ആലപ്പുഴയിലെ ജനറല് ആശുപത്രിയില് രോഗിയുടെ കൂട്ടിരിപ്പുകാരന്റെ തലയില് ഫാന് പൊട്ടിവീണു. തകഴി കേളമംഗലം പുത്തന്വീട്ടില് അജേഷിന്റെ തലയിലാണ് ഫാന് പൊട്ടിവീണതിനെ തുടര്ന്ന് പരിക്കേറ്റത്. അപകടത്തെ തുടര്ന്ന് ഇയാളുടെ തലയില് അഞ്ച് സ്റ്റിച്ചുകളാണ് ഇട്ടിരിക്കുന്നത്.
സഹോദരിക്ക് കൂട്ടിരിക്കാന് ആശുപത്രിയിലെത്തിയതായിരുന്നു അജേഷ്. ഇന്നലെയാണ് ബസ് യാത്രയ്ക്കിടെ തലചുറ്റല് അനുഭവപ്പെട്ടതിനെ തുടര്ന്ന അജേഷിന്റെ സഹോദരിയെ ആശുപത്രിയില് പ്രവേശിപ്പിച്ചത്. വിവരമറിഞ്ഞെത്തിയ അജേഷ് നിരീക്ഷണമുറിയില് സഹോദരിക്ക് സമീപം നില്ക്കുമ്പോഴാണ് കറങ്ങിക്കൊണ്ടിരുന്ന ഫാന് വലിയ ശബ്ദത്തോടെ പൊട്ടിവീണത്.
പഴക്കമുള്ള ദ്രവിച്ച ഫാനാണ് താഴെ വീണതെന്ന് രോഗികള് പറഞ്ഞു. ഇത് കറങ്ങുമ്പേള് വലിയ ശബ്ദം ഉണ്ടാകാരുണ്ടെന്നും ഇടക്കിടക്ക തനിയെ നിന്ന് പോകാറുണ്ടെന്നും രോഗികള് പറയുന്നു. അതേ സമയം കോവിഡ് നിയന്ത്രണങ്ങൾ പിൻവലിച്ച ശേഷം ഫാൻ ഉൾപ്പെടെ മുഴുവൻ ഇലക്ട്രിക് ഉപകരണങ്ങളും പരിശോധിച്ച് കുറ്റമറ്റതാണെന്ന് ഉറപ്പുവരുത്തിയിരുന്നതായി സ്ഥലം സന്ദർശിച്ച നഗരസഭാധ്യക്ഷ സൗമ്യരാജ് പറഞ്ഞു.
Discussion about this post