ഹൈദരാബാദ്: തിരുപ്പതി ക്ഷേത്രത്തിർ ദർശനം നടത്തി നടി കീർത്തി സുരേഷ്. കുടുംബത്തോടൊപ്പം രാവിലെയായിരുന്നു നടി ക്ഷേത്രത്തിൽ എത്തിയത്. താരത്തിന്റെ ക്ഷേത്ര ദർശനത്തിന്റെ ചിത്രങ്ങളും വീഡിയോകളും സമൂഹമാദ്ധ്യമങ്ങളിൽ വ്യാപകമായി പ്രചരിക്കുന്നുണ്ട്.
പിതാവും നിർമ്മാതാവുമായ സുരേഷ് കുമാർ, മാതാവും നടിയുമായ മേനക, സഹോദരി രേവതി എന്നിവർക്കൊപ്പമായിരുന്നു താരം തിരുപ്പതിയിൽ എത്തിയത്. ഇവിടെ വിവിധ പൂജകളിൽ നടിയും കുടുംബവും പങ്കെടുത്തു. തിരുപ്പതി ഭഗവാന് വഴിപാടുകൾ നേർന്ന ശേഷമായിരുന്നു താരവും കുടുംബവും ക്ഷേത്രത്തിൽ നിന്നും മടങ്ങിയത്. ക്ഷേത്രത്തിലെ രംഗനായകർ മണ്ഡപത്തിൽ നടിയും കുടുംബവും തീർത്ഥ പ്രസാദവും സ്വീകരിച്ചു. ക്ഷേത്രത്തിന് പുറത്ത് ആരാധകർക്കൊപ്പം സെൽഫി എടുത്ത ശേഷമായിരുന്നു കീർത്തി സുരേഷ് വാഹനത്തിൽ കയറിയത്.
താൻ ഏറെ നാളായി തിരുപ്പതി ഭഗവാന്റെ ഭക്തയാണെന്ന് ക്ഷേത്ര ദർശനം കഴിഞ്ഞ് മടങ്ങും വഴി കീർത്തി സുരേഷ് മാദ്ധ്യമങ്ങളോട് പ്രതികരിച്ചു. കുറേ കാലമായി ക്ഷേത്രത്തിൽ വരണമെന്ന് ആഗ്രഹിക്കുന്നു. രേവതി സംവിധാനം ചെയ്യുന്ന ഷോർട്ട് ഫിലിമിലിമിലും ബോലോ ശങ്കർ എന്ന ചിത്രത്തിലുമാണ് ഇപ്പോൾ അഭിനയിക്കുന്നത് എന്നും തീർത്തി വ്യക്തമാക്കി.
അടുത്തിടെ വ്യാപാരിയും കീർത്തിയുടെ സുഹൃത്തുമായ ഫർഹാനുമായി പ്രണയത്തിലാണെന്ന തരത്തിൽ വിവാദം ഉടലെടുത്തിരുന്നു. ഇത് വലിയ ചർച്ചാ വിഷയം ആയതോടെ വ്യാജ പ്രചാരണമാണെന്ന് വ്യക്തമാക്കി സുരേഷ് കുമാർ രംഗത്ത് എത്തിയിരുന്നു. ഇതിന് പിന്നാലെയാണ് നടി കുടുംബ സമേതം ക്ഷേത്രത്തിൽ എത്തുന്നത്.
