കൊച്ചി: ലാവ്‌ലിന്‍ കേസില്‍ സര്‍ക്കാര്‍ നല്‍കിയ ഉപഹര്‍ജി പരിഗണിയ്ക്കുന്നത് ഹൈക്കോടതി രണ്ട് മാസത്തേക്ക് മാറ്റിവെച്ചു. സി.പി.എം പി.ബി അംഗം പിണറായി വിജയനടക്കമുള്ളവരെ കുറ്റവിമുക്തരാക്കികൊണ്ടുള്ള ഉത്തരവിനെ ചോദ്യം ചെയ്ത് നല്‍കിയ ഹര്‍ജിയാണ് മാറ്റിവെച്ചത്.
ഹര്‍ജി അടിയന്തരമായി പരിഗണിക്കേണ്ട സാഹചര്യമില്ലെന്ന് ജസ്റ്റിസ് പി. ഉബൈദിന്റെ ബെഞ്ച് വ്യക്തമാക്കി. കേസ് ഇപ്പോള്‍ പരിഗണിക്കേണ്ട സാഹചര്യം എന്താണെന്ന് കോടതി ചോദിച്ചു. 2000 മുതലുള്ള ഹര്‍ജികള്‍ കോടതിയില്‍ കെട്ടികിടക്കുകയാണ്. അതിനിടെയാണ് ഹര്‍ജി പരിഗണിക്കാന്‍ ആവശ്യപ്പെടുന്നത്. രാഷ്ട്രീയ ആവശ്യങ്ങള്‍ക്ക് വേണ്ടി കോടതിയെ ഉപയോഗിക്കരുതെന്നും ഡിവിഷന്‍ ബെഞ്ച് മുന്നറിയിപ്പ് നല്‍കി.
പിണറായി വിജയന്‍ അടക്കമുള്ളവരെ കുറ്റവിമുക്തരാക്കിയ പ്രത്യേക കോടതിയുടെ വിധിക്കെതിരെ സി.ബി.ഐയും ക്രൈം നന്ദകുമാറുമാണ് ഹൈക്കോടതിയെ സമീപിച്ചത്. ഹര്‍ജി പെട്ടെന്ന് തീര്‍പ്പാക്കണം എന്നു കാണിച്ച് സര്‍ക്കാര്‍ പിന്നീട് ഉപഹര്‍ജി സമര്‍പ്പിക്കുകയായിരുന്നു.
ലാവ് ലിന്‍ അഴിമതിക്ക് പിന്നില്‍ ക്രിമിനല്‍ ഗൂഢാലോചനയുണ്ടെന്നും പിണറായിക്കും മറ്റ് ഉദ്യോഗസ്ഥര്‍ക്കുമെതിരെ വ്യക്തമായ തെളിവുണ്ടായിട്ടും ഇവരെ കുറ്റവിമുക്തരാക്കി ഉത്തരവിട്ടെന്നുമാണ് സര്‍ക്കാറിന്റെയും സി.ബി.ഐയുടെയും വാദം.
Discussion about this post