ചെന്നൈ : തമിഴ്‌നാട്ടിൽ തുടർച്ചയായി പെയ്യുന്ന കനത്ത മഴയെ തുടർന്ന് ദുരിതത്തിലായി ജനജീവിതം. വിവിധ ജലസംഭരണികളിലെ ജലനിരപ്പ് കുത്തനെ ഉയർന്നു. സംസ്ഥാനത്തെ ഏറ്റവും വലിയ ജലസംഭരണിയായ മേട്ടൂർ അണക്കെട്ട് പൂർണ്ണ ശേഷിയിലെത്തി.
രാത്രിയിൽ പെയ്ത കനത്ത മഴയ്ക്ക് പിന്നാലെ ജലനിരപ്പ് നിയന്ത്രിക്കുന്നതിനും വെള്ളപ്പൊക്ക സാധ്യത തടയുന്നതിനുമായി ചെന്നൈയിലെ രണ്ട് പ്രധാന ജലസംഭരണികളായ ചെമ്പരമ്പാക്കത്തിലെയും പൂണ്ടിയിലെയും ഷട്ടറുകൾ തുറന്നു. ചെന്നൈയിൽ ഇടയ്ക്കിടെ പെയ്ത കനത്ത മഴയ്ക്ക് പുറമേ തീരദേശ ജില്ലകളിലും വ്യാപകമായ മഴ പെയ്തു.
ബംഗാൾ ഉൾക്കടലിൽ രൂപം കൊണ്ട ന്യൂനമർദ്ദം ആഴത്തിലുള്ള ന്യൂനമർദ്ദമായി മാറുന്നതിനാൽ തമിഴ്‌നാടിന്റെ വിവിധ ഭാഗങ്ങളിൽ ഐഎംഡി റെഡ് അലേർട്ട് പ്രഖ്യാപിച്ചു. തുടർച്ചയായ കനത്ത മഴ മൂലമുണ്ടാകുന്ന ഏത് സാഹചര്യവും നേരിടാൻ പൂർണ്ണമായും സജ്ജരായിരിക്കാൻ വിവിധ ജില്ലാ ഭരണകൂടങ്ങൾ ജനങ്ങൾക്ക് മുന്നറിയിപ്പ് നൽകിയിട്ടുണ്ട്. കനത്ത മഴയ്ക്ക് സാധ്യതയുള്ളതിനാൽ ബുധനാഴ്ച വരെ കടലൂർ ജില്ലയിലുടനീളം 191 താൽക്കാലിക ദുരിതാശ്വാസ ക്യാമ്പുകൾ തുറന്നിട്ടുണ്ട്.
