കൊല്ലം ജില്ലയിലെ തേവലക്കര സ്വദേശി ജാസ്മി ഇസ്മയില്‍ എന്ന യുവതിയാണ് എസ്ഡിപിഐ പ്രവര്‍ത്തകരുടെ പേരെടുത്തു പറഞ്ഞ് ആരോപണം ഉന്നയിച്ച് ഫേസ്ബുക്കില്‍ പോസ്റ്റ് ഇട്ടിരിക്കുന്നത്. ഡിജിപിക്കുള്ള പരാതിയുടെ ചിത്രങ്ങളും യുവതി പോസ്റ്റ് ചെയ്തിട്ടുണ്ട്.

ഒരു വര്‍ഷമായി പ്രണയത്തിലായിരുന്ന അന്യമതസ്ഥനായ യുവാവിനൊപ്പം ജീവിക്കാനായി ജനുവരി 11നാണ് താന്‍ ഇറങ്ങിത്തിരിച്ചതെന്ന് ജാസ്മി പറയുന്നു. ഷംനാദ്, ഷെമീര്‍, ഷാനവാസ് എന്നീ പ്രവര്‍ത്തകരുടെ പേരും ജാസ്മി എടുത്തു പറയുന്നുണ്ട്. താനോ തന്റെ ഭര്‍ത്താവോ കൊല്ലപ്പെടുകയോ ആത്മഹത്യ ചെയ്യുകയോ ചെയ്താല്‍ പരാതിയില്‍ പറയുന്ന എസ്ഡിപിഐ പ്രവര്‍ത്തകര്‍ക്കായിരിക്കും ഉത്തരവാദിത്തം എന്നും ഡിജിപിക്കെഴുതിയ കത്തില്‍ പറയുന്നു. അതേസമയം യുവതി ഡിജിപിക്കു പരാതി സമര്‍പ്പിച്ചിട്ടുണ്ടോയെന്ന കാര്യത്തില്‍ വ്യക്തതയില്ല.

”എന്റെ പ്രിയ എസ്ഡിപിഐ പ്രവര്‍ത്തകരെ അന്യമതത്തില്‍ പെട്ട ഒരു പയ്യനുമായി ഞാന്‍ സ്നേഹിക്കുകയോ, ജീവിക്കുകയോ ചെയ്തോട്ടേ, നിങ്ങള്‍ എന്തിനാണ് ഞങ്ങളുടെ പുറകേ വരുന്നത്, നിങ്ങള്‍ക്കു ഞങ്ങളുടെ ജീവന്‍ ആണോ വേണ്ടത്, ഞാനും ഈ ഭുമിയില്‍ ജീവിക്കാന്‍ ആഗ്രഹിക്കുന്നു, ദയവ് ചെയ്തു എന്നെയോ ഞാന്‍ ഇഷ്ടപ്പെടുന്ന വ്യക്തിയേയോ ഇല്ലാതാക്കന്‍ ശ്രമിക്കരുത്. ഇത് എന്റെ ജീവിതമാണ് ഇതില്‍ നിങ്ങള്‍ തല ഇടരുതെന്നും ജാസ്മി ഫേസ്ബുക്കിലൂടെ അഭ്യര്‍ത്ഥിക്കുന്നു.

എന്റെ ജീവന്‍ ഇനി എത്ര നാള്‍ ഉണ്ടെന്നറിയില്ല. എന്റെ ഇഷ്ടം അറിഞ്ഞപ്പോള്‍ എന്റെ നേരം കമ്പിവടിയുമായി വന്നവര്‍ എന്ന് ഇല്ലാതാക്കും എന്ന് ഉറപ്പാണ്. അതിന് കൂട്ട് തെക്കുംഭാഗം പൊലീസും. എനിക്ക് ജീവിക്കണം. എന്നെ വെറുത് വിടണം. ഒരു അപേക്ഷയാണ്’- എന്നിങ്ങനെയാണ് തിങ്കളാഴ്ച യുവതി ഇട്ടിരിക്കുന്ന ഫേസ്ബുക്ക് പോസ്റ്റ്.

[fb_pe url=”https://www.facebook.com/jasmiismail.jasmi.5/posts/402360613439922″ bottom=”30″]