കൊല്ക്കത്ത: ബംഗ്ലാദേശിനെതിരായ രണ്ടാം ക്രിക്കറ്റ് ടെസ്റ്റില് 241 റണ്സിന്റെ ഒന്നാമിന്നിങ്സ് ലീഡ് കരസ്ഥമാക്കി ടിം ഇന്ത്യ.. രണ്ടാം ദിനം ഒന്പത് വിക്കറ്റ് നഷ്ടത്തില് 347 റണ്സെന്ന നിലയില് ഇന്ത്യ ഒന്നാമിന്നിങ്സ് ഡിക്ലയര് ചെയ്തു.
241 റണ്സിന്റെ ഒന്നാം ഇന്നിങ്സ് ലീഡ് വഴങ്ങി രണ്ടാം ഇന്നിങ്സ് ബാറ്റിങ് ആരംഭിച്ച ബംഗ്ലാദേശിന്, രണ്ടു റണ്സിനിടെ രണ്ടു വിക്കറ്റ് നഷ്ടമായി. ഓപ്പണര് ഷദ്മാന് ഇസ്!ലാം (0), ക്യാപ്റ്റന് മോമിനുല് ഹഖ് (0) എന്നിവരാണ് പുറത്തായത്. ഇഷാന്ത് ശര്മയ്ക്കാണ് രണ്ടു വിക്കറ്റും. എട്ടു വിക്കറ്റ് കയ്യിലിരിക്കെ ഇന്നിങ്സ് തോല്വി ഒഴിവാക്കാന് ബംഗ്ലദേശിന് 237 റണ്സ് കൂടി വേണം.
89.4 ഓവറാണ് ഇന്ത്യ ബാറ്റ് ചെയ്തത്. 90ാം ഓവറിലെ നാലാമത്തെ പന്തിനുശേഷം കോലി ക്രീസിലുണ്ടായിരുന്ന വൃദ്ധിമാന് സാഹയെയും മുഹമ്മദ് ഷമിയെയും തിരിച്ചുവിളിക്കുകയായിരുന്നു.
സെഞ്ച്വറിയോടെ ക്യാപ്റ്റന് കോലിയും അര്ധസെഞ്ച്വറികള് നേടി ചേതേശ്വര് പൂജാരയും അജിങ്ക്യ രഹാനെയും ഇന്ത്യയ്ക്ക് വേണ്ടി മികച്ച പ്രകടനം പുറത്തെടുത്തു. ഇന്നിങ്സ് ഡിക്ലയര് ചെയ്യുമ്പോള് സാഹ 17 ഉം ഷമി 10 ഉം റണ്സെടുത്ത് നില്ക്കുകയായിരുന്നു.
18 ബൗണ്ടറികളുടെ അകമ്പടിയോടെയാണ് കൊഹ്ലി തന്റെ ടെസ്റ്റ് കരിയറിലെ 27ാം സെഞ്ചുറി സ്വന്തമാക്കിയത്. 194 പന്തില് നിന്ന് 136 റണ്സെടുത്തു. രണ്ടാംദിനം മൂന്നു വിക്കറ്റ് നഷ്ടത്തില് 174 റണ്സെന്ന നിലയില് ബാറ്റിങ് ആരംഭിച്ച ഇന്ത്യയ്ക്ക് അര്ധ സെഞ്ചുറി നേടിയ അജിങ്ക്യ രഹാനെയുടെ (51) വിക്കറ്റാണ് ആദ്യം നഷ്ടമായത്.
Discussion about this post