പച്ചയായ കായ്ക്കനികള്‍ മാത്രം അടങ്ങിയ ഡയറ്റ് പിന്തുടര്‍ന്നിരുന്ന ഒരു വീഗന്‍ ഫുഡ് ഇന്‍ഫ്‌ളുവന്‍സര്‍ മതിയായ ആഹാരം കഴിക്കാത്തതിനെ തുടര്‍ന്നുള്ള ആരോഗ്യപ്രശ്‌നങ്ങള്‍ മൂലം മരണമടഞ്ഞ വാര്‍ത്ത ലോകം ഞെട്ടലോടെയാണ് കേട്ടത്. വര്‍ഷങ്ങളായി വേവിക്കാത്ത ആഹാരസാധനങ്ങള്‍ കഴിച്ചിരുന്ന സന്ന ഡി ആര്‍ട്ട് എന്ന പേരില്‍ അറിയപ്പെട്ടിരുന്ന മുപ്പത്തിയേഴുകാരി പ്രധാനമായും പഴങ്ങളും പഴച്ചാറുകളും മാത്രമാണ് കഴിച്ചിരുന്നത്. ആരോഗ്യകരമായ ഭക്ഷണരീതിയാണ് തന്റേതെന്നും യുവത്വം നിലനിര്‍ത്താന്‍ അത് സഹായകമാകുമെന്നുമാണ് മരണം വരെ അവര്‍ വിശ്വസിച്ചിരുന്നത്.
എന്നാല്‍ സന്നയുടേത് പോലുള്ള കഠിനമായ ആഹാരക്രമങ്ങള്‍ക്ക് അഥവാ ഡയറ്റുകള്‍ക്ക് പാര്‍ശ്വഫലങ്ങളും ഉണ്ടെന്നാണ് ആരോഗ്യവിദഗ്ദ്ധര്‍ അഭിപ്രായപ്പെടുന്നത്. ശരീരത്തിന്റെ ശരിയായ പ്രവര്‍ത്തനത്തിനും രോഗപ്രതിരോധത്തിനും സന്തുലിതമായ ആഹാരക്രമവും കൃത്യമായ പോഷകഹാരവും ആവശ്യമാണെന്നിരിക്കെ ചില ഡയറ്റുകള്‍ ശരീരത്തെ അനാരോഗ്യത്തിലേക്ക് എത്തിക്കും. ഇക്കാലത്ത് വണ്ണം കുറയ്ക്കുന്നതിന്‌റെ ഭാഗമായി പലരും കലോറി വളരെ കുറഞ്ഞ ഭക്ഷണങ്ങള്‍ മാത്രം കഴിക്കാറുണ്ട്. എന്നാല്‍ അത്തരം ഡയറ്റുകളില്‍ ശരീരത്തിന് ആവശ്യമായ എല്ലാ പോഷകങ്ങളും ഉണ്ടാകാറില്ല. ഈ ഡയറ്റുകള്‍ പിന്തുടരുന്നവര്‍ക്ക് ദിവസം മുഴുവന്‍ ഊര്‍ജ്ജമില്ലായ്മ തോന്നുകയും ജോലി ചെയ്യാനോ പ്രസരിപ്പോടെ ഇരിക്കാനോ സാധിക്കാതെ വരികയും എപ്പോഴും ക്ഷീണമനുഭവപ്പെടുകയും ചെയ്യാം. മാത്രമല്ല, ഏറെക്കാലം ഇവ പിന്തുടര്‍ന്നാല്‍ അത് സന്നയുടേത് പോലെ വളരെ അപകടരമായ സാഹചര്യത്തിലേക്ക് ആളുകളെ എത്തിക്കുകയും ചെയ്യും.
കൃത്യമായ ധാരണയോ അറിവോ പ്ലാനിംഗോ ഡോക്ടര്‍മാരുടെ നിര്‍ദ്ദേശമോ ഇല്ലാതെ ആരംഭിച്ചാല്‍ ശരീരത്തിന് ദോഷം ചെയ്യുന്ന, കൊലയാളി ആകുന്ന ചില ഡയറ്റുകള്‍ പരിചയപ്പെടാം.
