തിരുവനന്തപുരം: പൊതുസ്ഥലങ്ങളിലും ജോലി സ്ഥലങ്ങളിലും ഇന്ന് മുതല് മാസ്ക് നിര്ബന്ധമാക്കിയിട്ടുണ്ടെന്ന് മുഖ്യമന്ത്രി പിണറായി വിജയന്. മാസ്ക് ധരിക്കാത്തതിന് ഇന്ന് വൈകീട്ട് നാല് മണിവരെ കേരളത്തില് 954 കേസുകള് രജിസ്റ്റര് ചെയ്തെന്ന് മുഖ്യമന്ത്രി വാര്ത്താ സമ്മേളനത്തില് പറഞ്ഞു.
അതേസമയം സംസ്ഥാനത്ത് ഇന്നു രണ്ടു പേര്ക്ക് കൊറോണ സ്ഥിരീകരിച്ചു. 14 പേരുടെ ഫലം നെഗറ്റീവായി. മലപ്പുറത്തും കാസര്ഗോഡും ഓരോ ആളിനു വീതമാണ് രോഗം സ്ഥിരീകരിച്ചത്. ഇതില് ഒരാള് മഹാരാഷ്ട്രയില്നിന്ന് വന്നതാണ്. മറ്റൊരാള്ക്ക് സമ്പര്ക്കത്തിലൂടെയാണ് രോഗം വന്നത്.
പാലക്കാട് 4, കൊല്ലം 3, കണ്ണൂര് കാസര്ഗോഡ് 2വീതം, പത്തനംതിട്ട, മലപ്പുറം, കോഴിക്കോട് 1 വീതം എന്നിങ്ങനെയാണ് നെഗറ്റീവായവരുടെ എണ്ണം. ഇതുവരെ രോഗം ബാധിച്ചവരുടെ എണ്ണം 497 ആയി. 111പേര് ചികില്സയിലുണ്ട്. 20711 പേര് നിരീക്ഷണത്തിലുണ്ട്. ഇതില് 20285 പേര് വീടുകളിലും 426 പേര് ആശുപത്രികളിലും നീരീക്ഷണത്തില്. ഇന്ന് 95 പേരെ ആശുപത്രിയില് പ്രവേശിപ്പിച്ചു. ഇതുവരെ 25973 സാംപിള് പരിശോധനയ്ക്ക് അയച്ചു. 25135 എണ്ണത്തില് രോഗബാധ ഇല്ലെന്നു കണ്ടെത്തി.
Discussion about this post