ഡി വൈ എഫ് ഐ അഖിലേന്ത്യ നേതൃത്വത്തിൽ മാറ്റത്തിന് സാധ്യതയെന്ന് റിപ്പോർട്ട്. പൊതുമരാമത്ത് വകുപ്പ് മന്ത്രിയെന്ന നിലയിൽ റിയാസിന് കൂടുതൽ ഉത്തരവാദിത്വങ്ങൾ നിറവേറ്റാനുള്ളതിനാൽ അഖിലേന്ത്യ അധ്യക്ഷ പദവിയൊഴിയാൻ ഇദ്ദേഹം ഒരുങ്ങുന്നതെന്നാണ് റിപ്പോർട്ട് . അടുത്തയാഴ്ച ചേരുന്ന ഡി വൈ എഫ് ഐ കേന്ദ്ര കമ്മിറ്റി യോഗത്തിലാകും ഇതുസംബന്ധിച്ച തീരുമാനമുണ്ടാവുക.
ഡി വൈ എഫ് ഐ കേരള സംസ്ഥാന സെക്രട്ടറി എ എ റഹിം അഖിലേന്ത്യ അധ്യക്ഷനായേക്കുമെന്നാണ് റിപ്പോർട്ടുകൾ. ഡി വൈ എഫ് ഐ അഖിലേന്ത്യ അധ്യക്ഷനായ പി എ മുഹമ്മദ് റിയാസ് രണ്ടാം പിണറായി സർക്കാരിൽ പൊതുമരാമത്ത്- ടൂറിസം വകുപ്പുകളുടെ ചുമതലയുള്ള മന്ത്രിയാണ്. ബേപ്പൂർ നിയോജക മണ്ഡലത്തിൽ നിന്നാണ് ഇദ്ദേഹം നിയമസഭയിലെത്തിയത്.
എസ് എഫ് ഐ സംസ്ഥാന വൈസ് പ്രഡിഡന്‍റ്, കേന്ദ്ര കമ്മിറ്റിഅംഗം, ഡി വൈ എഫ് ഐ ജില്ലാ പ്രസിഡന്‍റ്, കേന്ദ്ര കമ്മിറ്റി അംഗം, കേരള സർവകലാശാല സിൻഡിക്കേറ്റ് അംഗം തുടങ്ങിയ പദവികൾ റഹിം വഹിച്ചിട്ടുണ്ട്. 2011ലെ നിയമസഭ തെരഞ്ഞെടുപ്പിൽ വർക്കല നിയോജക മണ്ഡലത്തിൽ നിന്നും മത്സരിച്ചെങ്കിലും പരാജയപ്പെടുകയായിരുന്നു.
2017 ലാണ് ഡി വൈ എഫ് ഐയുടെ അഖിലേന്ത്യാ പ്രസിഡന്‍റായി പി എ മുഹമ്മദ് റിയാസിനെ തെരഞ്ഞെടുത്തത്. അതിനു മുമ്പ് നിലവിലെ കേരള സ്പീക്കർ എം ബി രാജേഷായിരുന്നു ഡി വൈ എഫ് ഐ ദേശീയ പ്രസിഡന്‍റ്. മുൻ സ്പീക്കർ പി ശ്രീരാമകൃഷ്ണൻ, കെ എൻ ബാലഗോപാൽ എന്നിവരായിരുന്നു രാജേഷിന് മുമ്പ് സംഘടനയുടെ അഖിലേന്ത്യ അധ്യക്ഷ പദത്തിൽ.
എ എ റഹീമിന് പുറമെ ഡി വൈ എഫ് ഐ സംസ്ഥാന സെക്രട്ടറിയേറ്റ് അംഗം ജെയ്ക് സി തോമസും ദേശീയ നേതൃത്വത്തിലേക്ക് എത്തിയേക്കുമെന്നും റിപ്പോർട്ടുകൾ പറയുന്നു. റഹിം ഡി വൈ എഫ് ഐ ദേശീയ അധ്യക്ഷനായാൽ സംസ്ഥാന നേതൃനിരയിലും മാറ്റമുണ്ടാകും.
