ശ്രീനഗർ : ലഡാക്കിലെ സോജിലാ പാസിനു സമീപം വൻ ഹിമപാതം. അപകടത്തിൽ ആറ് പേർ കൊല്ലപ്പെട്ടു. ഏഴുപേർക്ക് പരിക്കേറ്റിട്ടുണ്ട്. അപകടത്തിൽ നിരവധി വാഹനങ്ങൾ മഞ്ഞിനടിയിൽ അകപ്പെടുകയും ശ്രീനഗർ-ലേ ദേശീയ പാത പൂർണ്ണമായും തടസ്സപ്പെടുകയും ചെയ്തു.
ലഡാക്കിലെയും കശ്മീരിലെയും അതിർത്തി മേഖലകളെ ബന്ധിപ്പിക്കുന്ന തന്ത്രപ്രധാനമായ സോജി ലാ പാസിലെ (Zoji La) സീറോ പോയിന്റിനും മിനിമർഗിനും ഇടയിലാണ് ദാരുണമായ ഈ അപകടം സംഭവിച്ചത്. ഹിമപാതത്തെ തുടർന്ന് 15 വാഹനങ്ങൾ ഭാഗികമായോ പൂർണ്ണമായോ മഞ്ഞിനടിയിൽ അകപ്പെട്ടതായി പോലീസ് വ്യക്തമാക്കി. പെട്ടെന്നുണ്ടായ അതിശക്തമായ ഹിമപാതം ഹൈവേയിലൂടെ കടന്നു പോവുകയായിരുന്ന വാഹനങ്ങൾക്ക് മേൽ പതിക്കുകയായിരുന്നു.
ശ്രീനഗറിൽ നിന്നും കാർഗിലിലേക്ക് പോവുകയായിരുന്ന യാത്രക്കാരാണ് അപകടത്തിൽപ്പെട്ടത്. മരിച്ചവരിൽ നാല് പുരുഷന്മാരും ഒരു സ്ത്രീയും ഒരു കുട്ടിയും ഉൾപ്പെടുന്നു. ഇവർ കാർഗിൽ സ്വദേശികളാണെന്നാണ് പ്രാഥമിക വിവരം.
അപകടത്തിൽ ഏഴ് പേർക്ക് പരിക്കേറ്റു. ഇവരെ ദ്രാസിലെ സബ് ഡിസ്ട്രിക്റ്റ് ആശുപത്രിയിൽ പ്രവേശിപ്പിച്ചു. ഇതിൽ ചിലരുടെ നില ഗുരുതരമാണ്. അപകടവിവരമറിഞ്ഞ ഉടൻ തന്നെ ലഡാക്ക് ഭരണകൂടവും സുരക്ഷാ സേനയും രക്ഷാപ്രവർത്തനം ആരംഭിച്ചു.
ഇന്ത്യൻ സൈന്യം, ബോർഡർ റോഡ്‌സ് ഓർഗനൈസേഷൻ , ദുരന്തനിവാരണ സേന , പോലീസ് എന്നിവർ സംയുക്തമായാണ് തിരച്ചിൽ നടത്തുന്നത്. സ്നോ ക്ലിയറൻസ് മെഷീനുകൾ ഉപയോഗിച്ച് കൂറ്റൻ മഞ്ഞുപാളികൾ നീക്കം ചെയ്തുകൊണ്ടാണ് രക്ഷാപ്രവർത്തനം നടത്തിയത്.
