ഹൈദരാബാദിനെതിരായ മത്സരത്തിൽ നാല് ഓവറിൽ വിക്കറ്റൊന്നും നേടാതെ 54 റൺസ് വഴങ്ങിയ ജസ്പ്രീത് ബുംറയുടെ പ്രകടനത്തെ ശ്രീകാന്ത് വിമർശിച്ചു. ഐപിഎൽ 2026-ൽ ഇതുവരെ എട്ട് മത്സരങ്ങളിൽ നിന്ന് വെറും രണ്ട് വിക്കറ്റുകൾ മാത്രമാണ് ബുംറയ്ക്ക് നേടാനായത്. 132 എന്ന ബാറ്റിംഗ് ശരാശരിയിലും 8.80 എന്ന ഇക്കോണമിയിലുമാണ് താരം നിലവിൽ പന്തെറിയുന്നത്.
ബുംറയുടെ ബൗളിംഗ് ശൈലിയെ ശ്രീകാന്ത് ചോദ്യം ചെയ്തു. പുതിയ പന്ത് കൈവശമുള്ളപ്പോൾ രണ്ട് ഇടങ്കയ്യൻ ബാറ്റർമാർക്കെതിരെ സ്ലോവർ ഡെലിവറികൾ എറിയുന്നത് ഗുണം ചെയ്യില്ലെന്നും വിക്കറ്റ് കീപ്പർക്കോ സ്ലിപ്പിനോ ക്യാച്ച് നൽകുന്ന രീതിയിൽ പന്തെറിയണമായിരുന്നുവെന്നും അദ്ദേഹം പറഞ്ഞു. “ജോഫ്ര ആർച്ചർ ചെയ്യുന്നതുപോലെ ഫുൾ സ്പീഡിൽ പന്തെറിഞ്ഞ് വിക്കറ്റുകൾ നേടാൻ ബുംറ ശ്രമിക്കണം. ബുംറയുടെ പന്തുകളിൽ പഴയ മൂർച്ച കാണുന്നില്ല. അദ്ദേഹം പന്തെറിയുന്നത് സാധാരണ ബൗളറെ പോലെയാണ്.
മുംബൈയുടെ ബാറ്റിംഗിലെ മധ്യ ഓവറുകളാണ് തോൽവിക്ക് പ്രധാന കാരണമെന്ന് ശ്രീകാന്ത് നിരീക്ഷിച്ചു. സൂര്യകുമാർ യാദവ്, തിലക് വർമ്മ, നമൻ ധീർ എന്നിവർ നേരിട്ട 27 പന്തുകളിൽ നിന്ന് വെറും 34 റൺസ് മാത്രമാണ് നേടാനായത്. 200 സ്ട്രൈക്ക് റേറ്റിൽ കളിക്കേണ്ട സമയത്ത് ഇവർ പന്തുകൾ പാഴാക്കിയത് ടീമിന് തിരിച്ചടിയായി. അവസാന നാല് ഓവറിൽ 60 റൺസെങ്കിലും നേടേണ്ട സ്ഥാനത്ത് 41 റൺസ് മാത്രമാണ് മുംബൈയ്ക്ക് സ്കോർ ചെയ്യാനായത്. 270 റൺസ് വരെ എത്താമായിരുന്ന സ്കോർ മലിംഗയുടെ മികച്ച സ്പെല്ലിലൂടെ ഹൈദരാബാദ് പിടിച്ചുനിർത്തി.
ഈ തോൽവിയോടെ മുംബൈ ഇന്ത്യൻസിന്റെ പ്ലേ ഓഫ് പ്രതീക്ഷകൾ ഏകദേശം അവസാനിച്ച മട്ടാണ്. ഇനിയുള്ള ആറ് മത്സരങ്ങളിലും തുടർച്ചയായി വിജയിച്ചാൽ മാത്രമേ അവർക്ക് നേരിയ സാധ്യതയെങ്കിലും അവശേഷിക്കുന്നുള്ളൂ.
