കണ്ണൂർ : കണ്ണൂരിൽ രക്തസാക്ഷി ഫണ്ട് തട്ടിപ്പ് വെളിപ്പെടുത്തിയ മുൻ സിപിഎം നേതാവ് വി കുഞ്ഞികൃഷ്ണൻ നിയമസഭാ തിരഞ്ഞെടുപ്പിൽ മത്സരിക്കും. രക്തസാക്ഷി ഫണ്ട് തട്ടിപ്പ് നടത്തിയതായി അദ്ദേഹം ആരോപണമുന്നയിച്ച എംഎൽഎ ടി ഐ മധുസൂദനനെതിരെ പയ്യന്നൂരിൽ ആണ് വി കുഞ്ഞികൃഷ്ണൻ മത്സരിക്കുക. ഒരു മുന്നണിയുടെയും ഭാഗമായിട്ടല്ല മത്സരം എന്നും എല്ലാവരുടെയും പിന്തുണ അഭ്യർത്ഥിക്കുകയാണെന്നും വി കുഞ്ഞികൃഷ്ണൻ വ്യക്തമാക്കി.
പയ്യന്നൂരിലെ പാർട്ടിയെ മാഫിയ സംഘത്തിന് എറിഞ്ഞു കൊടുക്കരുതെന്നും വി കുഞ്ഞികൃഷ്ണൻ ജനങ്ങളോട് ആവശ്യമുന്നയിച്ചു. കണ്ണൂരിൽ പ്രത്യേക വാർത്താസമ്മേളനം വിളിച്ചു ചേർത്തായിരുന്നു വി കുഞ്ഞികൃഷ്ണൻ സ്ഥാനാർത്ഥിത്വം പ്രഖ്യാപിച്ചത്. മധുസൂദനനെ സ്ഥാനാർത്ഥിയാക്കില്ലെന്ന് കരുതിയിരുന്നു. ഇത്രയേറെ ആരോപണങ്ങൾ ഉണ്ടായിട്ടും പാർട്ടി മാറി ചിന്തിക്കാൻ തയ്യാറായില്ല. അതിനാലാണ് പയ്യന്നൂരിൽ മത്സരിക്കുന്നത്. ഒരു മുന്നണിയുടെയും ഭാഗമാവില്ല എങ്കിലും, കോൺഗ്രസ് പിന്തുണയ്ക്കുമെന്ന് പ്രതീക്ഷിക്കുന്നു. ഇടതുപക്ഷത്തിന് എതിരായല്ല മറിച്ച് അഴിമതിക്ക് എതിരായാണ് താൻ മത്സരിക്കുന്നത് എന്നും വി കുഞ്ഞികൃഷ്ണൻ വ്യക്തമാക്കി.
