മുംബൈ: ആഢംബര കപ്പലിലെ ലഹരിമരുന്ന് കേസില് അറസ്റ്റിലായി മുംബൈയിലെ ആര്തര് റോഡ് ജയിലില് (മുംബൈ സെന്ട്രല് ജയില്) കഴിയുന്ന ബോളിവുഡ് സൂപ്പര്താരം ഷാരൂഖ് ഖാന്റെ മകന് ആര്യന് ഖാന് കടുത്ത മാനസിക സമ്മര്ദത്തിലാണെന്നും അസ്വസ്ഥനാണെന്നും ജയില് അധികൃതരെ ഉദ്ദരിച്ച് ‘ഇന്ത്യ ടുഡേ’ റിപ്പോര്ട്ട് ചെയ്യുന്നു. ആര്യന്റെ ജാമ്യാപേക്ഷയില് വാദം കേള്ക്കല് പൂര്ത്തിയായെങ്കിലും വിധി പറയുന്നത് ജഡ്ജി വി.വി. പാട്ടീല് ഈമാസം 20ലേക്ക് മാറ്റിയിരുന്നു. ക്വാറന്റീന് കഴിയുക കൂടി ചെയ്ത സാഹചര്യത്തില് ആര്യന് ഖാനെ സാധാരണ സെല്ലിലേക്ക് മാറ്റിയിട്ടുണ്ട്.
അതേസമയം, സുരക്ഷാ കാരണങ്ങള് ചൂണ്ടിക്കാട്ടി ആഢംബര കപ്പല് ലഹരി മരുന്ന് കേസിലെ പ്രതികളെ വേറേ വേറേ സെല്ലുകളിലാണ് പാര്പ്പിച്ചിരിക്കുന്നതെന്നും റിപ്പോര്ട്ടില് പറയുന്നു.
കോവിഡ് പ്രോട്ടോകോള് അനുസരിച്ച് ആര്യനടക്കമുള്ള പ്രതികളെ ബുധനാഴ്ച വരെ ക്വാറന്റീന് സെല്ലില് ആണ് പാര്പ്പിച്ചിരുന്നത്. കോവിഡ് പരിശോധന ഫലം നെഗറ്റീവ് ആയതിനെ തുടര്ന്ന് ഇവരെ സാധാരണ സെല്ലുകളിലേക്ക് മാറ്റി. ജാമ്യഹരജിയില് വിധി പറയുന്നത് കോടതി മാറ്റിവെച്ചതിനാല് ഈമാസം 20വരെ ആര്യന് ജയിലില് കഴിയേണ്ടി വരും. അതിനിടെ, ആര്യന് ഖാന് ജയിലില് തടവുകാര്ക്ക് വിതരണം ചെയ്യുന്ന ഭക്ഷണം കഴിക്കുന്നതിനോട് വിമുഖത കാട്ടുകയാണെന്ന് നേരത്തേ ദേശീയ മാധ്യമങ്ങള് റിപ്പോര്ട്ട് ചെയ്തിരുന്നു. ജയില് കാന്റീനില് നിന്ന് വാങ്ങുന്ന ഭക്ഷണവും ബിസ്കറ്റും വെള്ളവുമാണ് ആര്യന് കഴിക്കുന്നത്.
ആര്യന്റെ പേരില് ജയിലിലേക്ക് മണിയോര്ഡറുകള് ധാരാളം വരുന്നുണ്ട്. ഇത് ആര്യന്റെ പേരില് നിക്ഷേപിച്ചിട്ടുണ്ടെന്നും ഈ പണം ഉപയോഗിച്ചാണ് കാന്റീനില് നിന്ന് ഭക്ഷണം വാങ്ങുന്നതെന്നും ജയില് അധികൃതര് പറഞ്ഞു. ജയിലില് പുറത്തുനിന്നുള്ള ഭക്ഷണം അനുവദിക്കുകയുമില്ല. വീട്ടില് നിന്ന് കൊടുത്തുവിടുന്ന വസ്ത്രമാണ് ആര്യന് ജയിലിനുള്ളില് ധരിക്കുന്നത്. ഉന്നതനിലവാരത്തില് ജീവിച്ചിരുന്ന ആര്യന് ജയിലിലെ സാഹചര്യങ്ങളുമായി പൊരുത്തപ്പെടാന് ഏറെ ബുദ്ധിമുട്ടുകയാണെന്നും ദേശീയ മാധ്യമങ്ങള് റിപ്പോര്ട്ട് ചെയ്യുന്നു.
ആര്തര് റോഡ് ജയിലിലെ നിയമം അനുസരിച്ച് രാവിലെ ആറിന് ഉണരണം. ഏഴുമണിക്ക് ഷീര, പോഹ എന്നിവ പ്രഭാത ഭക്ഷണമായി നല്കും. ഉച്ചക്ക് 11നും വൈകീട്ട് ആറിനും ചപ്പാത്തി, ചോറ്, സബ്ജി, ദാല് എന്നിവയും ലഭിക്കും. അതിനുശേഷം ബാരക്കുകള് അടക്കും. ഉച്ചകഴിഞ്ഞ് അല്പസമയം മാത്രമാണ് ജയിലിനുള്ളിലെ തുറന്ന സ്ഥലത്തുകൂടി നടക്കുവാന് അനുവാദമുള്ളത്. ജയില് അധികൃതര് മുഴുവന് സമയവും ആര്യനെ നിരീക്ഷിക്കുന്നുണ്ടെന്നും ദേശീയ മാധ്യമങ്ങള് റിപ്പോര്ട്ട് ചെയ്യുന്നു.
Discussion about this post