യുഎഇയിലേക്ക് വരികയോ യുഎഇയില്‍ നിന്ന് പോകുകയോ ചെയ്യുന്ന യാത്രികര്‍ 60,000 ദിര്‍ഹമോ (13.5 ലക്ഷത്തിലധികം രൂപ ) ഇതിന് തത്തുല്യമായ മറ്റേതെങ്കിലും കറന്‍സിയോ ആസ്തികളോ വിലപിടിപ്പുള്ള ലോഹമോ കല്ലുകളോ കൈവശം വെക്കുകയാണെങ്കില്‍ അക്കാര്യം കസ്റ്റംസിന് മുമ്പാകെ ഡിക്ലയര്‍ ചെയ്യണമെന്ന് ഓര്‍മ്മിപ്പിച്ച് യുഎഇ കസ്റ്റംസ്. സുരക്ഷിത യാത്ര ഉറപ്പാക്കുന്നതിനായി എല്ലാ യാത്രികരും നിയമപ്രകാരമുള്ള കസ്റ്റംസ് പരിശോധനകളുമായി സഹകരിക്കണമെന്നും അധികൃതര്‍ വ്യക്തമാക്കി.
യുഎഇ യാത്രികര്‍ക്ക് പണം കൈവശം വെക്കുന്നതിന് നിയന്ത്രണമില്ല. എന്നാല്‍ 60,000 ദിര്‍ഹത്തില്‍ കൂടുതല്‍ ഉണ്ടെങ്കില്‍ അക്കാര്യം കസ്റ്റംസിനെ അറിയിക്കണം. പതിനെട്ട് വയസ് കഴിഞ്ഞ എല്ലാവര്‍ക്കും ഈ നിയമം ബാധകമാണ്. അഫ്‌സ സംവിധാനത്തിലൂടെയോ രാജ്യത്തെ അതിര്‍ത്തി പോയിന്റുകളില്‍ ഉള്ള മറ്റ് പ്രഖ്യാപന (ഡിസ്‌ക്ലോഷര്‍) സംവിധാനങ്ങളിലൂടെയോ ഡിക്ലറേഷന്‍ നടത്താം.
പതിനെട്ട് വയസില്‍ താഴെയുള്ള, കുട്ടികളും കൗമാരക്കാരും ഉള്‍പ്പടെയുള്ളവര്‍ കൈവശം വെക്കുന്ന പണം, വിലപിടിപ്പുള്ള മറ്റുള്ള സാധനങ്ങള്‍ എന്നിവ ഒപ്പമുള്ള മാതാപിതാക്കളുടേതോ കൂടെയുള്ളവരുടേതോ ആയി കണക്കാക്കും. ഐസിഎ വെബ്‌സൈറ്റിലൂടെയോ സ്മാര്‍ട്ട് മൊബൈല്‍ ആപ്ലിക്കേഷനിലൂടെയോ യാത്രക്കാര്‍ക്ക് എളപ്പത്തില്‍ വസ്തുവകകളും കറന്‍സിയും ഡിക്ലയര്‍ ചെയ്യാം. യാത്ര തുടങ്ങുന്നതിന് മിനിട്ടുകള്‍ക്ക് മുമ്പോ യാത്രയ്ക്കിടയിലോ ഇതിന് അവസരമുണ്ട്.
