പൊലീസ് ഉദ്യോഗസ്ഥരെ അപായപ്പെടുത്താന് ഗൂഢാലോചന നടത്തിയെന്ന കേസില് തന്റെ പഴയ ഫോണുകള് അന്വേഷണസംഘത്തിന് മുന്നില് ഹാജരാക്കാനാവില്ലെന്ന് ദിലീപ്. നിലവിലെ കേസുമായി ബന്ധപ്പെട്ട തെളിവുകള് ഫോണില് ഇല്ലെന്നും അതിനാല് ആ ഫോണുകള് നല്കാനാവില്ലെന്നും ക്രൈംബ്രാഞ്ചിന്റെ നോട്ടീസിന് മറുപടിയായി ദിലീപ് അറിയിച്ചു.
തന്നോട് ഹാജരാക്കാന് ആവശ്യപ്പെട്ടത് ബാങ്കിംഗ് ആവശ്യത്തിന് ഉപയോഗിക്കുന്ന ഫോണാണ്. കൈവശമുള്ള മറ്റൊരു ഫോണില് ബാലചന്ദ്ര കുമാറിനെതിരായ തെളിവുകളാണ് ഉള്ളത്. ഇത് ശാസ്ത്രീയ പരിശോധനയ്ക്ക് അയച്ചിരിക്കുകയാണ്. പരിശോധനാ ഫലം കോടതിയില് നല്കാനാണ് തീരുമാനമെന്നും ദിലീപ് മറുപടിയില് പറയുന്നു.
അന്വേഷണ ഉദ്യോഗസ്ഥന് ബൈജു പൗലോസിന്റെ ഫോണ് പരിശോധിക്കണമെന്നും ദിലീപ് പറയുന്നു. തനിക്കെതിരായ ഗൂഢാലോചനയുടെ തെളിവ് അതിലുണ്ടെന്നാണ് ദിലീപ് അവകാശപ്പെടുന്നത്. വധഭീഷണി കേസിന് പിറകെ ദിലീപ് അടക്കമുള്ള പ്രതികള് ഫോണ് ഒളിപ്പിച്ചതിന് പിറകില് ആസൂത്രിക ഗൂഡാലോചനയെന്നാണ് അന്വേഷണ സംഘം പറയുന്നത്. ഫോണിലെ വിവരങ്ങള് നശിപ്പിക്കാന് സാധ്യതയുണ്ടെന്നും ദീലിപിനെ കസ്റ്റഡിയിലെടുത്ത് ചോദ്യം ചെയ്യണമെന്നും നാളെ ഹൈക്കോടതിയെ അറിയിക്കും.
Discussion about this post