തിരുവനന്തപുരം: ഹാദിയ കേസ് വീണ്ടും വഴിത്തിരിവിൽ. തന്റെ മകളുടെ സുരക്ഷിതത്വത്തിൽ ആശങ്കയുണ്ടെന്ന് കാണിച്ച് ഹൈകോടതിയെ സമീപിച്ച് പിതാവ് കെ എം അശോകൻ.
കഴിഞ്ഞ ഒരു മാസമായി ഹാദിയയെ ഫോണിൽ ബന്ധപ്പെടാനുള്ള തന്റെ ശ്രമങ്ങൾ വൃഥാവിലായെന്നും അവർ നടത്തിക്കൊണ്ടിരുന്ന ഹോമിയോ ക്ലിനിക്ക് പൂട്ടിയിരിക്കുകയാണെന്നും അശോകൻ തന്റെ ഹർജിയിൽ പറഞ്ഞു. അതിനാൽ ഹാദിയയുടെ സുരക്ഷിതത്വത്തിൽ ആശങ്കയുണ്ടെന്നും അവരെ കോടതിയിൽ ഹാജരാക്കാൻ ഹേബിയസ് കോർപ്പസ് റിട്ട് പുറപ്പെടുവിക്കണമെന്നും ഹർജിയിൽ ആവശ്യപ്പെട്ടിട്ടുണ്ട്.
താനും ഭാര്യയും ഹാദിയയുമായി ഫോണിൽ സംസാരിക്കാറുണ്ടെന്നും ഇടയ്ക്കിടെ ഹാദിയയെ സന്ദർശിക്കാറുണ്ടെന്നും ഹർജിയിൽ പറയുന്നു. ആദ്യ ഭർത്താവ് ഷഫിൻ ജഹാനുമായി തനിക്ക് ഇപ്പോൾ വിവാഹ ബന്ധമൊന്നുമില്ലെന്നും അയാൾ എവിടെയാണെന്ന് തനിക്കറിയില്ലെന്നും മകൾ ഫോണിലൂടെ അറിയിച്ചതായും അതിൽ പറയുന്നു.
ഹാദിയയും ഷഫീൻ ജഹാനും തമ്മിലുള്ള വിവാഹം വെറും കടലാസിൽ മാത്രമുള്ളതാണെന്നും അവർ തമ്മിൽ വിവാഹ ബന്ധമില്ലെന്നും അശോകൻ ഹർജിയിൽ പറയുന്നു. നിരോധിത സംഘടനയായ പോപ്പുലർ ഫ്രണ്ടിന്റെ തടങ്കലിൽ ആണ് ഹാദിയ ഇപ്പോൾ ഉള്ളതെന്നും പിതാവ് ആരോപിച്ചു.
2017 മെയ് 25 ലെ ഒരു വിധിന്യായത്തിൽ, കേരള ഹൈക്കോടതിയുടെ ഡിവിഷൻ ബെഞ്ച് അവളുടെ വിവാഹം ഒരു “തട്ടിപ്പ്” ആണ് എന്ന് വിശേഷിപ്പിക്കുകയും അസാധുവാക്കുകയും ഹാദിയയെ അവളുടെ ഹിന്ദു മാതാപിതാക്കളുടെയോ ഒരു സ്ഥാപനത്തിന്റെയോ സംരക്ഷണ കസ്റ്റഡിയിലോ ഏൽപ്പിക്കാൻ നിർദ്ദേശിക്കുകയും ചെയ്തു. “ലവ് ജിഹാദ്”എന്ന പദത്തിന്റെ ആദ്യത്തെ പ്രധാന ഉപയോഗമാണ് വിധിയെന്ന് പറയപ്പെടുന്നു. കേസിൽ ഉൾപ്പെട്ട വിവിധ സംഘടനകളുടെ പങ്കിനെക്കുറിച്ച് വിശദമായ അന്വേഷണം നടത്താനും ഹൈക്കോടതി നിർദ്ദേശിച്ചിരുന്നു
