ചൈനയിലെ വുഹാന് നഗരത്തില് പടര്ന്നു പിടിച്ച ന്യുമോണിയയ്ക്കു കാരണം പുതിയ ഇനം കൊറോണ വൈറസ് ആണെന്ന് സ്ഥിരീകരിച്ച് ലോകാരോഗ്യ സംഘടന. വൈറസ് ബാധ ലോകമെങ്ങും പടരാന് സാധ്യതയുണ്ടെന്നും ലോകാരോഗ്യ സംഘടന മുന്നറിയിപ്പ് നൽകി. ജലദോഷം മുതല് സാര്സ് വരെയുള്ള ശ്വാസകോശരോഗങ്ങള്ക്കു കാരണമാകുന്ന കൊറോണ വൈറസിന്റെ പുതിയ രൂപമാണിതെന്നാണ് കണ്ടെത്തല്.
വുഹാനിലെ മത്സ്യമാര്ക്കറ്റില് ജോലി ചെയ്തിരുന്ന ഒരാള്ക്കാണ് ആദ്യം വൈറസ് ബാധയുണ്ടായത്. പിന്നീട് രോഗബാധിതരായവര് ആ മാര്ക്കറ്റിലെ സന്ദര്ശകരായിരുന്നെന്നാണു കണ്ടെത്തല്. രോഗബാധിതനായ ഒരാളുടെ മരണം സ്ഥിരീകരിച്ചു. രോഗലക്ഷണങ്ങളുമായി തായ്ലന്ഡില് ചികിത്സയിലുള്ള ചൈനീസ് വനിത സുഖം പ്രാപിച്ചു വരികയാണെന്ന് അധികൃതര് അറിയിച്ചു.
മൃഗങ്ങളില് നിന്നു മനുഷ്യരിലേക്കു പടരുന്ന വൈറസ് നിലവില് മനുഷ്യരില് നിന്നു മനുഷ്യരിലേക്കു പകരുന്നതായി കണ്ടെത്തിയിട്ടില്ല. പനിയും ശ്വാസതടസ്സവുമാണു പ്രധാന രോഗലക്ഷണങ്ങള്. മരുന്നോ ചികിത്സയോ കണ്ടെത്തിയിട്ടില്ലാത്തതിനാല് ആശുപത്രികള് ജാഗ്രത പുലര്ത്തണമെന്നു ലോകാരോഗ്യ സംഘടന നിര്ദേശിച്ചു.
മുന്നറിയിപ്പിനെത്തുടര്ന്ന് പ്രധാന വിമാനത്താവളങ്ങളിലടക്കം നിരീക്ഷണം ഉറപ്പാക്കാനാണു കേന്ദ്ര ആരോഗ്യമന്ത്രാലയത്തിന്റെ തയാറെടുപ്പ്. ഹോങ്കോങ്, ചൈന എന്നിവിടങ്ങളില് നിന്നും അയല്രാജ്യങ്ങളില് നിന്നും എത്തുന്നവരെ നിരീക്ഷിക്കാനാണ് ആലോചന.
Discussion about this post