ഹൈദരാബാദ്: വിവാഹ നിശ്ചയ ദിനത്തില്‍ വീട്ടില്‍ അതിക്രമിച്ച കയറിയ സംഘം യുവതിയ തട്ടിക്കൊണ്ടുപോയി. വീട്ടുകാരും നാട്ടുകാരും നോക്കിനില്‍ക്കവേയാണ് സംഭവം. തെലങ്കാനയില്‍ 24കാരിയായ ദന്ത ഡോക്ടറെയാണ് നൂറോളം യുവാക്കള്‍ അടങ്ങിയ സംഘം പട്ടാപ്പകല്‍ തട്ടിക്കൊണ്ടുപോയത്.
ഹൈദരാബാദിന് സമീപം ആദിബത്‌ല ഗ്രാമത്തില്‍ ഹൗസ് സര്‍ജനായി ജോലി ചെയ്തുവന്ന യുവതിയെ പിടിച്ചുകൊണ്ടുപോകുന്ന ദൃശ്യങ്ങള്‍ അടങ്ങിയ വീഡിയോ സാമൂഹ്യമാധ്യമങ്ങളില്‍ വൈറലായിരിക്കുകയാണിപ്പോള്‍. സ്ത്രീകള്‍ അടക്കമുള്ള ബന്ധുക്കളെ അക്രമി സംഘം മര്‍ദിക്കുന്നതായും വീടും കാറും ഉള്‍പ്പെടെയുള്ളവ നശിപ്പിക്കുന്നതായും വീഡിയോയില്‍ കാണാം. യുവതിയെ വിവാഹം കഴിക്കണമെന്ന് ആവശ്യപ്പെട്ട് നിരന്തരം ശല്യം ചെയ്തിരുന്ന നവീന്‍ റെഡ്ഡി എന്നയാളാണ് ഇതിനു പിന്നിലെന്ന് വീട്ടുകാര്‍ ആരോപിച്ചു. ഇവരുടെ വീടിനു മുന്നില്‍ റെസ്റ്റൊറന്റ് നടത്തുകയാണ് ഇയാള്‍. ഭാര്യ തനിക്കൊപ്പം ജീവിക്കാന്‍ തയാറാകുന്നില്ലെന്ന് തെറ്റിദ്ധരിപ്പിച്ച് റെസ്റ്റൊറന്റിലെ ജോലിക്കാര്‍ അടക്കമുള്ളവരെയും കൂട്ടിയാണ് ഇയാള്‍ വീട്ടിലെത്തിയതെന്നും വീട്ടുകാര്‍ നല്‍കിയ പരാതിയില്‍ പറയുന്നു. യുവതി നവീനുമായി മുമ്പ് പ്രണയത്തിലായിരുന്നെങ്കിലും വിവാഹം കഴിച്ചിരുന്നില്ല, പിന്നീട് ബന്ധത്തില്‍ നിന്നും പിന്‍മാറി മറ്റൊരു വിവാഹത്തിനുള്ള ഒരുക്കത്തിലായിരുന്നു. തട്ടിക്കൊണ്ടുപോയി മണിക്കൂറുകള്‍ക്ക് ശേഷം യുവതിയെ അക്രമികളുടെ കൈയില്‍ നിന്നും പോലീസ് മോചിപ്പിച്ചു. സംഭവത്തില്‍ 18ഓളം പേരെ അറസ്റ്റ് ചെയ്തിട്ടുണ്ട്. എന്നാല്‍ നവീന്‍ ഇപ്പോഴും ഒളിവിലാണ്.
