കൊല്‍ക്കത്ത: പശ്ചിമബംഗാളിലെ ബര്‍ധ്വാന്‍ മെഡിക്കല്‍ കോളേജില്‍ വന്‍ തീപ്പിടിത്തം. കോവിഡ് രോഗികളുടെ വാര്‍ഡില്‍ ഉണ്ടായ തീപ്പിടിത്തത്തില്‍ ഒരാള്‍ മരിച്ച നിലയില്‍ കണ്ടെത്തി. കോവിഡ് ബാധിച്ച്‌ ചികിത്സയിലായിരുന്ന സന്ധ്യ റോയ് എന്ന 60-കാരിയാണ് മരിച്ചത്. ഈസ്റ്റ് ബര്‍ധ്വാന്‍ സ്വദേശിയാണ് സന്ധ്യ.
ആശുപത്രിയിലെ രാധാരണി വാര്‍ഡില്‍ ശനിയാഴ്ച പുലര്‍ച്ചെയാണ് തീപ്പിടിത്തം ഉണ്ടായത്. മഹാമാരിയുടെ പശ്ചാത്തലത്തില്‍ കൊറോണ രോഗികള്‍ക്കായി സജ്ജീകരിച്ച വാര്‍ഡാണിത്.
തീപ്പിടിത്തമുണ്ടായതോടെ രോഗിയുടെ ബന്ധുക്കള്‍ തീയണയ്‌ക്കാന്‍ ശ്രമം നടത്തിയെങ്കിലും പരാജയപ്പെടുകയായിരുന്നു. ശേഷം ഫയര്‍ഫോഴ്‌സ് ഉദ്യോഗസ്ഥരും പോലീസും സ്ഥലത്തെത്തിയാണ് രക്ഷാദൗത്യം നടത്തിയത്. ഒരു മണിക്കൂര്‍ നേരത്തെ പരിശ്രമത്തിന് ഒടുവില്‍ തീയണക്കുകയും ചെയ്തു.
Discussion about this post