ഹൈന്ദവ ശിൽപ്പകലാ സംസ്കൃതി ലോകത്തിന്റെ നെറുകയിൽ; ഹൊയ്സാല ക്ഷേത്രങ്ങളെ ലോക പൈതൃക പട്ടികയിൽ ഉൾപ്പെടുത്തി യുനെസ്കോ; സന്തോഷം പങ്കുവെച്ച് പ്രധാനമന്ത്രി

ന്യൂഡൽഹി: ഭാരതീയ ശിൽപ്പകലയുടെയും വാസ്തുവിദ്യയുടെയും മകുടോദാഹരണങ്ങളായ കർണാടകയിലെ ഹൊയ്സാല ക്ഷേത്രങ്ങൾ യുനെസ്കോയുടെ ലോക പൈതൃക പട്ടികയിൽ ഇടം പിടിച്ചു. ബേലൂരിലെയും ഹാലേബീഡിലെയും സോമനാഥപുരത്തെയും ക്ഷേത്രങ്ങൾ 2022-2023ലെ ഇന്ത്യയുടെ ഔദ്യോഗിക നാമനിർദേശമായി കേന്ദ്ര സാംസ്കാരിക വകുപ്പ് യുനെസ്കോക്ക് സമർപ്പിച്ചിരുന്നു. ഇത് അംഗീകരിക്കപ്പെടുകയായിരുന്നു.

ഇന്ത്യയുടെ സമ്പന്നമായ സാംസ്കാരിക പൈതൃകത്തിനും ചരിത്ര പാരമ്പര്യത്തിനുമുള്ള അംഗീകരമായാണ് ഹൊയ്സാല ക്ഷേത്രങ്ങൾ യുനെസ്കോയുടെ ലോക പൈതൃക പട്ടികയിൽ ഇടം പിടിച്ചതിനെ ചരിത്രകാരന്മാർ നോക്കിക്കാണുന്നത്. ഉദാത്തമായ ഹൊയ്സാല ശിൽപ്പകലയുടെയും സാംസ്കാരിക ഉന്നതിയുടെയും പ്രതീകങ്ങളാണ് ഈ ക്ഷേത്രങ്ങൾ.

സംഹാരമൂർത്തിയായ ശിവഭഗവാന്റെ ക്ഷേത്രമായ ഹൊയ്സാലേശ്വര ക്ഷേത്രം പന്ത്രണ്ടാം നൂറ്റാണ്ടിലാണ് നിർമ്മിക്കപ്പെട്ടിരിക്കുന്നത്. വിഷ്ണുവർദ്ധന മഹാരാജാവ് പണികഴിപ്പിച്ച ഈ ക്ഷേത്രം ഹൊയ്സാല രാജവംശത്തിന്റെ അകമഴിഞ്ഞ ഭക്തിക്കും ആത്മീയ പാരമ്പര്യത്തിനും നിദാനമാണ്.

ശൈവ സംസ്കൃതിയിൽ വിശ്വസിക്കെ തന്നെ വൈഷ്ണവ സംസ്കൃതിയെയും ശാക്തേയ സംസ്കൃതിയെയും ഉൾക്കൊള്ളുന്നവരായിരുന്നു ഹൊയ്സാലർ. ജൈന പാരമ്പര്യത്തിന്റെ അടയാളങ്ങളും ഹൊയ്സാല നിർമ്മിതികളിൽ പ്രകടമാണ്.

ഭാരതീയ ഇതിഹാസങ്ങളായ രാമായണം, മഹാഭാരതം, ഭാഗവതം എന്നിവയിൽ നിന്നുമുള്ള കഥാസന്ദർഭങ്ങൾ ഹൊയ്സാല ക്ഷേത്രങ്ങളിൽ കൊത്തി വെച്ചിട്ടുണ്ട്. ഹൊയ്സാലേശ്വര ക്ഷേത്രത്തിന് സമീപത്തെ കേശവേശ്വര ക്ഷേത്രം വൈഷ്ണവ ആരാധകരുടെ കേന്ദ്രമായിരുന്നു.

ആർക്കിയോളജിക്കൽ സർവേ ഓഫ് ഇന്ത്യയുടെ സംരക്ഷണയിലാണ് നിലവിൽ ഹൊയ്സാല ക്ഷേത്രങ്ങൾ. ദ്രാവിഡ ശിൽപ്പകലയും മദ്ധ്യഭാതീയ ശിൽപ്പകലയായ ഭൂമിജ സമ്പ്രദായവും വടക്കു പടിഞ്ഞാറൻ ഭാരതീയ ശിൽപ്പകലാ സമ്പ്രദായമായ നഗരയും ഹൊയ്സാല ക്ഷേത്രങ്ങളിൽ സംഗമിക്കുന്നു.

ഹൊയ്സാല ക്ഷേത്രങ്ങളുടെ ആഗോള പ്രാധാന്യം വർദ്ധിപ്പിക്കുന്നതിനോടൊപ്പം സമ്പന്നമായ തനത് സാംസ്കാരിക പൈതൃകം സംരക്ഷിക്കുന്നതിൽ ഭാരതം പുലർത്തുന്ന ജാഗ്രതക്കുള്ള ആദരവ് കൂടിയാവുകയാണ് യുനെസ്കോയുടെ ഈ അംഗീകാരം. ഡൽഹി സുൽത്താന്മാരുടെ ആക്രമണങ്ങളെ അതിജീവിച്ചാണ് ഇവ കാലാതിവർത്തിയായി നിലകൊള്ളുന്നത്.

ഹൊയ്സാല ക്ഷേത്രങ്ങളെ യുനെസ്കോ പൈതൃക പട്ടികയിൽ ഉൾപ്പെടുത്തിയത് അഭിമാനകരമാണെന്ന് പ്രധാനമന്ത്രി നരേന്ദ്ര മോദി പറഞ്ഞു. ഹൊയ്സാല ക്ഷേത്രങ്ങളുടെ സൗന്ദര്യവും ആത്മീയ ചൈതന്യവും കാലാതിവർത്തിയാണ്. ഇന്ത്യയുടെ സമ്പന്നമായ സാംസ്കാരിക പൈതൃകത്തിന്റെയും നമ്മുടെ പൂർവികരുടെ കരകൗശല വൈദഗ്ധ്യത്തിന്റെയും നേർസാക്ഷ്യമാണ് ഹൊയ്സാല ക്ഷേത്രങ്ങളെന്നും അദ്ദേഹം ട്വീറ്റ് ചെയ്തു.

More pride for India!

The magnificent Sacred Ensembles of the Hoysalas have been inscribed on the @UNESCO World Heritage List. The timeless beauty and intricate details of the Hoysala temples are a testament to India's rich cultural heritage and the exceptional craftsmanship of… https://t.co/cOQ0pjGTjx

— Narendra Modi (@narendramodi) September 18, 2023