തിരുവനന്തപുരം: സംസ്ഥാനത്ത് ശക്തമായ മഴ ഇന്ന് കൂടി തുടരുമെന്ന് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്. പത്ത് ജില്ലകളില് യെല്ലോ അലര്ട്ട് പ്രഖ്യാപിച്ചു. ആലപ്പുഴ, കോട്ടയം, എറണാകുളം, ഇടുക്കി, തൃശൂര്, മലപ്പുറം, കോഴിക്കോട്, വയനാട്, കണ്ണൂര്, കാസര്ഗോഡ് ജില്ലകളിലാണ് അലര്ട്ട് പ്രഖ്യാപിച്ചിരിക്കുന്നത്.
അതേസമയം നാളെ മുതല് മഴ കുറയുമെന്നാണ് മുന്നറിയിപ്പില് പറയുന്നത്. സെപ്റ്റംബര് മൂന്ന് വരെ കനത്ത മഴയ്ക്കുള്ള സാധ്യതയില്ല. അടുത്ത മൂന്ന് മണിക്കൂറില് കേരളത്തിന്റെ തെക്കന് ജില്ലകളില് ഒറ്റപ്പെട്ട മഴ പ്രതീക്ഷിക്കാം.
കേരള-കര്ണാടക-ലക്ഷദ്വീപ് തീരങ്ങളില് നിന്ന് ഇന്ന് മത്സ്യബന്ധനത്തിനു പോകാന് പാടുള്ളതല്ലെന്ന് കേന്ദ്ര കാലാവസ്ഥ വകുപ്പ് അറിയിച്ചു. ഇവിടങ്ങളില് മണിക്കൂറില് 40 മുതല് 50 കി.മീ വരെ വേഗതയില് വീശിയടിച്ചേക്കാവുന്ന ശക്തമായ കാറ്റിനും, മോശം കാലാവസ്ഥക്കും സാധ്യതയുണ്ട്.
തെക്ക് പടിഞ്ഞാറന്, മധ്യ പടിഞ്ഞാറന് അറബിക്കടലിലും മണിക്കൂറില് 40 മുതല് 50 കി.മീ വരെയും ചില അവസരങ്ങളില് 60 കി.മീ വരെയും വേഗതയില് വീശിയടിച്ചേക്കാവുന്ന ശക്തമായ കാറ്റിന് സാധ്യതയുണ്ട്.
Discussion about this post