ആലപ്പുഴ: യൂത്ത് കോൺഗ്രസ് പ്രവർത്തകരെ ലാത്തി കൊണ്ട് ആക്രമിച്ച സംഭവത്തിൽ മുഖ്യമന്ത്രിയുടെ ഗൺമാന് നോട്ടീസ്. തിങ്കളാഴ്ച ചോദ്യം ചെയ്യലിനായി പോലീസ് സ്റ്റേഷനിൽ ഹാജരാകാൻ ആവശ്യപ്പെട്ടാണ് ഗൺമാൻ അനിൽ കുമാറിന് നോട്ടീസ് നൽകിയത്. സുരക്ഷാ സേനയിലെ ഉദ്യോഗസ്ഥൻ എസ് സന്ദീപിനും നോട്ടീസ് നൽകിയിട്ടുണ്ട്.
ആലപ്പുഴ സൗത്ത് പോലീസിന്റേതാണ് നടപടി. പോലീസുകാർ തിരുവനന്തപുരത്ത് നേരിട്ട് എത്തിയാണ് നോട്ടീസ് നൽകിയത്. കേസിലെ ഒന്നാം പ്രതിയാണ് അനിൽ കുമാർ. ചോദ്യം ചെയ്തതിന് ശേഷം അനിൽ കുമാറിനെതിരെ തുടർ നടപടികൾ സ്വീകരിക്കും. സംഭവം ഉണ്ടായി ഒരുമാസം പിന്നിട്ട ശേഷമാണ് പോലീസ് അനിൽ കുമാറിനെതിരെ നടപടി ആരംഭിച്ചത്.
ഇക്കഴിഞ്ഞ ഡിസംബർ 15 നായിരുന്നു ഗൺമാൻ അനിൽ കുമാർ യൂത്ത് കോൺഗ്രസ് പ്രവർത്തകരെ ലാത്തി കൊണ്ട് മർദ്ദിച്ചത്. കെഎസ് യു ജില്ലാ പ്രസിഡന്റ്, യൂത്ത് കോൺഗ്രസ് സംസ്ഥാന കമ്മിറ്റി അംഗം എന്നിവർക്കായിരുന്നു മർദ്ദനം. നവകേരള സദസ്സിനായി മുഖ്യമന്ത്രിയും മന്ത്രിമാരും സഞ്ചരിച്ചിരുന്ന ബസിന് നേരെ പ്രവർത്തകർ കരിങ്കൊടി കാട്ടിയിരുന്നു. തുടർന്ന് പോലീസ് പിടിച്ചു മാറ്റുന്നതിനിടെ കാറിൽ നിന്നും ചാടിയിറങ്ങിയ ഗൺമാൻ ലാത്തികൊണ്ട് തലങ്ങും വിലങ്ങും അടിയ്ക്കുകയായിരുന്നു. സന്ദീപും മർദ്ദിച്ചു.
സംഭവത്തിന് പിന്നാലെ മർദ്ദനമേറ്റ കോൺഗ്രസ് പ്രവർത്തകർ പോലീസിൽ പരാതി നൽകിയിരുന്നു. എന്നാൽ ചുമതലയുടെ ഭാഗമായുള്ള നടപടി ആയിരുന്നു അനിൽ കുമാറിന്റേത് എന്നും അതിനാൽ കേസ് എടുക്കാൻ കഴിയില്ലെന്നും പോലീസ് അറിയിക്കുകയായിരുന്നു. ഇതിന് പിന്നാലെ യൂത്ത് കോൺഗ്രസ് പ്രവർത്തകർ കോടതിയെ സമീപിച്ചു. കോടതി ആലപ്പുഴ പോലീസിനോട് നടപടി സ്വീകരിക്കാൻ നിർദ്ദേശിക്കുകയായിരുന്നു. ഇതേ തുടർന്നാണ് കേസ് എടുത്തിട്ടുള്ളത്.
