തിരുവനന്തപുരം: ലോക അത്‌ലറ്റിക് ചാമ്പ്യന്‍ഷിപ്പിൽ ചരിത്രമെഴുതിയ നീരജ് ചോപ്രയ്ക്ക് അഭിനന്ദനവുമായി അഞ്ജു ബോബി ജോര്‍ജ് രംഗത്ത്. മെഡലുമായി തിരിച്ചെത്തുന്ന നീരജിനെ സ്വീകരിക്കാന്‍ താനുമുണ്ടാകും എന്ന് അഞ്ജു പ്രതികരിച്ചു. ലോക അത്‌ലറ്റിക് ചാമ്പ്യന്‍ഷിപ്പില്‍ ജാവലിന്‍ ത്രോയില്‍ നീരജ് ചോപ്ര വെള്ളി മെഡല്‍ നേടിയതിന് പിന്നാലെയാണ് മുന്‍ ലോങ്ജമ്പ് താരമായ അഞ്ജു ബോബി ജോര്‍ജ് അഭിനന്ദനവുമായെത്തിയത്.
2003-ല്‍ ലോക അത്‌ലറ്റിക് ചാമ്പ്യന്‍ഷിപ്പില്‍ അഞ്ജു ബോബി ജോര്‍ജിന്റെ വെങ്കലത്തിന് ശേഷം ഇന്ത്യ നേടുന്ന രണ്ടാമത്തെ മെഡലാണിത്.
‘നീരജിന്റെ നേട്ടത്തില്‍ വളരെ സന്തോഷം. ഒരു വേള്‍ഡ് ലെവല്‍ മെഡലിന് വേണ്ടി കഴിഞ്ഞ 19 വര്‍ഷമായി കാത്തിരിക്കുകയായിരുന്നു. അത് നീരജിലൂടെ സാധിച്ചതില്‍ വളരെ സന്തോഷം. മെഡലുമായി തിരിച്ചെത്തുന്ന നീരജ് ചോപ്രയെ സ്വീകരിക്കാന്‍ ഞാനുമുണ്ടാകും’ എന്ന് അഞ്ജു ബോബി ജോര്‍ജ് പറഞ്ഞു. ലോങ്ജമ്പ് താരമായിരുന്ന അഞ്ജു ബോബി ജോര്‍ജ് 2003 പാരീസ് ലോക ചാമ്പ്യന്‍ഷിപ്പില്‍ 6.70 മീറ്റര്‍ ചാടിയാണ് വെങ്കലം നേടിയത്.
പുരുഷന്മാരുടെ ജാവലിന്‍ ത്രോയിലാണ് നീരജ് ചോപ്ര ലോക മീറ്റില്‍ വെള്ളി നേടിയത്. ഫൈനലില്‍ 88.13 മീറ്റര്‍ ദൂരം നേടിയ നീരജ് ലോക അത്‌ലറ്റിക് ചാമ്പ്യന്‍ഷിപ്പില്‍ വെള്ളി മെഡല്‍ നേടുന്ന ആദ്യ ഇന്ത്യന്‍ താരമെന്ന നേട്ടവും സ്വന്തമാക്കി. 90.54 മീറ്റര്‍ എറിഞ്ഞ ഗ്രാനഡയുടെ ലോക ചാമ്പ്യന്‍ ആന്‍ഡേഴ്‌സണ്‍ പീറ്റേഴ്‌സ് സ്വര്‍ണ്ണം നിലനിര്‍ത്തി. ചെക്ക് റിപ്പബ്ലിക്കിന്റെ ജാക്കൂബ് വാദ്‌ലെച്ച് 88.09 മീറ്ററോടെ വെങ്കലം നേടി. യോഗ്യതാ റൗണ്ടില്‍ 88.39 മീറ്റര്‍ ദൂരമെന്ന നേട്ടത്തിലൂടെയാണ് നീരജ് ഫൈനലിലെത്തിയത്.
Discussion about this post