പ്രകൃതിയുടെ വൈവിധ്യങ്ങൾ പലപ്പോഴും മനുഷ്യബുദ്ധിക്ക് ചിന്തിക്കാവുന്നതിലും അപ്പുറമാണ്. ചിലയിടങ്ങളിൽ അത് മനോഹരമാണെങ്കിൽ മറ്റു ചിലയിടങ്ങളിൽ അങ്ങേയറ്റം ക്രൂരവും വിചിത്രവുമാണ്. ഓസ്‌ട്രേലിയൻ വനാന്തരങ്ങളിൽ ജീവിക്കുന്ന ‘ആൻടെക്കിനസ്’ (Antechinus) എന്ന കുഞ്ഞൻ സഞ്ചിമൃഗങ്ങളുടെ ജീവിതകഥ കേട്ടാൽ ആരും ഒന്ന് ഞെട്ടും. പ്രണയവും കാമവും മരണവും ഒരേ നൂലിൽ കോർത്തുവച്ച വിചിത്രമായൊരു അതിജീവനത്തിന്റെ കഥയാണത്. പുറമെ നോക്കിയാൽ നമ്മുടെ വീട്ടിലെ കുഞ്ഞൻ എലികളെപ്പോലെ ഇരിക്കുമെങ്കിലും ഇവരുടെ വംശവർദ്ധനവ് രീതി ശാസ്ത്രലോകത്തെപ്പോലും അത്ഭുതപ്പെടുത്തുന്നതാണ്. ‘സൂയിസൈഡൽ റീപ്രൊഡക്ഷൻ’ അഥവാ ആത്മഹത്യാപരമായ പ്രത്യുൽപ്പാദനം നടത്തുന്ന ഈ ജീവികളുടെ ലോകത്ത് പ്രണയമെന്നാൽ മരണത്തിലേക്കുള്ള വാതിലാണ്.
ജൂലൈ മുതൽ സെപ്തംബർ വരെയുള്ള മാസങ്ങളിലാണ് ആൻടെക്കിനസുകളുടെ പ്രജനനകാലം. ഈ സമയം എത്തിയാൽ ആൺ ആൻടെക്കിനസുകളുടെ ഉള്ളിലെ ജൈവഘടികാരം വല്ലാത്തൊരു വേഗത്തിൽ ചലിക്കാൻ തുടങ്ങും. പിന്നെ വിശ്രമമില്ലാത്ത പകലുകളും രാത്രികളുമാണ്. ഒന്നും രണ്ടുമല്ല, തുടർച്ചയായി 14 മണിക്കൂർ വരെ നീണ്ടുനിൽക്കുന്ന അതിശക്തമായ ലൈംഗികബന്ധത്തിലാണ് ഇവ ഏർപ്പെടുന്നത്. രണ്ടാഴ്ചയോളം നീണ്ടുനിൽക്കുന്ന ഈ മാരത്തോൺ പ്രജനന കാലഘട്ടത്തിൽ ആൺ ജീവികൾക്ക് ഉറക്കമില്ല, ഭക്ഷണവുമില്ല. തന്റെ വംശത്തെ ഭൂമിയിൽ നിലനിർത്താനുള്ള അവസാന പോരാട്ടമെന്ന നിലയിൽ അവ സർവ്വശക്തിയും പ്രണയിനിക്കായി പകർന്നുനൽകുന്നു. എന്നാൽ ഈ തീവ്രമായ ലഹരിക്ക് അവ നൽകേണ്ടി വരുന്നത് സ്വന്തം ജീവനാണ്.
ഇണചേരൽ സമയത്ത് ആൺ ആൻടെക്കിനസുകളുടെ ശരീരത്തിൽ ടെസ്റ്റോസ്റ്റിറോൺ ഹോർമോൺ ക്രമാതീതമായി വർദ്ധിക്കുന്നു. ഇതോടൊപ്പം സമ്മർദ്ദ ഹോർമോണായ കോർട്ടിസോളും കുതിച്ചുയരും. സാധാരണഗതിയിൽ കോർട്ടിസോളിനെ നിയന്ത്രിക്കാൻ ശരീരത്തിന് കഴിയാറുണ്ടെങ്കിലും, അമിതമായ ടെസ്റ്റോസ്റ്റിറോൺ ഈ നിയന്ത്രണ സംവിധാനത്തെ തകർക്കുന്നു. ഫലമോ, സ്വന്തം ഹോർമോണുകൾ തന്നെ ശരീരത്തിന് വിഷമായി മാറുന്നു. രോമങ്ങൾ കൊഴിഞ്ഞും, ആന്തരിക രക്തസ്രാവം ഉണ്ടായുും, രോഗപ്രതിരോധ ശേഷി പൂർണ്ണമായും നശിച്ചും ആ പാവം ആൺജീവി മരണത്തിന് കീഴടങ്ങുന്നു. തന്റെ കുഞ്ഞുങ്ങൾക്കായി ജീവൻ ബലിനൽകി വീഴുന്ന ആ അച്ഛൻ ജീവിയെ കാത്ത് മറ്റൊരു വിധി കൂടി അവിടെ കാത്തിരിപ്പുണ്ട്.
മരിച്ചുവീഴുന്ന തന്റെ പങ്കാളിയുടെ ശരീരം പെൺ ആൻടെക്കിനസുകൾക്ക് വെറുമൊരു ശവമല്ല, മറിച്ച് പോഷകസമൃദ്ധമായ ഭക്ഷണമാണ്. പ്രസവിക്കാനും കുഞ്ഞുങ്ങളെ പോറ്റാനുമുള്ള ആദ്യ ഊർജ്ജം പെൺവർഗ്ഗം കണ്ടെത്തുന്നത് തന്റെ പ്രിയതമന്റെ മാംസത്തിൽ നിന്നാണ്. തന്റെ കുഞ്ഞുങ്ങളുടെ അച്ഛനെത്തന്നെ ഭക്ഷിച്ച് അവൾ പുതിയൊരു തലമുറയ്ക്ക് ജന്മം നൽകുന്നു. ഓസ്‌ട്രേലിയയുടെ തെക്കുകിഴക്കൻ വനങ്ങളിൽ മാത്രം കാണപ്പെടുന്ന ഈ കുഞ്ഞൻ ജീവികൾ പ്രകൃതിയുടെ നിഗൂഢമായ നിയമങ്ങളുടെ ജീവിക്കുന്ന രക്തസാക്ഷികളാണ്. 15 ഓളം സ്പീഷീസുകളുള്ള ഇവ ഇന്നും പരിണാമത്തിന്റെ വിചിത്രമായ ഈ പാതയിലൂടെ തന്നെ സഞ്ചരിക്കുന്നു—ജീവന്റെ തുടർച്ചയ്ക്കായി മരണം വരിക്കുന്ന പ്രണയികൾ!
