ബംഗളൂരു: സംസ്ഥാനത്തെ കോവിഡ് വ്യാപനം കുറഞ്ഞതോടെ കൂടുതല് ഇളവുകള് നല്കാനൊരുങ്ങി സര്ക്കാര്. ഇതിന്റെ ഭാഗമായി ജൂലൈ അഞ്ചു മുതല് സംസ്ഥാനത്തെ ഷോപ്പിങ് മാളുകള് തുറക്കാന് അനുമതി നല്കാനുള്ള ആലോചനയിലാണ് സര്ക്കാര്.
ഷോപ്പിങ് സെന്റര് അസോസിയേഷന് പ്രതിനിധികള് തന്നെ കണ്ടിരുന്നുവെന്നും തുറക്കാന് അനുമതി തേടിയിട്ടുണ്ടെന്നും ഇക്കാര്യം മന്ത്രിസഭയില് ചര്ച്ച ചെയ്യുമെന്നും യെദിയൂരപ്പ പറഞ്ഞു. മാളുകളും ഷോപ്പിങ് സെന്ററുകളും തുറക്കുന്ന കാര്യത്തിലും മറ്റ് ഇളവുകള് നല്കുന്ന കാര്യത്തിലും ചര്ച്ച നടക്കുന്നുണ്ട്. ഇക്കാര്യത്തില് അന്തിമ തീരുമാനം ആയിട്ടില്ലെന്നും യെദിയൂരപ്പ പറഞ്ഞു.
ജൂലൈ അഞ്ചു മുതല് തുറക്കാന് അനുമതി നല്കിയേക്കുമെന്നാണ് റിപ്പോര്ട്ട്. ജൂലൈ അഞ്ചുവരെയാണ് നിലവിലുള്ള കോവിഡ് രണ്ടാം ഘട്ട അണ്ലോക് പ്രഖ്യാപിച്ചിട്ടുള്ളത്. എല്ലാ വ്യാപാരസ്ഥാപനങ്ങളും തുറക്കാന് അനുമതി നല്കിയിട്ടുണ്ടെങ്കിലും മാളുകളും ഷോപ്പിങ് കോംപ്ലക്സുകളും എ.സിയുള്ള കടകളും തുറക്കാന് അനുമതി നല്കിയിട്ടില്ല. മാളുകള് തുറക്കാന് അനുമതി തേടിക്കൊണ്ട് ഷോപ്പിങ് സെന്ററേഴ്സ് അസോസിയേഷന് ഓഫ് ഇന്ത്യ അംഗങ്ങളാണ് മുഖ്യമന്ത്രിയുമായി കൂടിക്കാഴ്ച നടത്തിയത്.
മാളുകള് തുറക്കാന് അനുമതി നല്കിയാലും രാവിലെ ഒമ്പതു മുതല് വൈകീട്ട് ആറുവരെ മാത്രമെന്ന നിബന്ധന വെക്കരുതെന്നും ഇതുകൊണ്ട് കാര്യമില്ലെന്നും അസോസിയേഷന് പ്രതിനിധി ജി.എം. നന്ദിഷ് പറഞ്ഞു. കോവിഡ് മാനദണ്ഡങ്ങള് പാലിച്ചുകൊണ്ട് രാത്രിവരെ മാള് തുറക്കാനുള്ള അനുമതി നല്കണമെന്നാണ് അസോസിയേഷന് ആവശ്യപ്പെട്ടിരിക്കുന്നത്. മാളുകള് തുറന്നാലും മാളുകള്ക്കുള്ളിലെ ഫുഡ്കോര്ട്ടുകളുടെ പ്രവര്ത്തനത്തില് കര്ശന നിരീക്ഷണം ആവശ്യമാണെന്നാണ് ബി.ബി.എം.പി ചീഫ് കമീഷണര് ഗൗരവ് ഗുപ്ത വ്യക്തമാക്കിയത്.
ജൂലൈ ഒന്നു മുതല് നമ്മ മെട്രോ രാവിലെ എഴു മുതല് വൈകീട്ട് ആറു വരെ സര്വിസ് നടത്തുമെന്ന് ബി.എം.ആര്.സി.എല് അറിയിച്ചു. തിരക്കുള്ള സമയങ്ങളില് അഞ്ചു മിനിറ്റ് ഇടവിട്ടും തിരക്കു കുറഞ്ഞ സമയങ്ങളില് 15 മിനിറ്റ് ഇടവിട്ടുമായിരിക്കും സര്വിസ്. എന്നാല്, വാരാന്ത്യ കര്ഫ്യൂ നിലനില്ക്കുന്നതിനാല് ശനി, ഞായര് ദിവസങ്ങളില് മെട്രോ സര്വിസ് ഉണ്ടാകില്ലെന്നും ബി.എം.ആര്.സി.എല് അറിയിച്ചു.
കോവിഡ് മഹാമാരിയുടെ പശ്ചാത്തലത്തില് നിര്ത്തിവെച്ചിരുന്ന ടിക്കറ്റ് ടോക്കണുകള് യാത്രക്കാര്ക്ക് ലഭിക്കും. ടിക്കറ്റ് കൗണ്ടറുകളില് നിന്ന് ക്യു.ആര്. കോഡ് സ്കാന് ചെയ്തോ പണം കൊടുത്തോ ടോക്കണ് വാങ്ങാം. മെട്രോ സ്റ്റേഷെന്റ പ്രവേശന കവാടത്തില് യാത്രക്കാരെ തെര്മല് സ്കാന് ചെയ്യും. യാത്രക്കാര് കോവിഡ് മാനദണ്ഡങ്ങള് കര്ശനമായി പാലിക്കണമെന്ന് ബി.എം.ആര്.സി.എല് ആവശ്യപ്പെട്ടു.
ലോക്ഡൗണ് ഇളവുകള് വന്നതോടെ ജൂണ് 21-നാണ് നമ്മ മെട്രോ ട്രെയിന് സര്വിസ് പുനരാരംഭിച്ചത്. രാവിലെ ഏഴു മുതല് രാവിലെ 11 വരെയും വൈകീട്ട് മൂന്നു മുതല് ആറുവരെയുമായിരുന്നു സര്വിസ് ഉണ്ടായിരുന്നത്. ഇതാണിപ്പോള് കൂടുതല് സമയത്തേക്ക് ദീര്ഘിപ്പിച്ചത്. സ്മാര്ട്ട് കാര്ഡ് ഉപയോഗിച്ചു മാത്രമെ യാത്രക്ക് അനുമതിയുണ്ടായിരുന്നുള്ളൂ.
Discussion about this post