ആമസോണിൽ വീണ്ടും കൂട്ടപിരിച്ചുവിടൽ. ഈയിടെ നിരവധി ജീവനക്കാരെ പിരിച്ചുവിട്ടതിനെ കുറിച്ചുള്ള വാർത്തകൾ പുറത്തുവന്നിരുന്നു. മുതിർന്ന ജീവനക്കാരുടെ ശമ്പളം ഈ വർഷം വർദ്ധിപ്പിക്കില്ലെന്ന റിപ്പോർട്ടുകളും പുറത്തു വന്നിരുന്നു.
ഇപ്പോൾ വീണ്ടും കമ്പനി കൂട്ടപിരിച്ചുവിൽ നടത്തിയിരിക്കുകയാണ്. ഇത്തവണ ക്ലൗഡ് കംപ്യൂട്ടിംഗ് വിഭാഗമായ ആമസോൺ വെബ് സർവീസിൽ(എഡബ്ല്യുഎസ്) നൂറോളം ജീവനക്കാരെയാണ് പിരിച്ചുവിട്ടത്. റിപ്പോർട്ടുകളനുസരിച്ച് കമ്പനി പ്രബലമായ നിരവധി പുനക്രമീകരണങ്ങൾ വരുത്തുന്നതിന്റെ ഭാഗമായാണ് ടെക്‌നോളജി, മാർക്കറ്റിംഗ്, സെയിൽസ് വിഭാഗത്തിൽ പിരിച്ചുവിടൽ നടക്കുന്നത്.
ഈ തീരുമാനങ്ങൾ കമ്പനി പെട്ടെന്ന് എടുത്ത ഒന്നല്ലെന്നും മാറ്റം പ്രയാസകരമാണെന്ന് അറിയാമെന്നും എഡബ്ല്യുഎസ് സീനിയർ വൈസ് പ്രസിഡന്റ് ഗാർമാൻ പ്രതികരിച്ചു. ‘ഞങ്ങൾ അതിവേഗം ചലിച്ചുകൊണ്ടിരിക്കുന്ന ഒരു വ്യവസായ ശൃഖലയാണ്. ഒരു സ്ഥാപനമെന്ന നിലയിൽ ചടുലമായി പ്രവർത്തിക്കേണ്ടത് ഞങ്ങളുടെ ആവശ്യമാണ്. സ്ഥാപനത്തെ ഭാവിയിലേക്ക് വേണ്ടി തയ്യാറാക്കുന്നതിനാണ് ഈ മാറ്റങ്ങൾ വരുത്തുന്നത്. ഞങ്ങളുടെ മുൻഗണനകൾക്ക് പ്രധാന്യം നലകാനും കാര്യക്ഷമതയില്ലായ്മയെ ഇല്ലാതാക്കുവാനുമാണ് ഞങ്ങളുടെ ശ്രമം’- അദ്ദേഹം വ്യക്തമാക്കി.
അതേസമയം, കമ്പനിയിൽ നിരവധി അവസരങ്ങൾ ഉള്ളതിനാൽ, പിരിച്ചുവിട്ട തൊഴിലാളികൾക്ക് മറ്റ് സാധ്യതകൾ കണ്ടെത്താൻ ശ്രമിക്കുന്നതായും എഡബ്ല്യുഎസ് അറിയിച്ചു. ആമസോണിൽ കഴിഞ്ഞ മാസം ഫാർമസി, മെഡിക്കൽ ഡിവിഷനിലെ നൂറോളം ജീവനക്കാരെ പിരിച്ചു വിട്ടിരുന്നു.
