ഡല്ഹി: വിദേശയാത്ര നടത്തുന്നവര്ക്കായി കോവിന് പോര്ട്ടല് പരിഷ്കരിക്കാനൊരുങ്ങി കേന്ദ്രസര്ക്കാര്. വിദേശയാത്ര നടത്തുന്ന രണ്ടുഡോസ് വാക്സിന് സ്വീകരിച്ചവര്ക്ക് ജനനത്തീയതി ഉള്പ്പെടുത്തി പുതിയ വാക്സിന് സര്ട്ടിഫിക്കറ്റ് ലഭ്യമാക്കും. കോവിഡ് വാക്സിന് സര്ട്ടിഫിക്കറ്റുമായി ബന്ധപ്പെട്ട് ഇന്ത്യയും യു.കെയും തമ്മിലുണ്ടായ തര്ക്കങ്ങളുടെ ഭാഗമായാണ് തീരുമാനം.
നിലവില് ജനിച്ച വര്ഷത്തിന്റെ അടിസ്ഥാനത്തിലാണ് വാക്സിന് സ്വീകരിച്ചവരുടെ പ്രായം സര്ട്ടിഫിക്കറ്റില് ഉള്പ്പെടുത്തുന്നത്. അടുത്തയാഴ്ച മുതല് ജനനത്തീയതി ഉള്പ്പെടുത്താനുള്ള സൗകര്യം കോവിഡ് പോര്ട്ടലില് ലഭ്യമാകും. ലോകാരോഗ്യ സംഘടനയുടെ മാനദണ്ഡങ്ങള് പാലിച്ചാണ് പുതിയ മാറ്റം.
‘കോവിനില് രണ്ട് ഡോസ് വാക്സിന് സ്വീകരിച്ച, വിദേശത്തുപോകാന് ആഗ്രഹിക്കുന്നവര്ക്കായി ജനനത്തീയതി ഉള്പ്പെടുത്തി പുതിയ വാക്സിന് സര്ട്ടിഫിക്കറ്റ് നല്കുന്നതിനായി പരിഷ്കാരങ്ങള് വരുത്താന് തീരുമാനിച്ചു’ -ഔദ്യോഗിക വൃത്തങ്ങള് പറയുന്നു.
ബുധനാഴ്ച യു.കെ വിദേശികള്ക്കുള്ള പുതിയ യാത്ര മാര്ഗനിര്ദേശങ്ങള് പുറപ്പെടുവിച്ചിരുന്നു. ഇതില് ആസ്ട്രസെനകയുടെ കോവിഷീല്ഡ് കോവിഡ് വാക്സിന് പട്ടികയില് ഉള്പ്പെടുത്തുകയും ചെയ്തിരുന്നു.
Discussion about this post