ദുബായ്: ലോകത്തെവിടെയുമുള്ള ആളുകള്‍ക്ക് വീഡിയോ കോളിലൂടെ വിസ നടപടിക്രമങ്ങള്‍ പൂര്‍ത്തിയാക്കാന്‍ അവസരമൊരുക്കി ദുബായ്. രാജ്യത്തിനകത്തും പുറത്തും ഉള്ള ഉപഭോക്താക്കള്‍ക്ക് ദുബായിലെ ജനറല്‍ ഡയറക്ടറേറ്റ് ഓഫ് റെസിഡന്‍സി ആന്‍ഡ് ഫോറിന്‍ അഫയേഴ്‌സുമായി(ജിഡിആര്‍എഫ്എ) നേരിട്ട് ആശയവിനിമയം നടത്തുന്നതിനുള്ള സൗകര്യമാണ് ഒരുങ്ങിയിരിക്കുന്നത്. ഈ സാങ്കേതികവിദ്യ മുഖേന ഉപഭോക്താക്കള്‍ക്ക് രേഖകള്‍ സമര്‍പ്പിക്കാനും ദുബായിലെ താമസവുമായി ബന്ധപ്പെട്ട അപേക്ഷാ നടപടിക്രമങ്ങള്‍ പൂര്‍ത്തിയാക്കാനും സാധിക്കും.
ജിഡിആര്‍എഫ്എ സംഘടിപ്പിച്ച പരിപാടിയിലാണ് ഈ പദ്ധതി അവതരിപ്പിക്കപ്പെട്ടത്. ഉപഭോക്തൃ സേവന കേന്ദ്രങ്ങള്‍ സന്ദര്‍ശിക്കാതെ തന്നെ, കയ്യിലെ സ്മാര്‍ട്ട്‌ഫോണ്‍ ഉപയോഗിച്ച് ജിഡിആര്‍എഫ്എയ്ക്ക് അഞ്ച് മിനിട്ട് കൊണ്ട് രേഖകള്‍ സമര്‍പ്പിക്കാനാകുന്ന സംവിധാനമാണിത്.
ജിഡിആര്‍എഫ്എയുടെ എല്ലാ സേവനങ്ങളും ക്രമേണ വീഡിയോ കോളിലൂടെ പൂര്‍ത്തിയാക്കാന്‍ പുതിയ സംവിധാനം സഹായകരമാകുമെന്ന് ജിഡിആര്‍എഫ്എ ഡയറക്ടര്‍ ജനറല്‍ ലഫ്.ജനറല്‍ മുഹമ്മദ് അഹമ്മദ് അല്‍ മാരി പറഞ്ഞു. അപേക്ഷ സമയത്ത് ഏതെങ്കിലും രേഖകള്‍ ഹാജരാക്കാന്‍ സാധിച്ചില്ലെങ്കില്‍ ഇത് പിന്നീട് ചാറ്റ് ബോക്‌സിലൂടെ അയക്കാനും കഴിയും
