നിലവിൽ ഇന്ത്യയിലെ മാത്രം കണക്കെടുത്താൽ വന്ധ്യത എന്ന കാരണത്താൽ ബുദ്ധിമുട്ട് അനുഭവിക്കുന്നവർ ലക്ഷക്കണക്കിന് പേരുണ്ടെന്നാണ് പല സർവ്വേകളും കാണിക്കുന്നത്. ലക്ഷക്കണക്കിന് കുടുംബങ്ങളുടെ സ്വപ്നങ്ങൾ കൂടിയാണ് വന്ധ്യത ഇല്ലാതാക്കുന്നത്. 12 മാസമോ അതിലധികമോ നീളുന്ന സ്ഥിരമായ ലൈംഗികബന്ധങ്ങൾക്ക് ശേഷവും ഗർഭധാരണം ഉണ്ടാകാത്ത അവസ്ഥയെ ആണ് വന്ധ്യത ആയി നിർവചിച്ചിട്ടുള്ളത്. വന്ധ്യത ഇന്നത്തെ കാലത്ത് വളരെ സാധാരണമായ ഒരു അവസ്ഥയാണ്. എന്നാൽ സഹസ്രാബ്ദങ്ങൾക്ക് മുൻപ് രചിക്കപ്പെട്ട പ്രാചീന ഗ്രന്ഥമായ അഥർവവേദത്തിൽ വന്ധ്യതയുടെ ചികിത്സയുടെ പ്രസക്തിയെക്കുറിച്ചുള്ള വിപുലമായ വിവരങ്ങൾ കാണാൻ കഴിയുന്നതാണ്.
വന്ധ്യതയ്‌ക്കെതിരായ പോരാട്ടത്തിലും സ്വാഭാവിക ഗർഭധാരണം കൈവരിക്കുന്നതിലും ആയുർവേദത്തിന് എങ്ങനെ സ്വാധീനം ചെലുത്താൻ കഴിയുമെന്ന് നമുക്കൊന്ന് നോക്കാം. സ്വാഭാവിക ഗർഭധാരണം കൈവരിക്കുന്നതിന് തടസമാകുന്ന വിവിധ കാരണങ്ങളുണ്ട് . പ്രോലക്റ്റിന്റെ അളവ്, പോളിസിസ്റ്റിക് ഓവേറിയൻ സിൻഡ്രോം (PCOS), ഫൈബ്രോയിഡുകൾ, എൻഡോമെട്രിയോസിസ്, പെൽവിക് ഇൻഫ്ലമേറ്ററി ഡിസോർഡേഴ്സ്, അൺ ഓവുലേഷൻ, ബീജങ്ങളുടെ എണ്ണംകുറവ്, ബീജങ്ങളുടെ ചലനശേഷി, ഫാലോപ്യൻ ട്യൂബ് തടസ്സങ്ങൾ തുടങ്ങിയ നിരവധി കാരണങ്ങൾ ഗർഭധാരണം തടസ്സപ്പെടുത്തുന്നതാണ്.
സ്വാഭാവിക ഗർഭധാരണത്തിന് ചില അവശ്യ ഘടകങ്ങൾ വേണ്ടതായി പറയപ്പെടുന്നു. സമയബന്ധിതമായ അണ്ഡോത്പാദനം, അണ്ഡത്തിന്റെ വളർച്ചയും വികാസവും , മതിയായ കട്ടിയുള്ള എൻഡോമെട്രിയം, ശരിയായ ഗർഭാശയ പോഷകാഹാരം എന്നിങ്ങനെയുള്ള നിരവധി ഘടകങ്ങൾ ഗർഭധാരണത്തെ സഹായിക്കുന്നവയാണ്. ഉദാസീനമായ ജീവിതശൈലി, ഉയർന്ന സമ്മർദം, ക്രമരഹിതമായ ഭക്ഷണ ശീലങ്ങൾ എന്നിവ സ്ത്രീകളുടെയും പുരുഷന്മാരുടെയും ദഹന, പ്രത്യുൽപാദന സംവിധാനങ്ങളെ പ്രതികൂലമായി ബാധിക്കുന്നതാണ്. ഈ കാലഘട്ടത്തിൽ വന്ധ്യതയുടെ നിരക്ക് വർദ്ധിക്കുന്നതിന് ഇതൊരു സുപ്രധാന കാരണമാണ്.
ആയുർവേദം അനുസരിച്ച് ഗർഭധാരണത്തിനു മുൻപായി ഗർഭപാത്രത്തെ ഒരുക്കലാണ് പ്രത്യുൽപാദനക്ഷമത കൈവരിക്കുന്നതിനുള്ള ഏറ്റവും പ്രധാനപ്പെട്ട ഘടകം. ത്രിദോഷങ്ങളായ വാത, പിത്ത, കഫ എന്നിവയെ സന്തുലിതാവസ്ഥയിൽ നിലനിർത്തി ശരീരത്തിൽ നിന്ന് എല്ലാ വിഷവസ്തുക്കളെയും നീക്കം ചെയ്യുകയും ആർത്തവചക്രം ക്രമപ്പെടുത്തുകയും ചെയ്യുന്നതാണ് ആയുർവേദത്തിൽ വന്ധ്യതാ ചികിത്സയുടെ ആദ്യപടിയായി പറയപ്പെടുന്നത്.
വളർച്ചാ ഹോർമോണുകളുടെ ഉത്പാദനം വർദ്ധിപ്പിക്കുന്നതിനും പ്രത്യുൽപാദനക്ഷമത വർദ്ധിപ്പിക്കുന്നതിനും കഴിക്കുന്ന പ്രകൃതിദത്തമായ ഔഷധങ്ങളാണ് ആയുർവേദത്തിലെ വന്ധ്യതാ ചികിത്സയുടെ മറ്റൊരു പടി. പുരുഷന്മാരുടെ പ്രത്യുൽപാദനശേഷി വർധിപ്പിക്കുന്നതിനും പുരുഷ ശരീരത്തിലെ ബീജങ്ങളുടെ എണ്ണം വർധിപ്പിക്കുന്നതിനും കഴിയുന്ന ഔഷധങ്ങൾ ആയുർവേദം വാഗ്ദാനം ചെയ്യുന്നുണ്ട്. സ്ത്രീകളിലെ വന്ധ്യത ചികിത്സിക്കാനുള്ള പ്രകൃതിദത്ത ഔഷധങ്ങളും ആയുർവേദത്തിൽ രേഖപ്പെടുത്തിയിട്ടുണ്ട്. ഇതിലൂടെ സ്വാഭാവിക ഗർഭധാരണത്തിനായി പരിശ്രമിക്കുന്ന ദമ്പതികൾക്ക് ആയുർവേദം ആശ്വാസകരമാകുന്നതായി പറയപ്പെടുന്നു.
