ന്യൂഡൽഹി : ഇന്ത്യയിൽ സോളാർ വൈദ്യുതിയുടെ ഉപയോഗം പ്രോത്സാഹിപ്പിക്കുന്നതിനായി വീടുകളിൽ റൂഫ് ടോപ്പ് സോളാർ സിസ്റ്റങ്ങൾ സ്ഥാപിക്കുന്ന പദ്ധതിക്ക് കേന്ദ്ര മന്ത്രിസഭ അംഗീകാരം നൽകി. പ്രധാനമന്ത്രി സൂര്യ ഘർ: മുഫ്ത് ബിജ്‌ലി യോജന എന്ന ഈ പദ്ധതി വഴി പ്രതിമാസം 300 യൂണിറ്റ് വൈദ്യുതി വരെ ഓരോ കുടുംബത്തിനും സൗജന്യമായി ലഭിക്കുന്നതാണ്. പ്രധാനമന്ത്രി സൂര്യ ഘർ പദ്ധതി പ്രകാരം സോളാർ റൂഫ് ടോപ്പ് സിസ്റ്റം സ്ഥാപിക്കുന്നതിനായി ഓരോ കുടുംബങ്ങൾക്കും 78000 രൂപ വരെ സബ്സിഡിയായി കേന്ദ്രസർക്കാർ നൽകുന്നതാണ്.
പ്രധാനമന്ത്രി നരേന്ദ്രമോദിയുടെ അധ്യക്ഷതയില്‍ ചേര്‍ന്ന കേന്ദ്രമന്ത്രിസഭായോഗമാണ് മേൽക്കൂര സൗരോർജ്ജത്തിലേക്ക് രാജ്യത്തെ കുടുംബങ്ങളെ മാറ്റുന്നതിനുള്ള പദ്ധതിക്ക് അംഗീകാരം നൽകിയത്. 75,021 കോടി രൂപ ചിലവിലാണ് കേന്ദ്രസർക്കാർ പ്രധാനമന്ത്രി സൂര്യ ഘർ: മുഫ്ത് ബിജ്‌ലി യോജന തയ്യാറാക്കിയിരിക്കുന്നത്. കുടുംബങ്ങൾക്ക് വൈദ്യുതി ബില്ലിൽ വലിയ ലാഭം നൽകുമെന്ന് മാത്രമല്ല 17 ലക്ഷം പേർക്ക് നേരിട്ട് തൊഴിൽ നൽകുന്നത് കൂടിയാണ് പ്രധാനമന്ത്രി അവതരിപ്പിച്ച ഈ പുതിയ പദ്ധതിയെന്ന് കേന്ദ്രമന്ത്രി അനുരാഗ് താക്കൂർ വാർത്താ സമ്മേളനത്തിൽ അറിയിച്ചു.
ഓരോ കുടുംബങ്ങൾക്കും രണ്ട് കിലോവാട്ട് വരെയുള്ള മേൽക്കൂര സൗരോർജ്ജ സംവിധാനങ്ങൾക്ക് ചെലവിന്റെ 60% തുക കേന്ദ്രസർക്കാർ സഹായമായി നൽകുന്നതാണ്. രണ്ട് കിലോ വാട്ടിന് മുകളിലും മൂന്ന് കിലോവാട്ട് വരെയും ശേഷിയുള്ള സൗരോർജ്ജ സംവിധാനങ്ങൾക്ക് ചിലവിന്റെ 40% ആണ് സബ്സിഡിയായി ലഭിക്കുക. നിലവിലുള്ള സൗരോർജ്ജ സംവിധാനം സ്ഥാപിക്കുന്നതിനുള്ള ചിലവ് അനുസരിച്ച് ഒരു കിലോവാട്ടിന് മുപ്പതിനായിരം രൂപയും രണ്ട് കിലോവാട്ടിന് 60,000 രൂപയും 3
കിലോവാട്ടിന് 78000 രൂപയും ആയിരിക്കും സബ്സിഡി ലഭിക്കുക.
