ന്യൂഡൽഹി: ഇന്ത്യയിൽ ട്വിറ്ററിനു നിരോധനം ഏർപ്പെടുത്തണമെന്ന് ബോളിവുഡ് താരം കങ്കണ റണാവത്ത്. ട്വിറ്റർ ഹിന്ദുഫോബിയയും ദേശ വിരുദ്ധതയുമാണ് വെച്ചു പുലർത്തുന്നതെന്ന് ചൂണ്ടിക്കാട്ടിയാണ് താരം ഇക്കാര്യം ആവശ്യപ്പെട്ടത്. ട്വിറ്ററിൽ ലേ, ജമ്മു കശ്മീരിന്റെ ഭാഗമാക്കി ചിത്രീകരിച്ചതിനു പിന്നാലെയാണ് കങ്കണയുടെ പരാമർശം.
ജമ്മുകശ്മീരിന്റെ ഭാഗമായി കേന്ദ്രഭരണപ്രദേശമായ ലേ ചിത്രീകരിച്ച സംഭവത്തിൽ കേന്ദ്ര സർക്കാർ ട്വിറ്ററിനു നോട്ടീസ് അയച്ചിരുന്നു. കേന്ദ്ര ഐടി മന്ത്രാലയമാണ് അഞ്ചു ദിവസത്തിനുള്ളിൽ വിശദീകരണം നൽകണമെന്ന് വ്യക്തമാക്കി ട്വിറ്ററിനു നോട്ടീസയച്ചത്. നേരത്തെ, ചൈനയുടെ ഭാഗമായി ലേ, ട്വിറ്റർ ചിത്രീകരിച്ചതും വിവാദമായിരുന്നു. ഇതിനിടെ കഴിഞ്ഞ ദിവസം കേന്ദ്ര ആഭ്യന്തര മന്ത്രി അമിത് ഷായുടെ പ്രൊഫൈൽ ഫോട്ടോ ട്വിറ്റർ നീക്കം ചെയ്തിരുന്നു.
ഒരു ചിത്രത്തിന്റെ കോപ്പിറൈറ്റ് പ്രശ്നം ചൂണ്ടിക്കാട്ടിയായിരുന്നു ട്വിറ്ററിന്റെ നടപടി. എന്നാൽ, മനപ്പൂർവമല്ലാതെ സംഭവിച്ച പിഴവാണ് അക്കൗണ്ട് താൽക്കാലികമായി മരവിപ്പിക്കാൻ കാരണമെന്നും ഇപ്പോൾ അക്കൗണ്ട് പൂർണമായും പ്രവർത്തനസജ്ജമാണെന്നും പിന്നീട് ട്വിറ്റർ അറിയിച്ചു.
