ഐപിഎൽ 2026-ലെ ഏറ്റവും വലിയ പോരാട്ടമായ ചെന്നൈ സൂപ്പർ കിംഗ്‌സ് – മുംബൈ ഇന്ത്യൻസ് (CSK vs MI) ‘എൽ ക്ലാസിക്കോ’യ്ക്ക് മുൻപായി ഇന്ത്യൻ ക്രിക്കറ്റിലെ ഇതിഹാസ താരങ്ങളായ എം.എസ് ധോണിയും രോഹിത് ശർമ്മയും തമ്മിലുള്ള കൂടിക്കാഴ്ചയുടെ ദൃശ്യങ്ങൾ സമൂഹമാധ്യമങ്ങളിൽ വൈറലാകുന്നു. വെള്ളിയാഴ്ച ചെന്നൈ എം.എ ചിദംബരം സ്റ്റേഡിയത്തിൽ നടന്ന പരിശീലനത്തിനിടെയാണ് ഇരുവരും തമ്മിൽ കണ്ടുമുട്ടിയതും വിശേഷങ്ങൾ പങ്കുവെച്ചതും. കളിക്കളത്തിലെ വലിയ വൈരികളാണെങ്കിലും, ഇരുവരും തമ്മിലുള്ള പരസ്പര ബഹുമാനവും സ്നേഹവും വ്യക്തമാക്കുന്നതായിരുന്നു ആ നിമിഷങ്ങൾ.
ഇതിന് പിന്നാലെ സമൂഹമാധ്യമങ്ങളിൽ ഏറ്റവും കൂടുതൽ ശ്രദ്ധ നേടിയത് മറ്റൊരു ചിത്രമാണ്. ധോണിക്കും രോഹിത് ശർമ്മയ്ക്കുമൊപ്പം ഇന്ത്യൻ താരം സൂര്യകുമാർ യാദവും നിൽക്കുന്ന ചിത്രമാണത്. ഇന്ത്യൻ ക്രിക്കറ്റ് ചരിത്രത്തിലെ തന്നെ അപൂർവ്വമായൊരു നിമിഷമായാണ് ആരാധകർ ഇതിനെ ആഘോഷിക്കുന്നത്. ഇന്ത്യയ്ക്ക് ടി20 ലോകകപ്പ് സമ്മാനിച്ച മൂന്ന് നായകന്മാരാണ് ഒരൊറ്റ ഫ്രെയിമിൽ ഒത്തുചേർന്നത്. 2007-ൽ ധോണിയും, 2024-ൽ രോഹിത് ശർമ്മയും ഇന്ത്യയെ ലോകകപ്പ് വിജയത്തിലേക്ക് നയിച്ചപ്പോൾ, ഈ വർഷം (2026) സൂര്യകുമാർ യാദവിന്റെ നേതൃത്വത്തിലാണ് ഇന്ത്യ വീണ്ടും വിശ്വകിരീടം ചൂടിയത്.
പരിക്കിന്റെ പിടിയിലായിരുന്ന ഇരു താരങ്ങളുടെയും ആരോഗ്യനിലയെക്കുറിച്ചുള്ള പുതിയ വിവരങ്ങളും പുറത്തുവന്നിട്ടുണ്ട്: കാലിലെ പേശികൾക്കേറ്റ പരിക്ക് ഭേദമായിവരികയാണെന്ന് മുംബൈ ഇന്ത്യൻസ് മുഖ്യ പരിശീലകൻ മഹേല ജയവർധനെ വ്യക്തമാക്കി. ഈ സീസണിൽ വെറും നാല് മത്സരങ്ങൾ മാത്രം കളിച്ച രോഹിത്, ചെന്നൈയിൽ ബാറ്റിംഗ് പരിശീലനം പുനരാരംഭിച്ചിട്ടുണ്ട്. ദിവസേനയുള്ള പരിശോധനകൾക്ക് ശേഷം മെഡിക്കൽ ടീമായിരിക്കും താരത്തിന്റെ മടങ്ങിവരവിൽ അന്തിമ തീരുമാനമെടുക്കുക.
കാൽവണ്ണയ്ക്കേറ്റ പരിക്ക് ഭേദമായിവരുന്നതായി സിഎസ്‌കെ ബാറ്റിംഗ് കോച്ച് മൈക്കൽ ഹസ്സി അറിയിച്ചു. ഏകദേശം മൂന്നാഴ്ചയായി വിശ്രമത്തിലായിരുന്ന ധോണി, ഇപ്പോൾ വിക്കറ്റുകൾക്കിടയിലുള്ള ഓട്ടമടക്കം പരിശീലിക്കുന്നുണ്ട്. മടങ്ങിവരവിനുള്ള തിയതി കൃത്യമായി പറയാനാകില്ലെങ്കിലും, അദ്ദേഹത്തിന്റെ തിരിച്ചുവരവ് ഉടൻ തന്നെയുണ്ടാകുമെന്ന് ഹസ്സി വ്യക്തമാക്കി.
ക്രിക്കറ്റ് ലോകം ആവേശത്തോടെ കാത്തിരിക്കുന്ന സിഎസ്‌കെ-മുംബൈ പോരാട്ടത്തിൽ ഇരു ഇതിഹാസങ്ങളും ഉണ്ടാകില്ല എന്ന് നിലവിലെ സാഹചര്യത്തിൽ ഉറപ്പിക്കാം.
https://twitter.com/i/status/2050256580629946723
