ഭാരതീയ വ്യോമസേനയുടെ കരുത്ത് വർദ്ധിപ്പിക്കുന്നതിനായി നിർണ്ണായകമായ പ്രതിരോധ കരാറുകൾ 2026-27 സാമ്പത്തിക വർഷത്തിൽ ഒപ്പുവെക്കുമെന്ന് പ്രതിരോധ മന്ത്രാലയം പാർലമെന്ററി സമിതിയെ അറിയിച്ചു. 114 റാഫേൽ യുദ്ധവിമാനങ്ങൾ, 60 മീഡിയം ട്രാൻസ്പോർട്ട് എയർക്രാഫ്റ്റുകൾ, അഡീഷണൽ എയർബോൺ ഏർലി വാണിംഗ് ആൻഡ് കൺട്രോൾ സിസ്റ്റങ്ങൾ എന്നിവ വാങ്ങുന്നതിനുള്ള കൂറ്റൻ കരാറുകളാണ് അന്തിമഘട്ടത്തിലേക്ക് നീങ്ങുന്നത്.
മൾട്ടി-റോൾ ഫൈറ്റർ എയർക്രാഫ്റ്റ് പ്രോഗ്രാമിന് കീഴിൽ 114 റാഫേൽ ജെറ്റുകൾ വാങ്ങുന്നതിനുള്ള ഏകദേശം 3.25 ലക്ഷം കോടി രൂപയുടെ പദ്ധതിക്കാണ് അംഗീകാരം ലഭിക്കുന്നത്. ‘മേക്ക് ഇൻ ഇന്ത്യ’ പദ്ധതിയുടെ ഭാഗമായി ഫ്രഞ്ച് കമ്പനിയായ ദസ്സോ ഏവിയേഷൻ ഒരു ഇന്ത്യൻ പങ്കാളിയുമായി ചേർന്ന് ഈ വിമാനങ്ങൾ ഇന്ത്യയിൽ നിർമ്മിക്കും. 18 വിമാനങ്ങൾ പറക്കാൻ സജ്ജമായ അവസ്ഥയിൽ ഫ്രാൻസിൽ നിന്ന് നേരിട്ട് എത്തുമ്പോൾ ബാക്കി 96 എണ്ണം ഇന്ത്യയിൽ വെച്ചായിരിക്കും നിർമ്മിക്കുക.
വ്യോമസേനയുടെ പഴക്കമേറിയ An-32 വിമാനങ്ങൾക്ക് പകരമായി 60 പുതിയ ഗതാഗത വിമാനങ്ങൾ വാങ്ങാനാണ് പദ്ധതി. ഏകദേശം 1 ലക്ഷം കോടി രൂപ ചെലവ് പ്രതീക്ഷിക്കുന്ന ഈ കരാറിനായി അമേരിക്കയുടെ ലോക്ഹീഡ് മാർട്ടിൻ (C-130J), ബ്രസീലിന്റെ എംബ്രായർ (C-390), യൂറോപ്യൻ എയർബസ് (A-400M) എന്നീ കമ്പനികൾ മത്സരരംഗത്തുണ്ട്. ഇതിൽ 12 വിമാനങ്ങൾ നേരിട്ട് ഇറക്കുമതി ചെയ്യുകയും 48 എണ്ണം ഇന്ത്യയിൽ നിർമ്മിക്കുകയും ചെയ്യും.
ശത്രുനീക്കങ്ങൾ നേരത്തെ തിരിച്ചറിയാൻ സഹായിക്കുന്ന അത്യാധുനിക എയർബോൺ ഏർലി വാണിംഗ് ആൻഡ് കൺട്രോൾ സംവിധാനങ്ങളും ഈ കാലയളവിൽ വ്യോമസേനയുടെ ഭാഗമാകും. ആകാശത്തെ കണ്ണ് എന്ന് വിശേഷിപ്പിക്കപ്പെടുന്ന ഈ സംവിധാനം യുദ്ധമുഖത്ത് സേനയുടെ പ്രഹരശേഷി വർദ്ധിപ്പിക്കും.
2025-26 വർഷത്തെ അപേക്ഷിച്ച് വ്യോമസേനയുടെ ക്യാപിറ്റൽ ബജറ്റിൽ 37.03% വർദ്ധനവാണ് ഇത്തവണ ഉണ്ടായിരിക്കുന്നത്. നിലവിലെ ഭൗമരാഷ്ട്രീയ സാഹചര്യങ്ങൾ കണക്കിലെടുത്ത് സേനയെ നവീകരിക്കാനും സാങ്കേതികമായി കൂടുതൽ കരുത്തുറ്റതാക്കാനും ഈ ഫണ്ട് വിനിയോഗിക്കണമെന്ന് പാർലമെന്ററി സമിതി നിർദ്ദേശിച്ചു. ഇതുകൂടാതെ തേജസ് MK-1A യുദ്ധവിമാനങ്ങൾ, ദീർഘദൂര ഡ്രോണുകൾ (RPA) എന്നിവയും വരും വർഷങ്ങളിൽ സേനയുടെ കരുത്ത് കൂട്ടാൻ എത്തും.
