ന്യൂഡൽഹി: മുഖ്യമന്ത്രിയുടെ മലപ്പുറം പരമാർശ വിവാദത്തിൽ ഖേദം പ്രകടിപ്പിച്ച് ദേശീയമാദ്ധ്യമമായ ദ ഹിന്ദു. വിവാദഭാഗം പ്രസിദ്ധീകരിച്ചതിലാണ് ദേശീയമാദ്ധ്യമം ഖേദം പ്രകടിപ്പിച്ചത്. മലപ്പുറം പരാമർശത്തിൽ വിമർശനം കനത്തതോടെ പത്രത്തിന് മുഖ്യമന്ത്രിയുടെ പ്രസ് സെക്രട്ടറി കത്ത് നൽകിയിരുന്നു. പരാമർശം തെറ്റായി വ്യാഖ്യാനിച്ചെന്നും ഇത് വിവാദങ്ങൾക്ക് ഇടയാക്കിയെന്നും കത്തിൽ പറയുന്നു. ഒരു സ്ഥലമോ പ്രദേശമോ പരാമർശിച്ചിട്ടില്ലെന്നും വിവാദം അവസാനിപ്പിക്കാൻ വിശദീകരണം നൽകണമെന്നും കത്തിൽ ആവശ്യപ്പെടുന്നു. ഇതിന് പിന്നാലെയാണ് പത്രം വിശദീകരണവുമായി രംഗത്തെത്തിയത്.
മുഖ്യമന്ത്രി അഭിമുഖത്തിന് തയാറെന്നറിയിച്ചത് പിആർ ഏജൻസിയാണെന്നും സ്വർണക്കടത്ത്, കള്ളപ്പണ ഇടപാട് വിഷയങ്ങളിൽ ചോദ്യം വേണമെന്ന് ആവശ്യപ്പെട്ടുവെന്നും ഹിന്ദു പറഞ്ഞു. അഭിമുഖം അരമണിക്കൂർ നീണ്ടു. മാദ്ധ്യമ ധാർമികതയ്ക്ക് നിരക്കാത്ത സംഭവമാണ് നടന്നത്. അതിൽ ഖേദിക്കുന്നു. മുഖ്യമന്ത്രിയുടെ വിവാദ പരാമർശം തൊട്ടുമുമ്പ് നടന്ന വാർത്താസമ്മേളനത്തിൽ പറഞ്ഞതാണെന്ന് പി ആർ ഏജൻസി പ്രതിനിധി വ്യക്തമാക്കിയിരുന്നുവെന്നും ഹിന്ദു വിശദീകരിച്ചു.
അഞ്ചു വർഷത്തിനിടെ മലപ്പുറത്ത് നിന്ന് 150 കിലോ സ്വർണവും 123 കോടി രൂപയുടെ ഹവാലപ്പണവും പിടികൂടി. ഈ പണം രാജ്യദ്രോഹ പ്രവർത്തനങ്ങൾക്കാണ് ഉപയോഗിക്കുന്നത്’ എന്നായിരുന്നു പത്രത്തിൽ പ്രസിദ്ധീകരിച്ചത്.
