ജയിംസ് ഹാരിസൺ. കഴിഞ്ഞ അറുപത് വർഷത്തിലേറെയായി സ്ഥിരമായി രക്തദാനം ചെയ്യുന്ന ഓസ്ട്രേലിയക്കാരനാണ്.ആറു പതിറ്റാണ്ടിനകം ആയിരത്തിയൊരുനൂറ്റി എഴുപത്തിമൂന്ന് തവണ അദ്ദേഹം രക്തദാനം ചെയ്തു കഴിഞ്ഞു. സ്വർണ്ണക്കൈയ്യുള്ള മനുഷ്യനെന്നാണ് അദ്ദേഹം അറിയപ്പെടുന്നത്.
റീസസ്-ഡി ഹീമോലൈറ്റിക് ഡിസീസ് എന്ന അസുഖത്തിനുള്ള മരുന്ന് ഇദ്ദേഹത്തിന്റെ രക്തത്തിൽ നിന്ന് വേർതിരിച്ചെടുത്തിരുന്നു. ഇരുപത്തിനാല് ലക്ഷം കുഞ്ഞുങ്ങളാണ് ഇതിനകം ഇദ്ദേഹത്തിന്റെ രക്തത്തിൽ നിന്നുള്ള മരുന്നുകൊണ്ടു മാത്രം ജീവിതത്തിലേയ്ക്ക് തിരികെ വന്നിട്ടുള്ളത്. രക്തഗ്രൂപ്പുകൾ സാധാരണയായി നാലുതരമാണ് പറയുക. A, B, AB, O എന്നിവയാണിവ. ഇതിന്റെ കൂടെ RhD ഫാക്ടർ എന്നൊരു ഘടകം കൂടി ചേർത്ത് വീണ്ടും അതിനെ വേർതിരിച്ചിട്ടുണ്ട്. അതായത് A, B, AB, O എന്ന ഓരോ ഗ്രൂപ്പും RhD പോസിറ്റീവും RhD നെഗറ്റീവും ഉണ്ടാകും. അങ്ങനെ പ്രധാനമായി എട്ട് രക്തഗ്രൂപ്പുകൾ ആണ് ഉള്ളത്.
സാധാരണ 80 ശതമാനം ആൾക്കാരും ഏതെങ്കിലും രക്തഗ്രൂപ്പിലെ RhD പോസിറ്റീവ് ആയിരിയ്ക്കും. RhD നെഗറ്റീവ് ആയ അമ്മയ്ക്ക് RhD പോസിറ്റീവ് ആയ ഒരു കുഞ്ഞിനെ ഗർഭം ധരിയ്ക്കേണ്ടി വരുമ്പോൾ ഏതെങ്കിലും സന്ദർഭങ്ങളിൽ അമ്മയുടേയും കുഞ്ഞിന്റേയും രക്തങ്ങൾ തമ്മിൽ കലരാൻ ഇട വന്നേക്കാം. അമ്മയ്ക്ക് ഗർഭത്തിൽ എന്തെങ്കിലും പരിക്കുണ്ടാവുക, ഏതെങ്കിലും ശസ്ത്രക്രീയകൾ ചെയ്യേണ്ടി വരിക, ഗർഭ സമയത്ത് എന്തെങ്കിലും രക്തസ്രാവം ഉണ്ടാവുക ഒക്കെ ഉണ്ടായാൽ ആണ് അമ്മയുടേയും കുഞ്ഞിന്റേയും രക്തങ്ങൾ തമ്മിൽ കലരാൻ ഇടവരുന്നത്. ഇങ്ങനെ രക്തം തമ്മിൽ കലരാൻ ഇടവന്നാൽ അമ്മയുടെ രോഗപ്രതിരോധവ്യൂഹത്തിൽ ചില അസ്വാരസ്യങ്ങളുണ്ടാകും. അമ്മയുടെ RhD നെഗറ്റീവ് ആയ രക്തത്തിൽ കുഞ്ഞിന്റെ RhD പോസിറ്റീവ് രക്തത്തിനെ അന്യവസ്തുവായി കണ്ട് അതിനെതിരേ ആന്റിബോഡികൾ ഉണ്ടായിത്തുടങ്ങും. ഇതിനെയാണ് ‘സെൻസിറ്റൈസേഷൻ’ എന്ന് പറയുന്നത്.
