എറണാകുളം: അലക്ഷ്യമായി കാറോടിച്ച് അപകടം ഉണ്ടാക്കിയ സംഭവത്തിൽ നടൻ
സുരാജ് വെഞ്ഞാറമ്മൂടിനെതിരെ കർശന നടപടികൾ സ്വീകരിച്ചേക്കുമെന്ന് സൂചന. നടന്റെ ലൈസൻസ് സസ്‌പെൻഡ് ചെയ്യാനാണ് സാദ്ധ്യത. ഇതുമായി ബന്ധപ്പെട്ട് മോട്ടോർവാഹന വകുപ്പ് ചർച്ച ചെയ്ത് തീരുമാനം എടുക്കും.
അപകട ശേഷം നടത്തിയ പ്രാഥമിക അന്വേഷണത്തിൽ ഗതാഗത നിയമം പാലിക്കുന്നതിൽ നടന്റെ ഭാഗത്ത് വീഴ്ച സംഭവിച്ചതായി വ്യക്തമായിരുന്നു. ഇതേ തുടർന്നാണ് കർശന നടപടിയിലേക്ക് കടക്കുന്നത്. സംഭവത്തിൽ ഇന്നലെ രാത്രി പോലീസ് കേസും എടുത്തിരുന്നു. അലക്ഷ്യമായി വാഹനം ഓടിച്ച് അപകടം ഉണ്ടാക്കിയതിനാണ് കേസ്. ബോധവത്കരണ ക്ലാസിൽ പങ്കെടുക്കാൻ സുരാജിന് നിർദ്ദേശം നൽകുമെന്നും സൂചനയുണ്ട്.
ശനിയാഴ്ചയായിരുന്നു സുരാജിന്റെ വാഹനം ഇടിച്ച് ബൈക്ക് യാത്രികന് പരിക്കേറ്റത്. മഞ്ചേരി സ്വദേശി ശരത്തിനാണ് പരിക്കേറ്റത്. അപകടത്തിൽ സാരമായി പരിക്കേറ്റ ശരത്ത് ഇപ്പോഴും ആശുപത്രിയിൽ ചികിത്സയിലാണ്. കാലിലെ എല്ലുകൾക്ക് പൊട്ടലുണ്ട്. അതേസമയം സുരാജിന്റെ കാർ മോട്ടോർ വാഹനവകുപ്പ് പരിശോധിച്ചു. നടന് കാരണം കാണിക്കൽ നോട്ടീസ് നൽകുമെന്നാണ് വിവരം.