കലോറി വളരെ കുറഞ്ഞ ഡയറ്റുകള്‍
കലോറി വളരെയധികം നിയന്ത്രിച്ചാല്‍ ശരീരത്തില്‍ പോഷണക്കുറവ്, പേശീനഷ്ടം, പ്രതിരോധശേഷിക്കുറവ് എന്നിവയുണ്ടാകും. മാത്രമല്ല ദീര്‍ഘകാലം ഇത്തരത്തിലുള്ള ഡയറ്റുകള്‍ പിന്തുടരുന്നത് അവയവങ്ങള്‍ക്ക് കേടുപാടുകള്‍ ഉണ്ടാക്കും. ഡയറ്റുകള്‍ പിന്തുടരുമ്പോള്‍ ശരീരത്തിന്റെ ഊര്‍ജ്ജ, പോഷണ ആവശ്യങ്ങള്‍ പൂര്‍ത്തീകരിക്കപ്പെടുന്നുണ്ടെന്ന് ഉറപ്പുവരുത്തണം.
ഫാഡ് ഡയറ്റുകള്‍
പെട്ടെന്ന് ഫലം തരുന്നു എന്നതാണ് ഈ ഡയറ്റുകള്‍ വളരെയധികം പ്രചാരം നേടാനുള്ള കാരണം. എന്നാല്‍ അനവധി ഭക്ഷണങ്ങള്‍ വേണ്ടെന്നുവെച്ചും അസന്തുലിതമായ ഭക്ഷണക്രമം പിന്തുടര്‍ന്നുമുള്ള ഈ ഡയറ്റുകള്‍ ആവശ്യമായ പോഷണങ്ങള്‍ ശരീരത്തിലെത്തുന്നത് തടയുന്നു. ഇത് പോഷകാഹാരക്കുറവനും അനാരോഗ്യത്തിനും കാരണമാകുന്നു.
ഡീടോക്‌സ് ഡയറ്റുകള്‍
വിദഗ്ധരുടെ മേല്‍നോട്ടമില്ലാതെ കുറച്ചധികം ദിവസം ഡിടോക്‌സ് ഡയറ്റുകള്‍ എടുക്കുന്നത് വളരെ അപകടകരമായേക്കാം. ശരീരത്തിലെ വിഷാംശം നീക്കം ചെയ്യുക എന്ന ലക്ഷ്യത്തോടെയുള്ള ഡയറ്റുകളാണ് ഇവ. ഇതുകേള്‍ക്കുമ്പോള്‍ പലരും ഇത്തരം ഡയറ്റുകളില്‍ ആകൃഷ്ടരാകാറുണ്ട്. എന്നാല്‍ ഇത്തരം ഡയറ്റുകള്‍ക്ക് യാതൊരു ശാസ്ത്രീയ അടിത്തറയും ഇല്ല. മാത്രമല്ല കലോറി നിയന്ത്രണം ശരീരത്തിന് ദോഷം ചെയ്യുകയും ചെയ്യും.
കീറ്റോജെനിക് ഡയറ്റ്
ആരോഗ്യവിദഗ്ധരുടെ മേല്‍നോട്ടമോ മാര്‍ഗനിര്‍ദ്ദേശമോ കൂടാതെ കീറ്റോജെനിക് ഡയറ്റ് പിന്തുടരുന്നത് പോഷക ദൗര്‍ലഭ്യതയ്ക്കും ഇലക്ട്രോലൈറ്റ് അസന്തുലിതാവസ്ഥയ്ക്കും കരള്‍, വൃക്ക തുടങ്ങിയ അവയവങ്ങളുടേ കേടുപാടിനും കാരണമാകും. ഇത്തരം ഡയറ്റുകള്‍ ആരംഭിക്കുന്നതിന് മുമ്പായി ഒരു ഡോക്ടറുടെയോ അംഗീകൃത ഡയറ്റീഷന്റെയോ അഭിപ്രായം തേടേണ്ടത് അത്യാവശ്യമാണ്.
സപ്ലിമെന്റുകളും മരുന്നുകളും ഉപയോഗിക്കാന്‍ നിര്‍ദ്ദേശിക്കുന്ന ഡയറ്റുകള്‍
ഭക്ഷണത്തിന് പകരം സപ്ലിമെന്റുകളെയും അനിയന്ത്രിത മരുന്നുകളെയും ആശ്രയിക്കുന്ന ഡയറ്റുകള്‍ വളരെ അപകടകാരികളാണ്. കൃത്യമായ ശാസ്ത്രീയ പരിശോധകളോ മേല്‍നോട്ടമോ ഇല്ലാത്തവയാണ് ഇവ.
ഇത്തരത്തിലുള്ള തെളിയിക്കപ്പെടാത്ത ആഹാരരീതികളും ഭക്ഷണക്രമവും പരീക്ഷിച്ച് ആരോഗ്യത്തില്‍ വിട്ടുവീഴ്ച ചെയ്യാതിരിക്കാന്‍ പ്രത്യേകം ശ്രദ്ധിക്കുക.
