‘മക്കയും റോമും പോലും അടച്ചു, മര്‍ക്കസ്​ നിസാമുദ്ദീന്‍ പള്ളിയുടേത്​ നിരുത്തരവാദിത്തപരമായ നടപടി’: രൂക്ഷ വിമർശനവുമായി അരവിന്ദ്​ കേജ്രിവാള്‍

ഡല്‍ഹി: നിസാമുദ്ദീനിലെ തബ്​ലീഗ്​ സമ്മേളനത്തില്‍ പ​ങ്കെടുത്ത നിരവധി പേര്‍ക്ക്​ കൊറോണ വൈറസ്​ ബാധിച്ച സംഭവത്തില്‍ പള്ളി അധികൃതര്‍​ക്കെതിരെ രൂക്ഷ വിമര്‍ശനവുമായി ഡല്‍ഹി മുഖ്യമന്ത്രി അരവിന്ദ്​ കേജ്രിവാള്‍. മര്‍ക്കസ്​ നിസാമുദ്ദീന്‍ അധികാരികള്‍ നിരുത്തവാദിത്തപരമായാണ്​ ​പ്രവര്‍ത്തിച്ചത്. കെജ്രിവാള്‍ വാര്‍ത്താസമ്മേളനത്തില്‍ ആണ് ഇക്കാര്യം ചൂണ്ടിക്കാട്ടിയത്.

സമ്മേളനത്തില്‍ പ​ങ്കെടുത്ത ഏഴുപേരാണ്​ കൊറോണ​ ലക്ഷണങ്ങ​​ളെ തുടര്‍ന്ന്​ ചികിത്സയിലിരിക്കെ മരിച്ചത്​. 24 പേര്‍ക്ക്​ കൊറോണ സ്ഥിരീകരിച്ചു.

ലോകത്താകമാനം ​ജനങ്ങള്‍ മരിച്ചുകൊണ്ടിരിക്കുകയാണ്​. മക്കയും റോമും വരെ ഒഴിച്ചിട്ടിരിക്കു​മ്പോഴാണ്​ ഇത്തരം ഗുരുതരമായ നിയമലംഘനം നടത്തിയിരിക്കുന്നത്​. പള്ളി അധികാരികള്‍ക്കെതിരെ കേസ്​ രജിസ്​റ്റര്‍ ചെയ്​തിട്ടുണ്ടെന്നും കെജ്രിവാള്‍ പറഞ്ഞു.

മാര്‍ച്ച്‌​ എട്ട്​ മുതല്‍ 10 വരെ നടന്ന സമ്മേളനത്തില്‍ 2000 ലധികം പേരാണ്​ പ​ങ്കെടുത്തത്​. ഇതില്‍ പ​ങ്കെടുത്ത 400 ലധികം പേരെ കൊറോണ രോഗലക്ഷണങ്ങളോടെ ആശുപത്രിയില്‍ പ്രവേശിപ്പിച്ചിട്ടുണ്ട്​.

രാജ്യത്തി​ന്റെ പലഭാഗങ്ങളില്‍ നിന്നുള്ളവരാണ്​ സമ്മേളനത്തിലെത്തിയത്​. ”എത്ര പേര്‍ക്ക്​ അസുഖം പടര്‍ന്നിട്ടുണ്ടെന്ന്​ ഊഹിക്കാന്‍ കഴിയുന്നില്ല. അത്​ ഭയപ്പെടുത്തുന്നു. എല്ലാ മതനേതാക്കളോടും അഭ്യര്‍ഥിക്കാനുള്ളത്​ ഇതാണ്​ -നിങ്ങളു​ടെ മതം എന്തുതന്നെയായാലും ജീവന്‍ അതിനേക്കാള്‍ വിലപ്പെട്ടതാണ്​ എന്ന്​ മനസിലാക്കണം.” – കെജ്രിവാള്‍ പറഞ്ഞു.

പള്ളിയില്‍ നിന്ന് 1, 548 പേരെ ​ഒ​ഴിപ്പിച്ചു. 1,100 പേരെ നഗരത്തിന്റെ വിവിധ ഭാഗങ്ങളിലായി ക്വാറന്‍റീന്‍ ചെയ്​തിട്ടുണ്ട്​. സമ്മേളനത്തില്‍ പങ്കെടുത്ത വിവിധ സംസ്ഥാനങ്ങളില്‍ നിന്നുള്ള ആളുകളെ കണ്ടെത്തുന്നതിന് ശ്രമം നടക്കുന്നുണ്ടെന്നും ​കെജ്രിവാള്‍ അറിയിച്ചു.

തബ്​ലീഗ്​ സമ്മേളനത്തില്‍ മലയാളികളും പങ്കെടുത്തിട്ടുണ്ട്. കഴിഞ്ഞദിവസം പത്തനംതിട്ടയില്‍ മരിച്ചയാളും ഇതില്‍ പ​ങ്കെടുത്തിരുന്നു. പക്ഷെ, ഇദ്ദേഹത്തിന്​ കൊറോണ​ സ്​ഥിരീകരിച്ചിട്ടില്ല.

1,500 ഓളം പേരാണ്​ തമിഴ്​നാട്ടില്‍ നിന്ന്​ പങ്കെടുത്തത്​. സമ്മേളനത്തില്‍ പ​ങ്കെടുത്ത 65കാരനായ മധുര സ്വദേശി കൊറോണ​ ബാധിച്ച്‌​ മരണമടഞ്ഞിരുന്നു. തമിഴ്​നാട്ടിലെ ആദ്യ കൊറോണ​ മരണമാണിത്​.

സംസ്​ഥാനത്ത്​ കൊറോണ​ സ്​ഥിരീകരിച്ച 30 ഓളം പേര്‍ ഡല്‍ഹിയില്‍നിന്ന്​ മടങ്ങിയവരാണ്​. മതസമ്മേളനത്തില്‍ പ​ങ്കെടുത്ത്​ തിരിച്ചെത്തിയ റെയില്‍വേ ജീവനക്കാരനെ പരിശോധിച്ച ​മലയാളി റെയില്‍വേ വനിത ഡോക്​ടര്‍ക്കും അവരുടെ പത്ത്​ മാസം പ്രായമായ കുഞ്ഞിനും ഉള്‍പ്പെടെ കുടുംബത്തിലെ നാലുപേര്‍ക്ക്​ കൊറോണ വൈറസ് ബാധ സ്​ഥിരീകരിച്ചിട്ടുണ്ട്​. കഴിഞ്ഞദിവസം ആറുപേരാണ്​ തെലങ്കാനയില്‍ മരിച്ചത്​.

അതേസമയം നിസാമുദ്ദീന്‍ പരിസരം ഇ​പ്പോള്‍ പൊലീസി​​​ന്റെ നിയന്ത്രണത്തിലാണുള്ളത്​.