സി.പി.എമ്മിന്റെ ഗുണ്ടാസംഘം നടത്തിയ കൊല ബി.ജെ.പിയുടെ തലയില് കെട്ടിവെയ്ക്കാനുള്ള പൊലീസ്-സി.പി.എം ഗൂഢാലോചന ബി.ജെ.പി രാഷ്ട്രീയമായും നിയമപരമായും നേരിടുമെന്ന് സംസ്ഥാന അദ്ധ്യക്ഷന് കെ.സുരേന്ദ്രന്. പൊലീസിനെ ഉപയോഗിച്ച് വ്യാജപ്രചരണം നടത്തി നാട്ടില് കലാപമുണ്ടാക്കാനുള്ള സി.പി.എമ്മിന്റെ അപകടകരമായ രാഷ്ട്രീയത്തെ ജനങ്ങളെ അണിനിരത്തി ശക്തമായി നേരിടുമെന്നും അദ്ദേഹം പറഞ്ഞു.
തിരുവല്ലയിലെ വനിതാ നേതാവ് സി.പി.എം പ്രാദേശിക നേതാവിനെതിരെ ഉയര്ത്തിയ പീഡന പരാതിയും കൊലപാതകവുമായി ബന്ധമുണ്ടോയെന്ന് പരിശോധിക്കണം. പത്തനംതിട്ട ജില്ലയിലുള്ള സി.പി.എമ്മിലെ ആഭ്യന്തര പ്രശ്നങ്ങളും അന്വേഷിക്കണം. തിരുവല്ലയിലെ കൊലപാതകത്തില് ബി.ജെ.പിക്ക് പങ്കില്ലെന്നും രാഷ്ട്രീയ കൊലപാതകമല്ലെന്നും പറഞ്ഞത് പത്തനംതിട്ട ജില്ലാ പൊലീസ് മേധാവി നിശാന്തിനിയാണ്.
എന്നാല് സി.പി.എം സെക്രട്ടറി കോടിയേരി ബാലകൃഷ്ണന് പൊലീസിനെ ഭീഷണിപ്പെടുത്തുകയായിരുന്നു. ഭീഷണിക്ക് വഴങ്ങിയാണ് പൊലീസ് ബി.ജെ.പി പ്രവര്ത്തകര് സംഘം ചേര്ന്നു സി.പി.എം പ്രവര്ത്തകനെ കൊലപ്പെടുത്തി എന്ന എഫ്.ഐ.ആര് നല്കിയത്. സി.പി.എം പറയുന്നത് പോലെയാണ് പൊലീസ് പ്രവര്ത്തിക്കുന്നതെങ്കില് അത് അനുവദിച്ചു തരാന് ബി.ജെ.പി ഒരുക്കമല്ല. രാജ്യത്ത് പൊലീസിനും മുകളില് മറ്റ് ഭരണഘടനാ സ്ഥാപനങ്ങളും ജുഡീഷ്യറിയും ഉണ്ട്.
സി.പി.എമ്മിന്റെ പോഷകസംഘടനയായി പ്രവര്ത്തിക്കുന്നതിന് കേരള ഡി.ജി.പി ഉത്തരവാദിത്തപ്പെട്ടവര്ക്ക് മുമ്ബില് മറുപടി നല്കേണ്ടി വരും. സന്ദീപ് വധക്കേസില് അറസ്റ്റിലായ മുഹമ്മദ് ഫൈസല് ബി.ജെ.പിക്കാരനാണോ. ഇയാളുടെ പശ്ചാത്തലമെന്താണ് എന്ന് പൊലീസ് വ്യക്തമാക്കണം. റെഡ് വളന്റിയര് യൂനിഫോമില് സി.പി.എം പരിപാടിയില് പങ്കെടുക്കാറുള്ള നന്ദുകുമാര് ബി.ജെ.പിയാണോ. സജീവ സി.പി.എം പ്രവര്ത്തകനായ വിഷ്ണുകുമാര് എന്ന അഭി ബി.ജെ.പി പ്രവര്ത്തകനാണോയെന്ന് അദ്ദേഹം ചോദിച്ചു.
പായിപ്പാട് സ്വദേശിയായ പ്രമോദ് പ്രസന്നന് ബി.ജെ.പിയാണോ. ഇവരെല്ലാം സി.പി.എം പ്രവര്ത്തകരാണെന്ന് വ്യക്തമായിട്ടും ബി.ജെ.പിയുടെ പേര് അനാവശ്യമായി വലിച്ചിഴച്ചതിന് പൊലീസിനെ കൊണ്ട് മറുപടി പറയിപ്പിക്കുക തന്നെ ചെയ്യും. എ.കെ.ജി സെന്ററില് നിന്നും എഴുതിയ ഭോഷ്ക്ക് എഫ്.ഐ.ആര് ആണിതെന്നും സുരേന്ദ്രന് പറഞ്ഞു.
Discussion about this post