വീടുകളിലൈ പ്രധാന വില്ലന്മാരിൽ ഒരാളാണ് എലി. ചെറുതും വലുതുമായ പല വലിപ്പത്തിലുള്ള എലികളുണ്ടെങ്കിലും ഇവയിൽ കുഞ്ഞൻമാർ പോലും ഏറെ ശല്യക്കാരാണ്. കർഷകരുടെ ശത്രുവെന്ന് അറിയപ്പെടുന്ന ഇവന്മാർ സത്യത്തിൽ വീടുകളിലെയും ശത്രു തന്നെയാണ്.
സാധാരണ എലി വിഷം വയ്ക്കുകയും എലിപ്പെട്ടി വയ്ക്കുകയുമൊക്കെയാണ് മിക്കവാറും വീടുകളിൽ ചെയ്യുക. എന്നാൽ, കുഞ്ഞുങ്ങളുള്ള വീടുകളിൽ ഈ പ്രയോഗം ഏറെ റിസ്‌ക് ഉള്ള കാര്യമാണ്. എലിപ്പെട്ടിയിൽ കുടുങ്ങിയ എലികളെ കൊല്ലുക എന്നതാണെങ്കിൽ ഇതിനേക്കാൾ പണിയാണ്. തീരെ നിവർത്തിയില്ലാത്ത പക്ഷം പൂച്ചയെ വളർത്തുന്നതിലേക്കും എത്തും.
എന്താണ് എലി ശല്യം ഇല്ലാതാക്കാൻ ചെയ്യേണ്ട കാര്യങ്ങൾ..? വൃത്തിയാണ് എലിശല്യം ഇല്ലാതാക്കാൻ ഏറ്റവും ആദ്യം ചെയ്യേണ്ടത്. വീടും പരിസരവും വൃത്തിയായി സൂക്ഷിക്കുക. ഭക്ഷണ സാധനങ്ങൾ വാരി വലിച്ചിടാതെ വൃത്തിയായി ഇടുക. പരിസരത്തും സാധനങ്ങൾ കൂട്ടിയിടാതിരിക്കുന്നതും എലി ശല്യം കുറയ്ക്കും.
നമ്മുടെ വീട്ടിൽ തന്നെയുള്ള ചില സാധനങ്ങൾ ഉപയോഗിച്ച് നമുക്ക് എലിയെ തുരത്താം. മുളകുപൊടി ഇപയോഗിച്ച് നമുക്ക് എലിയെ ഒടിക്കാൻ കഴിയും. അതിനായി എലി ശല്യമുള്ളിടത്ത് മുളകുപൊടി വിതറിക്കൊടുക്കുക. ഈ മണം ഇവയ്ക്ക് അസ്വസ്തതയുണ്ടാക്കും.
കറുവാപ്പട്ടയുടെ ഇലയാണ് അടുത്ത മാർഗം. അതിനായി എലിശല്യം ഉള്ള സ്ഥലത്ത് കുറച്ച് കറുവാപ്പട്ടയുടെ ഇല ഒരു തുണിയിൽ പൊതിഞ്ഞ് സൂക്ഷിക്കുക. ഇത് എലിയെ മാത്രമല്ല, ചെറു പ്രാണികളെയും തുരത്തും.
എലിശല്യമുള്ള സ്ഥലത്ത് വെളുത്തുള്ളി സൂക്ഷിക്കുന്നതും എലിശില്യം ഇല്ലാതാക്കാൻ നല്ലതാണ്. ചെറിയുള്ളിയും നമുക്ക് ഇതുപോലെ ഉപയോഗിക്കാം. എന്നാൽ, ഉള്ളി ചീയുന്നത് ദുർഗന്ധം ഉണ്ടാകാൻ കാരണമാകുന്നതിനാൽ, ഇവ ദിവസവും മാറ്റി പുതിയത് വയ്ക്കാൻ ശ്രദ്ധിക്കുക.
