നിയമസഭാ തെരഞ്ഞെടുപ്പിലെ ബിജെപിയുടെ പ്രകടനം വിലയിരുത്തുന്ന ഫേസ്ബുക്ക് പോസ്റ്റ് ശ്രദ്ധേയമാകുന്നു. ബിജെപിയുടെ പ്രകടനം വസ്തുതാപരമായി വിലയിരുത്തുന്ന ടി ആർ സോമശേഖരന്റെ ഫേസ്ബുക്ക് പോസ്റ്റാണ് ശ്രദ്ധേയമാകുന്നത്.
പോസ്റ്റിന്റെ പൂർണ്ണരൂപം: ബി ജെ പി തോറ്റിട്ടില്ല
ബി ജെ പി ഈ തെരഞ്ഞെടുപ്പിൽ തോറ്റിട്ടില്ല ; കാരണം , ബി ജെ പി മത്സരിച്ചിട്ടില്ല. പാർടി യെന്നാൽ നേതാക്കന്മാരും അണികളുംമാത്രമല്ല . ഇവ രണ്ടും ശരീരംമാത്രമാണു് . അതിനു് ആത്മാവുണ്ടു് . ആശയാദർശങ്ങൾ ; നയങ്ങൾ ; പരിപാടി ; ഭരണനേട്ടങ്ങൾ ഇവയെല്ലാമുൾപ്പെടുന്ന പാർടിജീവിതം രങ്ഗത്തു വന്നിട്ടില്ല . ജനങ്ങൾ വോട്ടു ചെയ്യുന്നതു ജീവനാണു് ; ജഡത്തിനല്ല. അതുകൊണ്ടാണു ബി ജെ പി മത്സരിച്ചിട്ടില്ല എന്നു പറഞ്ഞതു് .
ബി.ജെ.പിയുടെ ഭരണനേട്ടങ്ങൾ കേന്ദ്രത്തിലും സംസ്ഥാനങ്ങളിലും എന്തൊക്കെയാണു് ; കേരളത്തിൻെറ പ്രശ്നങ്ങളെപ്പറ്റി ബി.ജെ.പിയുടെ പഠനമെന്താണു് ; കേരളത്തിൻെറ വികസനത്തിനു് എന്താണു പദ്ധതി ; കഴിഞ്ഞ അഞ്ചു വർഷത്തെ കേരളഭരണത്തിൻെറ ദോഷങ്ങളെന്തൊക്കെ – ഇത്തരം വിഷയങ്ങൾ ജനങ്ങളുടെ ചിന്താവിഷയമാക്കാൻ ശ്രമമുണ്ടായിട്ടില്ല .
ജീവിതഗന്ധിയായ രാഷ്ട്രീയത്തിനേ വോട്ടു കിട്ടൂ . ജനതാജീവിതവുമായി ബന്ധമില്ലാത്ത വിഷയങ്ങൾ പറഞ്ഞു വോട്ടു നേടാൻ പറ്റില്ല .
ഭാരതത്തിൽ ജനങ്ങൾക്കുവേണ്ടി ഭരണമാരംഭിച്ചതു 2014-ൽ മോദിജിയാണു് . ഇതുകൊണ്ടു ജനങ്ങൾക്കുണ്ടാകുന്ന നേട്ടമെന്തെന്നു കേരളീയർക്കു് അറിയാൻ വഴിയില്ല. മാദ്ധ്യമങ്ങളിൽ വരുന്നില്ല. കേരളത്തിൽ നടപ്പാക്കുന്നതു പേരു മാറ്റി സംസ്ഥാനത്തിൻേറതുപോലെയാക്കി കേരളത്തെ കബളിപ്പിക്കുന്നു . ഇതൊക്കെ ജനങ്ങളെ ബോധിപ്പിച്ചിട്ടല്ലേ ബി.ജെ.പിക്കു വോട്ടു ചെയ്യണമെന്ന മനോഭാവം ഉണ്ടാക്കേണ്ടതു് ?
വോട്ടറെ വിദ്യാഭ്യാസം ചെയ്യിക്കുന്നതാണു് തെരഞ്ഞെടുപ്പിൻെറ ഒന്നാമത്തെ പടി . 2014-ലെ പാർല്യമെൻറു തെരഞ്ഞെടുപ്പിൽ 4500 റാലികളിലും മോദിജി ചെയ്തതു് ഇതാണു് . വോട്ടർമാരോടു് തങ്ങളുടെ താത്പര്യമാകുന്ന രാഷ്ട്രതാത്പര്യത്തിനു് വോട്ടു ചെയ്യാനുള്ള അദ്ദേഹത്തിൻെറ ആഹ്വാനത്തിൽനിന്നു പ്രവർത്തകർ ഇതിൻെറ മൂലതത്ത്വം പഠിക്കേണ്ടതായിരുന്നു .
ഇവിടെ തെരഞ്ഞെടുപ്പിനിറങ്ങിയതു പാർടിയായിരുന്നില്ല ; പാർടിക്കാരുടെ മതമായിരുന്നു . ആ മതമാണു തോറ്റതു് .അതു് ഇനി ഇറങ്ങിയാലും തോല്ക്കും .അടിസ്ഥാനപരമായ പരാജയസ്ഥാനമേതാണെന്നറിയണം .ജനതാത്പര്യത്തിൻെറ സംരക്ഷണമായിരുന്നില്ല ലക്ഷ്യമായി പ്രചരിപ്പിച്ചതു് ; ആചാരസംരക്ഷണമായിരുന്നു. ദുർഭരണത്തിൽനിന്നു ജനക്ഷേമകരമായ ഭരണത്തിലേക്കു മാറ്റമുണ്ടാകുമെന്ന പ്രതീക്ഷക്കു വക നല്കുന്ന ഒന്നും പ്രചരണത്തിലുണ്ടായിരുന്നില്ല.
കേരളത്തിൽ ബി.ജെ.പി വളരണമെങ്കിൽ ഏറ്റവും ഉന്നതനായ നേതാവുമുതൽ ഏറ്റവും താഴെയുള്ള പ്രവർത്തകനുവരെ വിശദമായ രാഷ്ടീയവിദ്യാഭ്യാസം കൊടുക്കണം. അതിനു ശിക്ഷകരായി കേന്ദ്രത്തിൽനിന്നും മറ്റുസംസ്ഥാനങ്ങളിൽനിന്നും ആളുകൾ വരണം . ഇവിടെ വിദ്യ കിട്ടേണ്ടവരേയുള്ളൂ ; കൊടുക്കാൻ പ്രാപ്തിയുള്ളവരില്ല.
അങ്ങനെയൊന്നു് – പറയപ്പെട്ട രാഷ്ട്രീയവിദ്യാഭ്യാസം – ഉണ്ടായാൽ യഥാർഥരാഷ്ട്രതത്ത്വത്തിൻെറ അടിസ്ഥാനത്തിൽ സമാജപുനാരചന ചെയ്യാൻവേണ്ട കാഴ്ചപ്പാടും കഴിവുമുണ്ടാകും . സമാജത്തെ നയിക്കാൻ സാമർത്ഥ്യമുള്ള പ്രവർത്തകസമ്പത്തുള്ള യഥാർഥരാഷ്ട്രീയകക്ഷിയായി ബി.ജെ.പിയെ മാറ്റാൻ ഇതേ വഴിയുള്ളൂ . അതിനു ശേഷമേ തെരഞ്ഞെടുപ്പിൽ വിജയവുംമറ്റും പ്രതീക്ഷിക്കേണ്ടൂ .
https://www.facebook.com/somasekharantr.nil/posts/586838848958980
