ദൈവീകതിരഞ്ഞെടുപ്പ്; ഓമനമുഖത്ത് നിന്ന് കണ്ണെടുക്കാനേ തോന്നില്ല; അയോദ്ധ്യ ശ്രീരാമ ക്ഷേത്രത്തിലെ പ്രധാന മൂർത്തിയെ തിരഞ്ഞെടുത്തു

അയോദ്ധ്യ: ശ്രീരാമക്ഷേത്രത്തിന്റെ പ്രാണപ്രതിഷ്ഠ ചടങ്ങ് നടക്കാരിരിക്കെ പ്രധാനമൂർത്തിയായ രാംലല്ലയുടെ തിരഞ്ഞെടുപ്പ് പ്രക്രിയ പൂർത്തിയായതായി ക്ഷേത്ര ട്രസ്റ്റ് അറിയിച്ചു. മൂർത്തിയുടെ രൂപം പ്രാണ പ്രതിഷ്ഠയ്ക്കായി അടുത്ത മാസം എത്തിക്കുമെന്ന് രാമജന്മഭൂമി തീർത്ഥ ക്ഷേത്ര ട്രസ്റ്റി ഭീംലേന്ദ്ര മോഹൻ പ്രതാപ് മിശ്ര പറഞ്ഞു.

പല മൂർത്തികൾ ഒന്നിച്ചുവച്ചിരുന്നാലും ഏറ്റവും മികച്ച ഒന്നിലായിരിക്കും കണ്ണുകൾ ഉടക്കുകയെന്ന് പ്രതാപ് മിശ്ര പറഞ്ഞു. തനിക്ക് അത്തരത്തിൽ ഒരു വിഗ്രഹം ഇഷ്ടമായി. അതിന് വോട്ട് നൽകി. ഒരു വോട്ടിംഗ് സംവിധാനം നടപ്പാക്കുകയും എല്ലാവരും അവരവരുടെ ഇഷ്ടത്തിന് അനുസരിച്ച് വോട്ട് നൽകുകയും ചെയ്തു. ബാക്കി കാര്യങ്ങൾ ശ്രീരാമ ജന്മഭൂമി തീർത്ഥ ക്ഷേത്രത്തിന്റെ സെക്രട്ടറിയായ ചമ്പത്ത് റായിയാരിക്കും തീരുമാനിക്കുകയെന്നും അദ്ദേഹം വ്യക്തമാക്കി.

ഭഗവാൻ ശ്രീ രാമൻറെ കുട്ടിക്കാലം പ്രതിഫലിക്കുന്ന വിഗ്രഹമാണ് ക്ഷേത്രത്തിലെ പ്രധാന പ്രതിഷ്ഠ.ബാല രൂപത്തിലുള്ള രാമനാണ് രാം ലല്ല. വെള്ള മാർബിൾ, ഗ്രാനൈറ്റ്, ഷിഷ്ട് എന്ന ശ്യാമ വർണമുള്ള കല്ല് എന്നിവയിലാണ് രാംലല്ലയുടെ വിഗ്രഹങ്ങൾ കൊത്തിയത്. ഇതിൽ അഞ്ച് വയസുകാരന്റെ ഓജസും ഓമനത്തവുമുളള മുഖം ഏത് ശിൽപ്പത്തിനാണോ ഏറെ, അതാവും തിരഞ്ഞെടുക്കുകയെന്ന് രാമക്ഷേത്ര ട്രസ്റ്റ് വ്യക്തമാക്കിയിരുന്നു. മൂന്ന് ഡിസൈനുകളിൽ 51 ഇഞ്ച് ഉയരമുള്ള രാം ലല്ലയുടെ വിഗ്രഹമായിരിക്കും പ്രധാന മൂർത്തിയായി തിരഞ്ഞെടുക്കുകയെന്ന് ചമ്പത്ത് റായി നേരത്തെ വ്യക്തമാക്കിയിട്ടുണ്ട്.

ജനുവരി 16 മുതൽ ഏഴ് ദിവസം നീണ്ടുനിൽക്കുന്ന സമർപ്പണ ചടങ്ങ്, വിശുദ്ധമായ ആചാരങ്ങളുടെയും ചടങ്ങുകളുടെയും ഒരു പരമ്പരയാണ് വാഗ്ദാനം ചെയ്യുന്നത്. ഒരാഴ്ച നീണ്ടുനിൽക്കുന്ന ആഘോഷങ്ങളാണ് അയോദ്ധ്യയിൽ നടക്കുക.

ജനുവരി 16: പ്രായശ്ചിത്ത ചടങ്ങുകളും തുടർന്ന് ദശവിധ സ്‌നാനം, വിഷ്ണു ആരാധന, സരയൂ നദിക്കരയിൽ പശുക്കൾക്ക് വഴിപാട് എന്നിവ നടക്കും.

ജനുവരി 17: മംഗളകലശത്തിൽ സരയൂജലം വഹിച്ചുകൊണ്ടുള്ള ഭക്തരുടെ അകമ്പടിയോടെ രാം ലല്ലയുടെ വിഗ്രഹം വഹിച്ചുകൊണ്ടുള്ള ഘോഷയാത്ര അയോധ്യയിലെത്തും.

ജനുവരി 18: ഗണേശ അംബിക പൂജ, വരുൺ പൂജ, മാതൃകാ പൂജ, വാസ്തു പൂജ എന്നിവ ഉൾപ്പെടെയുള്ള ഔപചാരിക ചടങ്ങുകൾ ആരംഭിക്കുന്നു.

ജനുവരി 19: പവിത്രമായ അഗ്‌നി ജ്വലിപ്പിക്കൽ, ‘നവഗ്രഹം’ സ്ഥാപിക്കൽ, യജ്ഞം

ജനുവരി 20: സരയൂജലം കൊണ്ട് ശ്രീകോവിൽ കഴുകൽ, തുടർന്ന് വാസ്തുശാന്തിയും ‘അന്നാദിവാസ്’ ചടങ്ങുകളും നടക്കും

ജനുവരി 21: രാംലല്ല വിഗ്രഹം 125 കലശങ്ങളിൽ സ്‌നാനം ചെയ്ത് അതിൻറെ സ്ഥാപന സ്ഥലത്ത് എത്തിയ്ക്കുന്നു.

ജനുവരി 22: ഉച്ചയ്ക്ക് ‘മൃഗശിര നക്ഷത്ര’ത്തിൽ രാം ലല്ലയുടെ പ്രതിഷ്ഠയ്ക്ക് മുന്നോടിയായുള്ള പ്രഭാത പൂജ.