അമ്മയുടെ രക്തം നെഗറ്റീവും കുഞ്ഞിന്റെ ഗ്രൂപ്പ് പോസിറ്റീവും ആയാൽ മാത്രമേ ഇത് സംഭവിയ്ക്കുകയുള്ളൂ എന്ന് പ്രത്യേകം പറയണം. ആദ്യത്തെ തവണത്തെ ഗർഭസമയത്ത് ഇത് വലിയ പ്രശ്നം ആകണമെന്നില്ല. എന്നാൽ രണ്ടാമത്തെ തവണ ഗർഭം ധരിയ്ക്കുമ്പോൾ അമ്മയുടെ ശരീരം കുഞ്ഞിന്റെ പോസിറ്റീവ് രക്തഗ്രൂപ്പിനെതിരേ പെട്ടെന്ന് തന്നെ ആന്റിബോഡികൾ നിർമ്മിയ്ക്കുകയും ഈ ആന്റിബോഡികൾ മറുപിള്ളയിലൂടെ കുഞ്ഞിന്റെ ശരീരത്തിലെത്തുകയും ചെയ്യും. കുഞ്ഞിന്റെ ശരീരത്തിലെത്തുന്ന ആ ആന്റിബോഡികൾ ചുവന്ന രക്താണുക്കളെ നശിപ്പിയ്ക്കാൻ ശ്രമിയ്ക്കും. ചുവന്ന രക്താണുക്കൾ നശിയ്ക്കുമ്പോൾ കുഞ്ഞിനു ഗർഭത്തിൽ വച്ചു തന്നെ വിളർച്ച ബാധിയ്ക്കുകയും ചിലപ്പോൾ കുഞ്ഞ് ഗർഭാവസ്ഥയിൽ തന്നെ മരണപ്പെടാനും സാദ്ധ്യതയുണ്ടാകും. ഈ രോഗാവസ്ഥയാണ് റീസസ് ഡിസീസ് എന്നറിയപ്പെടുന്നത്.
ജയിംസ് ഹാരിസൺനെ പോലെയുള്ളവരുടെ രക്തത്തിൽ നിന്ന് വേർതിരിച്ചെടുക്കുന്ന ആന്റി ഡി ഇമ്യുണോഗ്ലോബുലിൻ ആദ്യത്തെ ഗർഭസമയത്ത് തന്നെ റീസസ് അസുഖം വരാൻ സാദ്ധ്യതയുള്ള അതായത് അമ്മയ്ക്ക് നെഗറ്റീവ് രക്ത ഗ്രൂപ്പും, കുഞ്ഞിനു പോസിറ്റീവ് രക്തഗ്രൂപ്പും ഉള്ള അമ്മമാരിൽ കുത്തിവച്ചാൽ പിന്നീട് സെൻസിറ്റൈസേഷൻ ഉണ്ടാവുകയില്ല. അതുകൊണ്ടുതന്നെ പിന്നീട് അമ്മയുടെ ശരീരത്തിൽ കുഞ്ഞിന്റെ ചുവന്ന രക്താണുക്കളെ ആക്രമിയ്ക്കാനുള്ള ആന്റിബോഡികൾ ഉണ്ടാവുകയില്ല. പതിനാലാമത്തെ വയസ്സിൽ ഒരു ശസ്ത്രക്രീയയ്ക്ക് വിധേയനായപ്പോഴാണ് ജയിംസ് ഹാരിസണിന്റെ രക്തത്തിൽ നിന്ന് ഇതുപോലെയൊരു മരുന്ന് വേർതിരിച്ചെടുക്കാമെന്ന് ഡോക്ടർമാർ കണ്ടുപിടിച്ചത്. ശസ്ത്രക്രീയാസമയത്ത് അദ്ദേഹത്തിനു വേണ്ടി അനേകം യൂണിറ്റ് രക്തം ഉപയോഗിച്ചിരുന്നു. തനിയ്ക്ക് ജീവിതം തിരിച്ചു കിട്ടാൻ കാരണമായത് രക്തദാനമാണെന്നറിഞ്ഞ അദ്ദേഹം ആരോഗ്യം തിരിച്ചുകിട്ടിയാൽ രക്തം ദാനം ചെയ്യുമെന്ന് പ്രതിജ്ഞയെടുത്തു. തന്റെ രക്തത്തിൽ ഇതുപോലെയൊരു സവിശേഷ തന്മാത്രയുണ്ടെന്ന് കണ്ടപ്പോൾ സ്ഥിരമായി രക്തദാനം തുടങ്ങി.
മൂന്ന് ദശലക്ഷം ഡോസ് ആന്റി ഡി മരുന്ന് ഇദ്ദേഹത്തിന്റെ രക്തത്തിൽ നിന്ന് ഉണ്ടാക്കിയെന്ന് പറയപ്പെടുന്നു. ആസ്ട്രേലിയൻ സർക്കാർ ഇദ്ദേഹത്തിന് മെഡൽ ഓഫ് ഓഡർ ഓഫ് ഓസ്ട്രേലിയ എന്ന ബഹുമതി നൽകി ആദരിച്ചിട്ടുണ്ട്. ആയിരത്തിയൊരുന്നൂറിലധികം തവണ രക്തദാനം ചെയ്ത ജയിംസ് ഹാരിസൺ തന്റെ എൺപത്തിയൊന്നാമത്തെ വയസ്സിൽ അവസാനത്തെ തവണ രക്തദാനം ചെയ്ത്ശേഷം വിരമിയ്ക്കുന്നു. ഇതിനോടകം ഇരുപത് ലക്ഷം കുഞ്ഞുങ്ങളുടെ ജീവൻ രക്ഷിച്ചു എന്നത് മാത്രമല്ല, ഇന്നും തികച്ചും ആരോഗ്യവാനായും യാതൊരു അസുഖങ്ങളില്ലാതേയും തന്റെ പ്രായത്തിൽ കവിഞ്ഞ ആരോഗ്യത്തോടെയുമിരിയ്ക്കുന്നു ആ മനുഷ്യൻ എന്നത് രക്തദാനത്തിന്റെ മഹത്വത്തിനും സുരക്ഷയ്ക്കും ഏറ്റവും വലിയ തെളിവാണ്.
Discussion about this post