2003-ൽ പുറത്തിറങ്ങിയ ഹാസ്യ-കുടുംബ ചിത്രമായിരുന്നു ജയരാജ് സംവിധാനം ചെയ്ത തിളക്കം. ദിലീപിന്റെ കോമഡി ടൈമിംഗും വൈകാരിക പ്രകടനങ്ങളും, നെടുമുടി വേണു, കെ.പി.എ.സി. ലളിത, ജഗതി ശ്രീകുമാർ, സലിം കുമാർ എന്നിവരുടെ മികച്ച പ്രകടനങ്ങളും ഈ ചിത്രത്തെ പ്രേക്ഷകർക്ക് പ്രിയങ്കരമാക്കി.
ഒരു അമ്പലത്തിലെ ഉത്സവത്തിനിടയിൽ വർഷങ്ങൾക്ക് മുൻപ് കാണാതായ ഏകമകൻ ഉണ്ണിയെ (ദിലീപ്) കാത്തിരിക്കുന്നവരാണ് പത്മനാഭൻ മാസ്റ്ററും (നെടുമുടി വേണു) ഭാര്യ ദേവകിയമ്മയും (കെ.പി.എ.സി. ലളിത). ശേഷം വക്കളാരെ അപ്രതീക്ഷിതമായി അവർക്ക് ഉണ്ണിയുടെ( ദിലീപ്) വിവരം ലഭിക്കുന്നു. ഉണ്ണിയെ കിട്ടിയതിന് പിന്നാലെയാണ് അയാൾ മാനസിക അസ്വസ്ഥതകൾ നേരിടുന്ന ഒരു ആളാണെന്ന് എല്ലാവരും അറിയുന്നത്. ഉണ്ണിയെ പഴയപടിയാക്കാൻ മാസ്റ്ററും അയൽക്കാരിയായ അമ്മുവും (കാവ്യാ മാധവൻ) ശ്രമിക്കുന്നു. ഈ സമയത്ത് ഉണ്ണി, അമ്മുവുമായി കൂടുതൽ അടുക്കുന്നു. എന്തായാലും ഉണ്ണിക്ക് ഓർമ്മ തിരികെ കിട്ടിയ ശേഷമാണ് ഉണ്ണി അല്ലെന്നും, വിഷ്ണു എന്നൊരാളാണെന്നും, ബാംഗ്ലൂരിലെ ഒരു ഡോൺ ആയ മഹേശ്വരൻ തമ്പിയുടെ (ത്യാഗരാജൻ) മകനാണെന്നും വെളിപ്പെടുത്തുന്നു.
വിഷ്ണുവിന് ഓർമ്മ നഷ്ടപ്പെട്ടതും, ഉണ്ണിയായി മാറിയതിനും പിന്നിലുള്ള ദുരൂഹതകളും, വിഷ്ണുവിന്റെ ഭൂതകാലത്തിലെ പ്രണയവും (ഭാവന അവതരിപ്പിച്ച ഗൗരി), തുടർന്നുണ്ടാകുന്ന സംഭവങ്ങളുമാണ് ചിത്രത്തിന്റെ ക്ലൈമാക്സ്. ചിത്രത്തിൽ ചിരി മുഹൂർത്തങ്ങൾക്ക് വലിയ പ്രാധാന്യമായിരുന്നു ഉണ്ടായിരുന്നത്. അതിൽ തന്നെ സലിം കുമാർ, ഹരിശ്രീ അശോകൻ, കൊച്ചിൻ ഹനീഫ എന്നിവരായിരുന്നു കൂടുതൽ സ്കോർ ചെയ്തത്.
ചിത്രത്തിൽ വില്ലൻ വരുന്ന സമയത്തെ ബിജെഎമ്മിനും പാട്ടുകൾക്കും എല്ലാം ഫാൻസ്‌ ഉണ്ടെങ്കിലും എനിക്ക് വളരെ പ്രിയപ്പെട്ടതായി തോന്നിയ ഒരു ബിജിഎമ്മും ഒരു സംഭാഷണവും ഉണ്ട്. ദിലീപിന്റെ ചേച്ചിയായ ബിന്ദു പണിക്കരെ( വനജ) സിനിമയിലുടനീളം വളരെ തമാശക്കാരിയാ ഒരു കഥാപാത്രമായിട്ടാണ് കാണിക്കുന്നത്. അച്ഛനെയും , അമ്മയെയും പോലെ ഉണ്ണിയെ കാണാതെയായ വേദന പുറമെ പ്രകടിപ്പിക്കാതെ അവനെ വർഷങ്ങൾക്ക് ശേഷം കാണുമ്പോൾ പോലും അയാളോട് തമാശയുടെ രീതിയിൽ സംസാരിക്കുന്ന ചേച്ചി.
എന്നാൽ അസുഖം ഭേദമായി തന്റെ മുന്നിൽ അനുജൻ നിൽക്കുന്ന നിമിഷം പിന്നെ അവരുടെ സംഭാഷണ ശൈലിയിൽ മാറ്റങ്ങൾ ഉണ്ടാകുന്നത് നമുക്ക് കാണാൻ സാധിക്കും. ആദ്യത്തെ തമാശയൊക്കെ കുറച്ച് അവർ സീരിയസായി മാറുന്നതാണ് പിന്നെ കാണുന്നത്. ആ സമയത്താണ് ദിലീപിന്റെ വിഷ്ണു അവരെ- ” ചേച്ചി” എന്ന് വിളിക്കുന്ന ഭാഗമുണ്ട്. ആ ബിജെഎം നിങ്ങൾ ഒന്ന് ശ്രദ്ധിക്കുക, എന്തോ കാര്യമായ ഒന്ന് സംഭവിക്കാൻ പോകുന്നു എന്ന് സൂചന നൽകുന്ന ഒന്ന്. അതുപോലെ നീ എന്നും, തടിച്ചി എന്നും ഒകെ ഇതുവരെ വിളിച്ച അനുജൻ തന്നെ ” ചേച്ചി” എന്ന് വിളിക്കുമ്പോൾ ഉള്ള ഒരു ഞെട്ടലും അവരുടെ മുഖത്ത് അപ്പോൾ കാണാം.
