ഇലോണ്‍ മസ്‌ക് സ്ഥാപിച്ച ന്യൂറോടെക്‌നോളജി കമ്പനിയായ ന്യൂറാലിങ്ക് മനുഷ്യരില്‍ ബ്രെയിന്‍ ചിപ്പ് പരീക്ഷണത്തിന് തയ്യാറെടുക്കുന്നു. കമ്പനി വികസിപ്പിച്ച ബ്രെയിന്‍ ചിപ്പ് ആദ്യമായി മനുഷ്യരില്‍ പരീക്ഷിക്കുന്നതിന് അനുമതി ലഭിച്ചതായി ന്യൂറാലിങ്ക് അറിയിച്ചു. പക്ഷാഘാതം വന്നവരിലാണ് ആറുവര്‍ഷം നീണ്ടുനില്‍ക്കുന്ന പരീക്ഷണം ആദ്യം നടത്തുക.
കഴുത്തിനേറ്റ പരിക്ക്, അല്ലെങ്കില്‍ അമിയോട്രോപിക് ലാറ്ററെല്‍ സ്‌ക്ളീറോസിസ് (എഎല്‍എസ്) എന്നിവ മൂലം പക്ഷാഘാതം വന്നവരെയാണ് ന്യൂറാലിങ്കിന്റെ ബ്രെയിന്‍ ഇംപ്ലാന്റിനായുള്ള ക്ലിനിക്കല്‍ പരീക്ഷണത്തില്‍ ഉള്‍പ്പെടുത്തുകയെന്ന് റോയിട്ടേഴ്‌സ് റിപ്പോര്‍ട്ടില്‍ പറയുന്നു. ഉപകരണത്തിന്റെ സുരക്ഷ, ചിന്തകള്‍ കൊണ്ട് കംപ്യൂട്ടറിന്റെ കഴ്‌സര്‍ അല്ലെങ്കില്‍ കീബോര്‍ഡ് പ്രവര്‍ത്തിപ്പിക്കാന്‍ ആളുകളെ സഹായിക്കുന്നതില്‍ ഉപകരണം എത്രത്തോളം ഫലപ്രദമാണ് എന്നീ കാര്യങ്ങളാണ് പ്രധാനമായും പരീക്ഷണവിധേയമാക്കുക. പഠനത്തില്‍ പങ്കെടുക്കുന്നവരുടെ തലച്ചോറില്‍ ചലനങ്ങള്‍ നിയന്ത്രിക്കുന്ന മേഖലയില്‍ ശസ്ത്രക്രിയയിലൂടെ ഈ ഉപകരണം സ്ഥാപിക്കുന്നതിനായി ഗവേഷകര്‍ റോബോട്ടുകളെ ഉപയോഗപ്പെടുത്തുമെന്നാണ് വിവരം.
ആറുവര്‍ഷം കൊണ്ട് പരീക്ഷണം പൂര്‍ത്തിയാകുമെന്നാണ് പ്രതീക്ഷിക്കുന്നത്. അതേസമയം എത്രപേരെയാണ് പരീക്ഷണത്തിനായി തെരഞ്ഞെടുക്കുകയെന്ന കാര്യം ഗവേഷകര്‍ വെളിപ്പെടുത്തിയിട്ടില്ല. നേരത്തെ പത്തുപേരില്‍ ഇംപ്ലാന്റ് സ്ഥാപിക്കുന്നതിനുള്ള അനുമതിയാണ് കമ്പനി ആവശ്യപ്പെട്ടിരുന്നത്. എന്നാല്‍ കമ്പനിയും അമേരിക്കന്‍ ഫുഡ് ആന്‍ഡ് ഡ്രഗ്ഗ് അഡ്മിനിസ്‌ട്രേഷനും തമ്മിലുള്ള തുടര്‍ ചര്‍ച്ചകളുടെ ഫലമായി പരീക്ഷണത്തില്‍ പങ്കെടുപ്പിക്കുന്ന ആളുകളുടെ എണ്ണം കുറച്ചുവെന്നാണ് സൂചന.
മനുഷ്യരില്‍ ഉപകരണം പരീക്ഷിക്കുന്നതിന് എഫ്ഡിഎയുടെ അനുമതി ലഭിച്ചതായി കഴിഞ്ഞ മെയില്‍ കമ്പനി അറിയിച്ചിരുന്നു. മനുഷ്യരില്‍ ഈ ഉപകരണം സുരക്ഷിതമാണെന്ന് കണ്ടെത്തിയാലും വാണിജ്യാടിസ്ഥാനത്തില്‍ ഉപകരണം ലഭ്യമാക്കുന്നതിനുള്ള അനുമതി ലഭിക്കാന്‍ കമ്പനിക്ക് പത്ത് വര്‍ഷമെങ്കിലും കാത്തിരിക്കേണ്ടിവരുമെന്നാണ് ഈ രംഗത്തെ വിദഗ്ധര്‍ പറയുന്നത്.
2016ലാണ് ഇലോണ്‍ മസ്‌ക് ന്യൂറാലിങ്ക് എന്ന ന്യൂറോടെക്‌നോളജി കമ്പനി സ്ഥാപിക്കുന്നത്. ചിന്തകളെ പ്രവര്‍ത്തികളിലേയ്ക്ക് മാറ്റുന്ന ബ്രെയിന്‍-കംപ്യൂട്ടര്‍ ഇന്റെര്‍ഫേസുകള്‍ (ബിസിഐ)വികസിപ്പിക്കുന്നതിലാണ് കമ്പനി ശ്രദ്ധ കേന്ദ്രീകരിക്കുന്നത്. കൃത്രിമ കൈകാലുകള്‍, കംപ്യൂട്ടറുകള്‍ എന്നിവ പോലുള്ള ശരീരത്തിന് പുറത്തുള്ള ഉപകരണങ്ങളെ ചിന്തകളാല്‍ നിയന്ത്രിക്കുന്നതും നഷ്ടപ്പെട്ട മസ്തിഷ്‌ക പ്രവര്‍ത്തനം വീണ്ടെടുക്കുന്നതിനുമുള്ള ബിസിഐകളാണ് ന്യൂറാലിങ്കിന്റെ ലക്ഷ്യം. 2020ല്‍ ഒരു കുരങ്ങിന്‌റെ മനസ്സിലൂടെ കംപ്യൂട്ടര്‍ കഴ്‌സര്‍ നിയന്ത്രിക്കുന്ന ബിസിഐ കമ്പനി അവതരിപ്പിച്ചിരുന്നു. പൊണ്ണത്തടി, ഓട്ടിസം, വിഷാദരോഗം, സ്‌കീസോഫ്രീനിയ പോലുള്ള ശാരീരിക,മാനസിക പ്രശ്‌നങ്ങള്‍ പരിഹരിക്കാനുള്ള ഇംപ്ലാന്റ് ചിപ്പ് ഉപകരണങ്ങള്‍ ന്യൂറാലിങ്ക് വികസിപ്പിക്കുമെന്നാണ് മസ്‌ക് അവകാശപ്പെടുന്നത്.
