ഓരോ വോട്ടും നിര്ണായകമായ ചെങ്ങന്നൂര് ഉപതിരഞ്ഞെടുപ്പില് പ്രവാസികള്ക്ക് പ്രത്യേക സൗകര്യങ്ങള് ഒരുക്കി മുന്നണികള്. ബ്രാഞ്ച് തലത്തില് പ്രവാസി വോട്ടര്മാരുടെ കണക്കെടുക്കല് വിദേശത്ത് എവിടെയെന്നതും ബന്ധപ്പെടാനുള്ള ഫോണ്നമ്പര് ശേഖരിക്കല് എന്നിവയൊക്കെ ഉഷാറായി നടക്കുന്നു
വോട്ടര്പ്പട്ടികയില് പേരുള്ള പ്രവാസികളെ ടിക്കറ്റ് നല്കി സ്ഥാലത്തെത്തിക്കാനുള്ള നീക്കമാണ് ഇതിനുപിന്നില്. ഇവര്ക്ക് വന്നുപോകാനുള്ള ടിക്കറ്റ് സൗജന്യമായി നല്കി പരമാവധി വോട്ട് സമാഹരിക്കുകയാണ് ലക്ഷ്യം. പാര്ട്ടികളുമായി ബന്ധമുള്ള അഭ്യുദയകാംക്ഷികളായിരിക്കും ടിക്കറ്റ് എടുത്തുകൊടുക്കുക. ഏതെങ്കിലും മുന്നണിയുടെ ചെലവിലെത്തുന്നവര് അവര്ക്കുതന്നെ വോട്ടുചെയ്യുമോ എന്നതു വേറെകാര്യം. മലപ്പുറം ജില്ലയില് ഇപ്രകാരം വോട്ടര്മാരെ കൊണ്ടുവരാറുള്ളതാണ് ചെങ്ങന്നൂരിലും മാതൃകയാക്കുന്നത്.
250 പേരെയെങ്കിലും സ്ഥലത്തെത്തിക്കാനാണ് സി.പി.എം. ലക്ഷ്യം. ബി.ജെ.പി. പരമാവധി പേരെ എത്തിക്കാനുള്ള ശ്രമത്തിലും. ഇന്ത്യയിലാകെ 24,348 പ്രവാസിവോട്ടര്മാരുള്ളതില് 23,556 പേരും കേരളത്തില്നിന്നാണ്. 96 ശതമാനം. എന്നാല്, ചെങ്ങന്നൂരില് പ്രവാസിവോട്ടര്മാര് എത്രയുണ്ടെന്നതിന് കണക്കുകള് ലഭ്യമല്ല.
ഇന്ത്യയില് മറ്റു സംസ്ഥാനങ്ങളില് ജോലിചെയ്യുന്ന മലയാളികള് വഴിയും സംഘപരിവാര് തിരഞ്ഞെടുപ്പുപ്രചാരണം നടത്തുന്നുണ്ട്. മഹാരാഷ്ട്ര, ഡല്ഹി, മധ്യപ്രദേശ്, ഗുജറാത്ത് തുടങ്ങിയ ഇടങ്ങളില് മലയാളികള് ഉള്പ്പെട്ട പരിവാര് പ്രസ്ഥാനങ്ങളിലൂടെയാണ് പ്രവര്ത്തനം. എല്ലാ മതവിഭാഗങ്ങളിലുംപെട്ടവര് ഉള്പ്പെട്ട കൂട്ടായ്മ നാട്ടിലുള്ള ബന്ധുക്കളിലൂടെ ബി.ജെ.പി.ക്കുവേണ്ടി വോട്ടുപിടിക്കുകയാണ് ചെയ്യുന്നത്.
Discussion about this post