തിരുവനന്തപുരം : കുംഭമേള വൈറൽ താരം മൊണാലിസയുടെ വിവാഹം നടത്തി കൊടുത്തതുമായി ബന്ധപ്പെട്ട മാധ്യമപ്രവർത്തകരുടെ ചോദ്യങ്ങൾക്കിടെ പ്രകോപിതനായി സിപിഐ സംസ്ഥാന സെക്രട്ടറി ബിനോയ് വിശ്വം. പെൺകുട്ടിയുടെ വിവാഹം കേരള സ്റ്റോറി തന്നെയാണെന്നും അന്ന് പെൺകുട്ടിക്ക് പ്രായപൂർത്തി ആയിരുന്നു എന്നുമുള്ള ബിനോയ് വിശ്വത്തിന്റെ പ്രസ്താവനയെ തുടർന്ന് ഒരു മാധ്യമപ്രവർത്തകൻ ചിരിച്ചതാണ് അദ്ദേഹത്തെ പ്രകോപിതനാക്കിയത്. തുടർന്ന് സീരിയസായി സംസാരിക്കുമ്പോൾ ചിരിക്കരുതെന്ന് അദ്ദേഹം മാധ്യമപ്രവർത്തകനോട് ദേഷ്യപ്പെട്ട് ശാസിച്ചു.
“താൻ എന്തിനാണ് ചിരിക്കുന്നത്. നമ്മൾ തമാശയല്ല ഇവിടെ പറയുന്നത്. ഗൗരവമായി രാഷ്ട്രീയം പറയുമ്പോൾ ചിരിക്കരുത്. ഇത് പ്രായകുറവിന്റെ ലക്ഷണമാണ്. കാര്യം ചോദിച്ചാൽ മതി,” എന്ന് ബിനോയ് വിശ്വം മാധ്യമപ്രവർത്തകനെ ശാസിച്ചു.
മൊണാലിസയുടെ ഡേറ്റ് ഓഫ് ബർത്ത് അറിയില്ലെങ്കിലും പ്രായപൂർത്തിയായ പെൺകുട്ടിയാണെന്ന് തോന്നിയതുകൊണ്ടാണ് വിവാഹം നടത്തിക്കൊടുത്തത് എന്നായിരുന്നു സിപിഐ സംസ്ഥാന സെക്രട്ടറിയുടെ പ്രതികരണം. ആധാർ കാർഡ് ആയിരുന്നു അടിസ്ഥാന രേഖയായി നോക്കിയത്. അതിൽ പ്രായപൂർത്തിയായിരുന്നു. ഈ വിവാഹത്തിന് പിന്നിൽ കൃത്യമായ രാഷ്ട്രീയ അജണ്ടയുണ്ടെന്നും ബിനോയ് വിശ്വം വ്യക്തമാക്കി.
